Taratasy handeha amindrô Hebreo aby io
8 Ty hevitry maventy amy raha koran̈inay zen̈y: Karaha zen̈y mpisôron̈obentsika, ary izy efa mipetraka ankavanan̈an’ny sezy fiandrianan̈an’ny Zan̈ahary, araiky Farany An̈abo an-dan̈itry an̈y. 2 Aviô koa izy manompo* amy toeran̈a masin̈y ndreky amy tran̈olay ten̈a izy. Jehovah niasa tran̈olay io fa tsy olombelon̈o. 3 Mpisôron̈obe jiaby zay bakà nirahan̈a han̈ano fan̈atitry ndreky sôron̈o; ke araiky io koa tsy maintsy man̈ano sôron̈o. 4 Izy ôtrizay koa tambony tany tatỳ, izy tsy honohono hanjary mpisôron̈o zen̈y foeky, fôtony efa misy olo man̈ano fan̈atitry eraka raha takian’ny Lalàn̈a. 5 Fanompoan̈a masin̈y ataondrô lelahy aby zen̈y taratra ndreky kandindon̈on’ny raha an-dan̈itry an̈y. Hita tsarabe raha zen̈y, tamy didy namezan’ny Zan̈ahary i Mosesy, lera Mosesy handeha han̈ôrin̈y tran̈olay in̈y. Ty didy zen̈y: “Ataova mifan̈araka tsarabe amy môdely naboakako anao tamy bongo tan̈y in̈y raha jiaby momba izio.” 6 Fa ziôty ndraiky, Jesosy nan̈ankin̈ana fanompoan̈a* mbala tsara mare mandilatra fanompoan̈a nataondrô mpisôron̈o taloha aby in̈y, fôtony izy mpan̈elan̈elan̈a atsika amy fifan̈ikian̈a mbala tsaratsaran’ny araiky taloha in̈y, aviô fampan̈antinan̈a natao tamintsika koa mbala tsaratsaran’ny fampan̈antinan̈a taloha in̈y.
7 Izikoa fifan̈ikian̈a araiky voanalohany in̈y tsisy tsin̈iny, tsy nilain̈a aby araiky faharoe. 8 Fa, Zan̈ahary ten̈a nan̈amia tsin̈y irô vahoakan’Israely aby io, tamin’izy nivolan̈a tamindrô karaha ty: “‘Tandrin̈esanarô zaho’, ho Jehovah. ‘Andra araiky an̈y, zaho han̈ano fifan̈ikian̈a vaovao amy taranakan’Israely ndreky amy taranakan’i Joda.’ 9 Karaha ty koa ho Jehovah: ‘Fifan̈ikian̈a vaovao io tsy mitovy amy fifan̈ikian̈a nataoko tamindrô dadilahibendrô aby in̈y, tamy zaho nitantan̈a irô niboaka baka ta Ezipty in̈y. Irô tsy nan̈aja fifan̈ikian̈a nataoko tamindrô, ke vôly zaho nikarakara irô.’
10 “‘Ty fifan̈ikian̈a hataoko amy taranakan’Israely, afaran’ny andra aby zen̈y’, ho Jehovah. ‘Lalàn̈anaka hampidiriko an̈atin’ny jerindrô, aviô izio hisoratiko an̈atin’ny fôndrô. Zaho hanjary Zan̈aharindrô aviô irô hanjary vahoakanaka.
11 “‘Irô efa tsisy hivolan̈a amin’olo firenena araiky amindrô na amy rahalahindrô karaha ty: “Ataova raha hahaizanao Jehovah!” Irô jiaby bakà hahay zaho, rango amy farany hely firaka amy farany be. 12 Zaho hamindra fô amindrô ndray irô nan̈ano raha ratsy, aviô efa tsy halaiko onon̈o eky fahotan̈a nataondrô.’”
13 Zan̈ahary koa fa nampiasa volan̈a “fifan̈ikian̈a vaovao” io, nataony raha hahavy araiky taloha in̈y ho lany daty. Ke raha koa fa lany daty sady kay zen̈y, io tsy maintsy ho ravan̈a fo.