Taratasy voanalohany nisoratin’i Jaona
5 Naterakan’ny Zan̈ahary aby lan̈iany olo mino fa Jesosy io Kristy. Aviô lan̈iany olo tia Zan̈ahary Babantsika tia irô olo naterany aby io koa. 2 Ty ahaizantsika fa atsika tia irô zanakan’ny Zan̈ahary aby io: Atsika tia Zan̈ahary aviô atsika man̈araka didinany. 3 Izikoa bakà atsika tia Zan̈ahary, atsika mitandrin̈y didinany; ary didinany tsy sarotro arehan̈a.* 4 Mandresy donia ty lan̈iany olo naterakan’ny Zan̈ahary. Ary baka amy finoan̈a anan̈antsika hahavitantsika mandresy donia ty.
5 Azôvy ma mahavita mandresy donia ty? Tsy lan̈iany olo mino fa Jesosy io Zanakan’ny Zan̈ahary? 6 Jesosy Kristy navy baka tamy rano ndreky lio. Tsy baka tamy rano fo naviany fa baka tamy rano ndreky lio. Ary fan̈ahy masin̈y lastiô mitsangana vavolombelon̈o man̈ambara raha zen̈y, fôtony fan̈ahy masin̈y io man̈ambara ny marin̈y.* 7 Raha telo aby ty man̈ambara ny marin̈y momba Jesosy: 8 Fan̈ahy masin̈y ndreky rano aviô lio. Irô raha telo aby io mifan̈araka tsarabe.
9 Atsika man̈eky raha ambaran’olombelon̈o. Ke nan̈ino fo atsika tsy man̈eky raha ambaran’ny Zan̈ahary kanefa izio mbala beben’ny raha ambaran’olombelon̈o? Tsy ino raha ambaran’ny Zan̈ahary io fa raha momba Zanany. 10 Lan̈iany olo mino Zanakan’ny Zan̈ahary, izy mino raha ambaran’ny Zan̈ahary.* Izikoa olo araiky tsy mino Zan̈ahary, izy man̈ano Zan̈ahary mavandy fôtony izy tsy mino raha nambaran’ny Zan̈ahary momba Zanany. 11 Ty raha nambaran’ny Zan̈ahary: Izy nan̈amia atsika fiainan̈a mandrakizay, ary baka amy Zanany azahoantsika fiainan̈a zen̈y. 12 Lan̈iany olo man̈eky Zanaka io hahazo fiainan̈a mandrakizay; fa lan̈iany olo tsy man̈eky Zanakan’ny Zan̈ahary ndraiky, izy tsy hahazo fiainan̈a io.
13 Manoratra raha aby zen̈y aminarô zaho, amy zen̈y ho hainarô fa anarô hahazo fiainan̈a mandrakizay, fôtony anarô mino an̈aran̈an’ny Zanakan’ny Zan̈ahary. 14 Ty raha atokisantsika momba Zan̈ahary: Izikoa atsika mangataka raha* aminany, ke raha angatahantsika io mifan̈araka amy sitrapônany, izy mitandren̈y atsika. 15 Ia, matoky atsika fa ho azontsika aby raha angatahantsika aminany, ndray ino zen̈y ndray ino, fôtony izy mitandren̈y atsika.
16 Izikoa misy olo nahita rahalahiny nan̈ano fahotan̈a tsy mahafaty, izy tôkony hivavaka, amy zen̈y Zan̈ahary han̈ambela fahotan̈an’ny rahalahiny io. Ia, zen̈y ataova izikoa misy olo nan̈ano fahotan̈a tsy mahafaty. Misy koa fahotan̈a mahafaty. Kanefa, zaho tsy man̈iraka anarô hivavaka nin’olo nan̈ano fahotan̈a karaha zen̈y. 17 Fahotan̈a aby fan̈anaovan̈a raha tsy marin̈y, kanefa tsy kila fahotan̈a jiaby zay mahafaty aby.
18 Haintsika fa tsy zatra manota lan̈iany olo naterakan’ny Zan̈ahary,* fa Zanakan’ny Zan̈ahary* hiaro izy, ary tsy hanan̈a fahifan̈a aminany* foeky araiky ratsy in̈y.* 19 Haintsika fa atsika baka amy Zan̈ahary, fa donia misy atsika ty ndraiky ambany fahifan̈an’ny araiky ratsy in̈y.* 20 Aviô koa, haintsika fa Zanakan’ny Zan̈ahary io navy, ke izy nan̈amia atsika fahiratan-tsain̈y,* amy zen̈y ho haintsika tsarabe araiky ten̈a Zan̈ahary. Ia, baka amy Jesosy Kristy Zanany mahavy atsika tafikamban̈a aminany, tsy azôvy zen̈y fa araiky ten̈a Zan̈ahary sady mpan̈amia fiainan̈a mandrakizay. 21 Zanako tiako aby, anarô aza mibidabida raha momba fanompoan-tsampy foeky.