Taratasy voanalohany nisoratin’i Jaona
2 Zanako tiako aby, manoratra raha aby zen̈y aminarô zaho amy zen̈y anarô tsy hanota. Fa izikoa misy olo manota, atsika manan̈a mpan̈ampy amy Babantsika an̈y, tsy azôvy zen̈y fa Jesosy Kristy, araiky marin̈y in̈y. 2 Izy sôron̈o fampihavanan̈a nohon’ny* fahotan̈antsika, ary tsy nintsika fo fa nin’olo jiaby amy donia ty koa. 3 Baka iô, izikoa atsika tsy vôly man̈araka didinany, ho hita baka amy zen̈y fa atsika mahay izy. 4 Mpavandy lan̈iany olo mivolan̈a: “Zaho efa mahay izy”, kanefa izy tsy man̈araka didinany. Ia, olo karaha zen̈y tsy mivolan̈a ny marin̈y.* 5 Fa izikoa olo araiky man̈araka volan̈anany,* ho hita baka amy zen̈y fa izy tia Zan̈ahary ankitin̈y. Zen̈y ahaizantsika fa atsika tafikamban̈a aminany. 6 Lan̈iany olo mivolan̈a fa izy tafikamban̈a aminany fo, izy tsy maintsy mangala tahaka fomba fiainan̈an’i Jesosy fo koa.*
7 Rahalahy ndreky ranabavy tiako aby, raha soratiko aminarô ty tsy didy vaovao fa didy efa ela, araiky nazonarô rango tamy voanalohany in̈y. Tsy ino didy efa ela io fa volan̈a efa ren̈inarô. 8 Zaho manoratra didy vaovao aminarô ndraiky koa, tsy ino izio fa didy narehan’i Jesosy sady narehanarô koa. Efa mahailôso bakà hiziky, aviô hazavan̈a ten̈a izy io efa mangilangilatra.
9 Lan̈iany olo mivolan̈a fa izy an̈atin’ny hazavan̈a kanefa izy mankahala rahalahiny, izy mbala an̈atin’ny hiziky fo. 10 Midôko an̈atin’ny hazavan̈a lan̈iany olo tia rahalahiny, baka iô tsisy raha hahavita handavo* izy. 11 Fa lan̈iany olo mankahala rahalahiny ndraiky, an̈atin’ny hiziky sady mandeha an̈atin’ny hiziky. Izy raha mandeha be fo fa, tsy hainy aby aia tany imboany, fôtony hiziky io nampagila masonany.
12 Zanako tiako aby, zaho manoratra aminarô, fôtony Zan̈ahary efa nan̈ambela hadisovan̈anarô nohon’ny an̈aran̈an’i Jesosy. 13 Zaho manoratra aminarô baba, fôtony anarô efa nanjary nahay izy,* tsy azôvy zen̈y fa araiky nisy rango tamy voanalohany tan̈y in̈y. Zaho manoratra aminarô tanora, fôtony anarô efa naharesy araiky ratsy in̈y.* Zaho manoratra aminarô tsaiky, fôtony anarô efa mahay Zan̈ahary Babantsika. 14 Zaho manoratra aminarô baba, fôtony anarô efa nanjary nahay izy,* tsy azôvy zen̈y fa araiky nisy rango tamy voanalohany tan̈y in̈y. Zaho manoratra aminarô tanora, fôtony anarô matanjaka sady mino volan̈an’ny Zan̈ahary, baka iô anarô efa naharesy araiky ratsy in̈y.*
15 Aza tia donia ty, na raha amy donia ty. Izikoa misy olo tia donia ty, tsy an̈atin’ny fônany ao fitiavan̈a Baba. 16 Raha jiaby amy donia ty bakà, tsy ino zen̈y fa fan̈irian̈an’ny nôfotro ndreky fan̈irian̈an’ny maso, baka iô fan̈anaovan̈a vantara* raha anan̈ana, tsy baka amy Baba fa baka amy donia ty. 17 Mielan̈a fo donia ty ndreky fan̈irian̈anany, fa lan̈iany olo man̈ano sitrapôn’ny Zan̈ahary ndraiky ho velon̈o* mandrakizay.
18 Zanako tiako aby, ziôty lera farany. Eraka raha efa ren̈inarô, ho avy antikristy.* Ary maro antikristy efa miboaka amy ziôty, ke zen̈y ahaizantsika fa ziôty lera farany. 19 Irô efa tsy namantsika,* fôtony irô niala atsika. Irô koa namantsika, ôtrizay irô niaraka tamintsika fo. Kanefa irô niala atsika, amy zen̈y ho hita fa tsy olo jiaby zay namantsika aby. 20 Anarô nisôrin’ny Zan̈ahary fan̈ahy masin̈y, ary izy lastiô masin̈y. Baka iô, mahay ny marin̈y aby anarô jiaby io. 21 Tsy nohon’ny anarô tsy mahay ny marin̈y antony mahavy zaho manoratra aminarô, fa nohon’ny anarô mahay ny marin̈y, aviô nohon’ny fahaizanarô fa tsisy vandy foeky raha momba* fahamarin̈ana zen̈y.
22 Azôvy koa ma ny mpavandy izikoa tsy olo mivolan̈a fa Jesosy tsy Kristy? Zay olo manohitry Baba ndreky manohitry Zanaka, izy antikristy. 23 Lan̈iany olo tsy man̈eky Zanaka, izy tsy ankasitrahin’ny Baba; fa lan̈iany olo man̈ambara fa mino Zanaka ndraiky, izy ankasitrahin’ny Baba. 24 Fa anarô ndraiky, aza adosonarô an̈atin’ny fônarô ao foeky raha efa ren̈inarô rango tamy voanalohany in̈y. Izikoa bakà tsy adosonarô an̈atin’ny fônarô ao foeky raha efa ren̈inarô rango tamy voanalohany in̈y, anarô ho tafikamban̈a amy Zanaka ndreky ho tafikamban̈a amy Baba fo. 25 Tsy zen̈y fo fa, ty raha efa nampan̈antin̈ainy atsika: Fiainan̈a mandrakizay.
26 Manoratra raha aby zen̈y aminarô zaho, fôtony misy olo mitady hamitaka anarô. 27 Fa anarô ndraiky nisôrin̈y fan̈ahy masin̈y, aviô izio an̈atinarô ao fo, ke anarô efa tsy mila olo eky hampianatra anarô. Zan̈ahary mampiasa fan̈ahy masin̈inany hampianaran̈a anarô raha jiaby, ary raha zen̈y marin̈y sady tsisy vandy. Ke anarô mifen̈a fo ho tafikamban̈a aminany, eraka raha nampianarin’ny fan̈ahy masin̈y io anarô. 28 Ke karaha ty izy, zanako tiako aby: Anarô mifen̈a fo ho tafikamban̈a aminany, amy zen̈y lera izy habaribary, atsika hasaky hivolan̈a, aviô atsika tsy hiala izy, ke tsy ho voabaraka foeky atsika amy fotoan̈a himpodianany. 29 Izikoa hainarô fa marin̈y izy, dikan’izen̈y hainarô koa fa naterany aby lan̈iany olo man̈ano ny marin̈y.