Taratasy voanalohany handeha amindrô Tesalônianin̈y aby io
4 Rahalahy aby, efa nampianarinay anarô aby raha tôkony hataonarô baka anarô* hamparavoravo Zan̈ahary, sady zen̈y lastiô raha ataonarô. Fa amin’ny an̈aran̈an’i Jesosy Tômpo, zahay mandrisiky anarô sady miangavy anarô han̈ano zen̈y marere ndraiky koa. 2 Hainarô tsarabe bakà raha nampianarinay* anarô aby in̈y, ary irô in̈y baka amy Jesosy Tômpo.
3 Anarô tian’ny Zan̈ahary ho masin̈y ndreky hifady fijangajangan̈a.* 4 Ke anarô tsiaraikiaraiky tôkony hahay hifehy ten̈anarô, amy zen̈y zio ho masin̈y ndreky hisy hajany fo, 5 fa tsy han̈ano karaha irô olo hafa firenena tsy mahay Zan̈ahary aby io. Irô bakà tsy basin’ny tsy mahafehy fan̈irian̈andrô fo fa irô koa tsy mety afa-pô amy fan̈anaovan̈a firaisan̈a. 6 Tsisy olo tôkony han̈ano raha tsy manjary aby io amy* rahalahiny na han̈araraotro izy, fôtony hisazìn’i Jehovah lan̈iany olo man̈ano raha aby zen̈y, eraka raha efa nambaranay anarô ndreky nifeperinay mare taminarô. 7 Atsika tian’ny Zan̈ahary ho masin̈y fa tsy haloto fitondran-ten̈a. Zen̈y nahavy izy nikaiky atsika. 8 Ke lan̈iany olo tsy mijery fampitandreman̈a aby zen̈y, tsy olombelon̈o ny tsy jireny fa araiky man̈amia anarô fan̈ahy masin̈inany, tsy azôvy zen̈y fa Zan̈ahary.
9 Zahay efa tsy mila manoratra aminarô mikasiky fomba tôkony hitiavanarô irô rahalahy aby io, fôtony anarô efa ampianarin’ny Zan̈ahary mifankatia. 10 Efa zen̈y tsarabe raha ataonarô amindrô rahalahy jiaby a Makedonia an̈y. Fa zahay mbala mampirisiky anarô, rahalahy aby: Ampitombosa fo fitiavanarô irô. 11 Aviô eraka raha efa nampianarinay anarô, mifen̈a ho tia filaminan̈a, aza midriky* amy fiainan̈an’olo, baka iô miasà amin’ny angôvonarô. 12 Amy zen̈y irô olo ambelan̈a* aby io koa fa mahita raha ataonarô zen̈y, irô han̈aja anarô aviô ho azonarô aby raha ilainarô.
13 Sôsoko zen̈y, tianay ho hainarô tsarabe, rahalahy aby, raha momba irô olo efa naty aby in̈y, beky anarô tsy halahelo be loatra karaha irô olo sasany tsy manan̈a fan̈antinan̈a aby io. 14 Izikoa bakà atsika mino fa Jesosy naty aviô natsangana, mino koa atsika fa Zan̈ahary hanangana mpianatran’i Jesosy efa naty baka irô hiaraka amy Jesosy. 15 Fôtony, eraka raha nambaran’i* Jehovah, irô olo efa naty aby in̈y antsendriky hatsangana, zay vo atsika lay mbala velon̈o amy fotoan̈a himpodianan’ny Tômpo. 16 Tômpo foeky bakà hijotso baka an-dan̈itry; izy handronton̈o mare sady han̈amia beko ke feonany ho ren̈y, ia feonany amy maha arkanjely izy; izy hampiasa trompetin’ny Zan̈ahary. Ke irô mpan̈ara-dia Kristy efa naty aby in̈y hitsangana voanalohany. 17 Afaran’izen̈y, atsika lay velon̈o ke mbala iô hindesin̈y an̈atin’ny rôndro, amy zen̈y atsika hiaraka amindrô ndreky hifanôjy amy Tômpo amy lan̈itry arỳ, sady hiaraka amy Tômpo fo. 18 Ke aza vôly mampiasa volan̈a aby io hifankahirezan̈a.