Taratasy Voanalohany Handeha Amindrô Korintianin̈y aby Io
6 Izikoa misy araiky aminarô manan̈a prôblemo amy rahalahiny, ho sakiny ma hitory izy amy tribinaly man̈oloan̈a olo tsy marin̈y, fa tsy man̈oloan̈a olo masin̈y? 2 Sa tsy hainarô fa olo masin̈y hitsara donia ty? Ke izikoa anarô hitsara donia ty, tsy ho vitanarô ma hitsara irô prôblemo farany madiniky aby io? 3 Tsy hainarô ma fa atsika hitsara anjely? Ke nan̈ino fo basy tsy vitanarô mamaha prôblemo madiniky amy fiainan̈a ty? 4 Ke izikoa anarô misy prôblemo mila alamin̈y amy fiainan̈a ty, nan̈ino raha aby zen̈y hindesinarô hitsarain̈a man̈oloan̈a olo tsy an̈isan’ny fiangonan̈a? 5 Mivolan̈a raha aby zen̈y zaho baka anarô ho men̈atra. Aminarô ao ma tsisy lelahy araiky misy jery ke afaka mitsara adindrô rahalahiny aby io? 6 Tsy zen̈y ndraiky raha ataondrô rahalahy aby io fa irô mifampitory amy tribinaly an̈y, sady izy amin’io man̈oloan̈a olo tsy mpino aby io!
7 Ny marin̈y aminany, efa resy kony anarô izikoa mifampitory ay! Ke tsy sitrany anarô man̈eky avoa raha tsy rariny ndreky man̈eky hambakain̈y? 8 Tsy zen̈y ndraiky fa, anarô edy ny man̈ano raha tsy rariny ndreky mamitaka, sady izy amin’io rahalahinarô lastiô an̈anaovanarô raha zen̈y!
9 Sa tsy hainarô fa olo tsy marin̈y tsy handova Fanjakan̈an’ny Zan̈ahary? Anarô aza man̈eky ho voafitaka.* Olo mpijangajanga,* mpanompo sampy, mpandiadia vady, lelahy man̈eky han̈anaovan’ny lelahy firaisan̈a, lelahy man̈ano firaisan̈a amy lelahy,* 10 mpangalatra, olo manan̈a fan̈irian̈a tsy mety afa-pô, olo mamolava, olo mpanihitihy,* baka iô olo mpandrava tsy handova Fanjakan̈an’ny Zan̈ahary. 11 Sasany taminarô efa navy karaha zen̈y taloha, kanefa anarô efa nisasàn̈a madio; anarô efa nankamasin̈iny; aviô anarô efa nambara fa marin̈y tamin’ny an̈aran̈an’i Jesosy Kristy Tômpo ndreky tamy fan̈ahin’ny Zan̈aharintsika.
12 Azoko atao aby raha jiaby, kanefa tsy raha jiaby mahatsara. Azoko atao aby raha jiaby, kanefa tsisy raha hambelako hamehy* zaho. 13 Hanin̈y natao nin’ny kibo, aviô kibo nin’ny hanin̈y, kanefa irô io samby hifoan̈an’ny Zan̈ahary. Vatan̈a tsy natao nin’ny fijangajangan̈a* fa natao nin’ny Tômpo, aviô Tômpo nin’ny vatan̈a. 14 Kanefa Zan̈ahary nanangana Tômpo, baka iô koa izy hanangana atsika amy maty baka amin’ny angôvonany.
15 Tsy hainarô ma fa vatan̈anarô io rantsambatan̈an’i Kristy? Ke rantsambatan̈an’i Kristy handeha halaiko baka iô hatambatrako amy makorely? San̈atrian’ny vava! 16 Izio ma tsy hainarô fa olo araiky koa miray* amy makorely, izy manjary vatan̈a araiky aminany? Karaha ty baka ho Zan̈ahary: “Hanjary nôfotro araiky fo irô roe.” 17 Fa zay olo tafikamban̈a amy Tômpo ndraiky mitovy jery* aminany. 18 Lifàsa fijangajangan̈a!* Fôtony ambelan̈an’ny vatan̈a aby lan̈iany fahotan̈a hafa jiaby ataon’olo, fa olo mpijangajanga ndraiky manota amy vatan̈anany tômpiny. 19 Tsy hainarô ma fa vatan̈anarô io tempolin’ny fan̈ahy masin̈y an̈atinarô ao sady nazonarô baka tamy Zan̈ahary? Baka iô koa, anarô efa tsy tômpin’ny ain̈inarô eky, 20 fôtony anarô efa voavanga.* Ke vatan̈anarô ampiasà han̈amezan̈a voninahitry Zan̈ahary.