Taratasy voanalohany nisoratin’i Jaona

1 Zahay manoratra aminarô momba araiky efa nisy rango tamy voanalohany, tsy azôvy zen̈y fa araiky mitondra volan̈a man̈amia fiainan̈a. Volan̈a io efa ren̈inay aviô efa hitan’ny masonay, baka iô efa nidinihinay tsarabe ndreky nitsapain’ny tan̈ananay. 2 Natao hainay ndreky nazavain̈a taminay tsarabe raha momba fiainan̈a tsisy farany amezan’ny Zan̈ahary Babantsika io. Zahay nitory momba zio sady nan̈ambara zio taminarô. 3 Ambaranay anarô raha hitanay ndreky raha ren̈inay, amy zen̈y anarô ho tafikamban̈a* aminay karaha ataontsika tafikamban̈a amy Zan̈ahary Babantsika ndreky amy Jesosy Kristy Zanany. 4 Manoratra raha aby zen̈y aminarô zahay, amy zen̈y atsika ho ravoravo mare.*

5 Ty hafatra ren̈inay taminany ke ambaranay anarô: Zan̈ahary io hazavan̈a, aviô tsisy hiziky foeky aminany. 6 Izikoa atsika mivolan̈a: “Atsika tafikamban̈a aminany”, kanefa atsika mbala mandeha an̈atin’ny hiziky fo, atsika mavandy salakady tsy miain̈y mifan̈araka amy fahamarin̈ana. 7 Fa izikoa ndraiky atsika mandeha an̈atin’ny hazavan̈a, fôtony izy an̈atin’ny hazavan̈a, ho tafikamban̈a tsarabe atsika jiaby. Aviô, lion’i Jesosy Zanany man̈adio atsika ho afaka amy fahotan̈a jiaby.

8 Atsika koa mivolan̈a fa “atsika tsy mpanota”, atsika mamitaka ain̈intsika tômpiny, baka iô atsika tsy mino fampianaran̈a marin̈y. 9 Fa izikoa ndraiky atsika mamaosa fahotan̈antsika, Zan̈ahary han̈ambela fahotan̈antsika ndreky han̈adio atsika ho afaka amy tsy fahamarin̈ana jiaby. Izy bakà marin̈y ndreky tsy mivadiky amy raha efa nivolan̈iny. 10 Izikoa atsika mivolan̈a fa “atsika tsiary nanota”, atsika man̈ano izy mpavandy, aviô volan̈anany tsy an̈atin’ny fôntsika ao.