Taratasy voanalohany nisoratin’i Petera
3 Karaha zen̈y koa fa, anarô man̈angy manambady mila man̈eky vadinarô, amy zen̈y izikoa misy amindrô io tsy man̈araka volan̈an’ny Zan̈ahary, irô ndray tsy voataon̈onarô amy raha volan̈inarô, irô mety ho voataon̈onarô amy fitondran-ten̈anarô. 2 Hitandrô bakà fa anarô madio fitondran-ten̈a sady man̈aja irô mare. 3 Sanjinarô tsy tôkony ho raha hita ambelan̈a fo, karaha ataon’ny taly, ravaka, na lamba tsara, 4 fa izio tôkony man̈aboaka ny maha anarô anarô an̈atin’ny fônarô an̈y; ke tôkony ho hita fo fa anarô olo kalma ndreky tsy sarôtin-draha.* Toetry aby zen̈y ten̈a valera amy Zan̈ahary* sady miran̈a sanjy tsara ndreky tsy mety robaka. 5 Karaha zen̈y sanjindrô man̈angy mino Zan̈ahary salakady tsy nivadiky* taloha tan̈y aby in̈y. Irô nan̈eky fahifan̈an’ny vadindrô. 6 Ohatra ziô, Sarah nan̈araka volan̈an’i Abrahama, ndreky nikaiky izy tômpo. Zanakan’i Sarah anarô izikoa anarô tsy vôly man̈ano ny tsara sady tsy man̈eky ho resin’ny tahotro.
7 Karaha zen̈y koa fa, anarô lelahy manambady mila miaraka mipetraka amy vadinarô fo sady mifen̈y hahatakatra fihetseham-pôndrô. Irô io bakà valera sady karaha vazy mora vaky in̈y, ke anarô tôkony han̈amia voninahitry irô* sady hikarakara irô tsarabe, amy zen̈y vavakanarô hitandrin̈esan’ny Zan̈ahary.* Irô io koa bakà mba nan̈aboahan̈a hatsaram-pan̈ahy miavaka ke handova fiainan̈a karaha anarô.
8 Farany, anarô jiaby mila mifen̈y hiray sain̈y, hahatsapa jalin’olo,* hifankatia mira olo kibo araiky, hite-pô olo, aviô hanetry ten̈a. 9 Aza mamaly ratsy amy ratsy, na manihitihy* olo manihitihy anarô. Sitrany anarô man̈ano ny tsara amindrô, fôtony zen̈y antony nikahian̈a anarô, amy zen̈y anarô hahazo* hatsaran̈a maro.
10 Fôtony “lan̈iany olo tia fahin̈ana ndreky tiho sambatra tsy maintsy mitandrin̈y tsao lelanany hivolan̈a raha ratsy, aviô tsao son̈inany hamitaka olo. 11 Izy tsy maintsy miala amy ratsy ke man̈ano ny tsara, baka iô izy tsy maintsy man̈ano raha hisian’ny fihavanan̈a fo. 12 Fôtony mason’i Jehovah mizaha olo marin̈y, aviô sofin̈inany mitandren̈y fiangavian̈andrô. Halan’i Jehovah* olo man̈ano raha ratsy.”
13 Ia, azôvy ma han̈isy ratsy anarô izikoa anarô mafana fô man̈ano ny tsara? 14 Ary ndray anarô mety hijaly fôtony anarô man̈ano ny marin̈y, anarô sambatra. Anarô aza mavozo raha avozoandrô, baka iô aza miasaloha.* 15 Ikia* an̈atin’ny fônarô ao fa Kristy io Tômpo, ary izy man̈eva hamezan̈a voninahitry. Anarô mila vôn̈ono fo han̈ambara fiaraovan-ten̈anarô man̈oloan̈a zay olo man̈ontany antony mahavy anarô matoky raha antin̈ainarô. Fa anarô fo mila tsara fan̈ahy ndreky man̈aja olo mare izikoa fa man̈ano zen̈y.
16 Anarô mpan̈ara-dia Kristy, ke anarô mifen̈a fo ho tsara fitondran-ten̈a, baka anarô hanan̈a feon’ny fieritreretan̈a madio. Izikoa anarô man̈ano zen̈y, irô olo mankaratsy anarô aby io ho men̈atra* mahita raha tsara ataonarô. 17 Tsaratsara aminany bakà anarô mijaly fôtony anarô man̈ano ny tsara, izikoa sitrapôn’ny Zan̈ahary han̈ambela raha zen̈y hisy, tozay anarô mijaly fôtony anarô man̈ano raha ratsy. 18 Kristy bakà naty indraiky fo misy han̈adosoan̈a fahotan̈a. Ia, olo marin̈y* ho solon’olo tsy marin̈y, baka anarô hampihavan̈iny* amy Zan̈ahary. Nôfotro ndreky lio izy tamin’izy nivonen̈a, fa fan̈ahy ndraiky izy izikoa fa nivilômin̈y. 19 Ia, izy nahazo vatan̈a ara-pan̈ahy, ke izy nandeha nan̈ambara didim-pitsaran̈a tamindrô anjely nigadra aby in̈y. 20 Irô io anjely tsy nan̈araka volan̈an’ny Zan̈ahary tamin’ny andran’i Noa, tamy Zan̈ahary nahadin̈y* niambin̈y Noa niasa sambofiara in̈y. Vitsy fo olo voavonjy tamy fotoan̈a nisian’ny safodrano* in̈y, ia, olo valo fo.
21 Raha nandalo tamin’andra aby zen̈y mety ampiran̈iny amy batisa, fôtony izio koa mba man̈avotro anarô amy ziôty. Ndray zen̈y, batisa io tsy man̈adoso fahalotoan̈an’ny nôfotro, fa natao hangatahan̈a feon’ny fieritreretan̈a madio amy Zan̈ahary. Anarô bakà mino fa Jesosy Kristy efa natsangana tamy maty. 22 Izy nandeha an-dan̈itry, ary izy ziô ankavanan̈an’ny Zan̈ahary. Ke na anjely, na fahifan̈a, na angôvo, samy nirahan̈a nan̈eky fahifan̈anany aby.