Taratasy handeha amindrô Hebreo aby io

9 Tamy fifan̈ikian̈a taloha in̈y nisy lalàn̈a momba fanompoan̈a masin̈y natao tamy tran̈olay masin̈y. Tran̈olay io tambony tany tatỳ. 2 Aroe efitry tan̈atin’ny tran̈olay io. Tamin’ny efitry voanalohany tao nisy lalampon̈o ndreky latabatra, aviô tan̈abon’ny latabatra io nisy môfo.* Toeran̈a Masin̈y nikahian̈a efitry io. 3 Efitry faharoe tamy tran̈olay io ndraiky, Farany Masin̈y nikahian̈a izio. Nisy ridô* nampisaraka efitry aroe io. 4 Tamin’ny efitry faharoe io tao nisy fitaovan̈a volamena fan̈oroan̈a emboko man̈itry, ndreky vatra misy fifan̈ikian̈a. Vatra io nipakoen̈a volamena, aviô natao tan̈atin’izio tao sajoa volamena nisy mana, ndreky tongozon’i Arona, tsy ino zen̈y fa tongozo araiky namelan̈a in̈y, baka iô takela-bato nisy Didy Folo.* 5 Tan̈abon’ny vatra io nisy sarin’ny kerobima aroe be voninahitry; kandindon̈ondrô* io nanaron̈o rakotron’ny vatra io.* Kanefa, tsy ziô fotoan̈a tôkony hikoran̈ana momba raha aby zen̈y amin’ny an-tsipiriany.

6 Raha aby zen̈y koa fa voaôrin̈y, irô mpisôron̈o aby io midriky amin’ny efitry voanalohany amy tran̈olay io isan’andra koa fa han̈ano fanompoan̈a masin̈y. 7 Kanefa, mpisôron̈obe zaraiky fo midriky amin’ny efitry faharoe ao, indraiky isaka taon̈o. Ke lera izy midriky ao, izy tsy maintsy mitondra lio; izio ataony fan̈atitry nohon’ny fahotan̈anany tômpiny ndreky nohon’ny fahotan̈a nataon’ny vahoaka kanefa tsy kiniandrô.* 8 Aboakan’ny fan̈ahy masin̈y mazava tsarabe fa mbala tsendriky nisy olo nahita lalan̈a mandeha amy Farany Masin̈y io,* izikoa mbala iô tran̈olay voanalohany io.* 9 Tran̈olay io manôndro raha misy amy ziôty. Hita baka amy zio bakà fa, irô olo man̈ano fanompoan̈a masin̈y aby io ndray man̈ano sôron̈o ndreky fan̈atitry, raha aby zen̈y tsy ten̈a mahavy irô hanan̈a feon’ny fieritreretan̈a madio aby. 10 Sôron̈o ndreky fan̈atitry aby io raha zisty momba hanin̈y ndreky raha igiahan̈a aviô fombafomba fanasan̈a ain̈y fo. Irô io raha nitakian’ny lalàn̈a momba raha ambony tany,* ke nila natao fo irô raha aby io parapavian’ny fotoan̈a voatôndro han̈itsian̈a raha jiaby.

11 Fa Kristy ndraiky efa nanjary mpisoron̈obe, ary atsika efa mahazo hatsaran̈a maro baka amy zen̈y. Izy nidriky tamy tran̈olay mbala be lavitry sady mbala tsara lavitry. Tran̈olay io tsy ambony tany eto, fôtony izio tsy niasain’ny tan̈an’olo. 12 Izy koa fa nidriky tamy Farany Masin̈y* tao, izy tsy nitondra lion’ny bengy lahy ndreky lion’ny aomby lahy mbala vantony, fa lionany tômpiny foeky nindesiny tao, ary indraiky fo fa tsy nan̈indroe. Baka tamy lionany io nazahoantsika fan̈avaotan̈a* mandrakizay. 13 Fôtony bakà, izikoa lion’ny bengy lahy ndreky lion’ny aomby lahy, aviô jôfon’ny aomby vavy mbala vantony nafafindrô mpisôron̈o aby io tamin’olo maloto efa mahavy olo io hadio man̈oloan̈a Zan̈ahary,* 14 ke tsy intsaka eky lion’i Kristy? Izy bakà nan̈araka fitaritan’ny fan̈ahy masin̈y,* ke ain̈inany tsisy tsin̈y io nataony sôron̈o tamy Zan̈ahary. Baka amy lio nalatsany io mahavy atsika manan̈a feon’ny fieritreretan̈a madio ndreky mahavita man̈ano fanompoan̈a masin̈y amy Zan̈ahary velon̈o, fôtony atsika vôly nan̈ano asa maty.

15 Zen̈y nahavy izy nanjary mpan̈elan̈elan̈a amy fifan̈ikian̈a vaovao, amy zen̈y hahazo fampan̈antinan̈a momba lova mandrakizay an-dan̈itry an̈y lan̈iany olo voakaiky. Kristy naty in̈y bakà nanjary vidim-pan̈avaotan̈a nankafaka irô tamy fandikan-dalàn̈a, tamin’irô mbala voafehin’ny fifan̈ikian̈a taloha in̈y. 16 Izikoa bakà efa misy fifan̈ikian̈a atao, tôkony ho foaty olo nan̈ano fifan̈ikian̈a io, 17 fôtony baka amy fahafatesan̈a mahavy fifan̈ikian̈a araiky hanan-kery. Ke tsy hanan-kery foeky fifan̈ikian̈a io izikoa olo nan̈ano izio mbala velon̈o. 18 Zen̈y nahavy fifan̈ikian̈a taloha in̈y tsy honohono ho nanan-kery* foeky izikoa tsisy lio nalatsaka. 19 Mosesy koa fa baka nivolan̈a didy tsiaraikiaraiky tamy Lalàn̈a tao tamin’olo jiaby, izy nangala lion’ny aomby lahy mbala vantony ndreky lion’ny bengy lahy, aviô izio naharony tamy rano. Izy baka tiô nangala volovolon’ôndrikôndriky mena dà ndreky hysopa namafazany raha zen̈y tamy bokin’ny* fifan̈ikian̈a ndreky tamin’olo jiaby, 20 sady nivolan̈a karaha ty: “Lio ty mampanan-kery fifan̈ikian̈a natao tamy Zan̈ahary, ary anarô nirahany man̈aja fifan̈ikian̈a zen̈y.” 21 Nifafazany lio koa tran̈olay io ndreky fitaovan̈a jiaby fan̈anaovan̈a fanompoan̈a masin̈y.* 22 Eraka raha takian’ny Lalàn̈a bakà, presky raha jiaby diovin̈y amy lio. Ke izikoa tsisy lio alatsaka, tsisy familan-keloko.

23 Marin̈y ndraiky fa, taratran’ny raha an-dan̈itry an̈y tsy maintsy diovin̈y baka amy lion’ny biby, fa raha an-dan̈itry an̈y ndraiky tsy maintsy diovin̈y baka amy sôron̈o mbala tsara lavitry tozay sôrono biby. 24 Kristy tsy nidriky tamy Farany Masin̈y tan̈atin’ny tran̈olay niasain’ny tan̈an’olo, fa izy nidriky tamin’ny araiky ten̈a izy, tsy aia zen̈y fa an-dan̈itry an̈y. Ke izy ziô efa an-dan̈itry an̈y miangavy nintsika man̈oloan̈a Zan̈ahary. 25 Isaka taon̈o irô mpisôron̈obe aby io nidriky tamy Farany Masin̈y tao nitondra lion’ny biby fa tsy liondrô tômpiny, fa Kristy ndraiky nan̈ano sôron̈o ain̈inany ary indraiky fo. 26 Izikoa tsy zen̈y bakà, rango nan̈oren̈ana donia ty, izy tsy maintsy nijaly matetiky. Fa ziôty ndraiky, an̈atin’ny fotoan̈a ifaran̈an’ny donia ty,* izy navy han̈ano sôron̈o ain̈inany, indraiky fo, han̈adosoan̈a fahotan̈a. 27 Indraiky fo olo maty, baka iô izy hitsarain̈a. 28 Indraiky fo koa Kristy nan̈ano sôron̈o ain̈inany han̈adosoan̈a fahotan̈a.* Aviô lera izy avy fan̈indroeny, efa tsy handeha han̈adoso fahotan̈a eky antony haviany fa handeha han̈avotro lan̈iany olo miambin̈y izy.