Taratasy voanalohany nisoratin’i Petera
5 Zaho koa mba anti-pan̈ahy, aviô zaho vavolombelon̈on’ny fijalian̈an’i Kristy sady an̈isan’olo hahazo voninahitry tsy maintsy habaribary. Ke ty raha iangaviako* irô anti-pan̈ahy* aminarô an̈y: 2 Amy maha mpiandraikitry anarô, karakaray andian’ôndrikôndriky nankin̈in’ny Zan̈ahary taminarô. Tsy tôkony forse han̈anaovanarô raha zen̈y fa an-tsitrapô, fôtony zen̈y raha tian’ny Zan̈ahary hataonarô. Baka iô tsy tôkony baka amy fitiavan̈a tombony azo baka amy raha tsy marin̈y han̈anaovanarô zen̈y, fa baka amy fazotoan̈a. 3 Anarô tsy tôkony hanjikiziky amy lovan’ny Zan̈ahary, fa tôkony ho môdely arehan’ny ôndrikôndriky jiaby. 4 Ke lera sefon’ny tsiman̈aja habaribary, anarô hahazo satroboninahitry tsy mety malazo.
5 Aviô anarô lelahy tanora, areha volan̈an’olobe.* Fa anarô jiaby ndraiky tôkony hisikiny fanetren-ten̈a* koa fa mifandray aminarô samby anarô, fôtony Zan̈ahary manohitry olo man̈ambony ten̈a, fa olo manetry ten̈a ndraiky han̈aboahany hatsaram-pan̈ahy miavaka.
6 Ke anarô mifen̈a hanetry ten̈a man̈oloan̈a Zan̈aharintsika mahery io,* amy zen̈y izy han̈amia voninahitry* anarô amy fotoan̈a nifidìny, 7 aviô apitraha* aminany raha jiaby mampiasaloha anarô, fôtony izy mikarakara anarô. 8 Anarô mila mandiniky tsara fo ndreky miambin̈y, fôtony Devoly fahavalonarô io mandehandeha karaha lion mitreron̈o sady mitady remby* in̈y. 9 Anarô mila manohitry izy, aviô mila ataonarô fatatra fo finoan̈anarô, fôtony hainarô fa rahalahinarô* man̈eran-tany an̈y mba ampijalian̈a karaha zen̈y koa. 10 Anarô koa fa baka nampijalian̈a betibetiky, Zan̈ahary foeky hankefa fampiofan̈ana anarô. Izy man̈aboaka hatsaram-pan̈ahy miavaka amy fomba isan-karazany. Izy nahavy anarô ho tafikamban̈a amy Kristy ndreky hahavy anarô hahazo voninahitry mandrakizay. Hataony raha hahavy anarô hiôrin̈y tsarabe, ndreky hatanjaka, aviô tsy ho voahozongozon̈o. 11 Izy tômpin’ny angôvo, ary izio ninany mandrakizay. Ameny.
12 Sylvano,* rahalahy araiky mafatoky, nan̈ampy zaho hanoratra taratasy* handeha aminarô ty. Izity alefako aminarô amy zen̈y anarô hahazo fankahirezan̈a ndreky hahazo toky fa Zan̈ahary nan̈aboaka hatsaram-pan̈ahy miavaka taminarô ankitin̈y. 13 Sambitsara zen̈y anarô ho araiky* a Babylony eto, tsy azôvy zen̈y fa araiky voafidy karaha anarô in̈y. Sambitsara zen̈y koa anarô ho Marka zanako. 14 Anarô mifan̈anaova ôroko am-pitiavan̈a izikoa fa mifan̈ano mbalatsara.
Irarian̈a hahazo fiadanan̈a aby anarô jiaby tafikamban̈a amy Kristy!