Tantara 48

Gibeonita Fetsy

MARO tanàna man̈odidin̈y Kanana vôn̈ono hiady amin’Israely. An̈atin’ny jerin-drô, irô tsy maintsy mandresy. Kanefa, olo sasany nipetraka tamy tanàna marindriny Gibeona tsy nieritreritry karaha zen̈y. Irô nahatoky fa Zan̈ahary ankitin̈y man̈ampy Israelita aby io, ke irô tsy nitady ady amy Zan̈ahary. Hainao ino raha nataon’ny Gibeonita aby io?

Irô nan̈ano jery araiky fa han̈ano sarisary olo boaka lavitry be. Sasany tamin-drô nisikin̈y bôrobôroko lamba, ndreky kiraro efa robaka. Borikin-drô koa nampindesin-drô lasàka fa kay, baka iô irô nitaondra môfo fa naiky. Irô amy zay nandeha tamy Josoa tan̈y. Volan̈in-drô: ‘Zahay io boaka lavitry, fa zahay navy, fôtony efa ren̈inay raha jiaby mikasiky Zan̈aharinarô Jehovah. Ren̈inay raha jiaby nataony ta Ejipta. Ke sefonay nan̈iraka zahay hitaondra hanin̈y helihely hahaninay an-dalan̈a, hivolan̈a aminarô: “Zahay vôn̈ono han̈ano andevonarô. Amia toky zahay fa anarô tsy hiady aminay.” Hitanarô fo lamba sikininay nanjary bôrobôroko io, môfonay jiaby naiky takatra dia.’

Josoa ndreky mpitariky sasany tiô nino volan̈a Gibeonita aby io. Ke irô nan̈ano vava fa tsy hiady amin-drô. Telo andra tafaran’izin̈y, irô nahay fa kaiky Gibeonita aby ty nipetraka marikitry tiô fo.

Josoa nan̈ontany irô: ‘Nan̈ino ma anarô nivolan̈a taminay fa boaka lavitry?’

Gibeonita aby in̈y namaly: “Fôtony ren̈inay fa Zan̈aharinarô Jehovah nampan̈anten̈a fa han̈amia anarô tany jiaby amy Kanana ty. Ke zahay navozo tsao hivonenarô.’ Israelita aby io nitana vava nataon-drô, ke tsy namono Gibeonita, fa nan̈ano irô andevo.

Ampanjakan’i Jerosalema neloko, koa fa naharen̈y fa Gibeonita aby io nifankahazo tamin’Israely. Izy nikaiky ampanjaka efatra hafa. Volan̈iny: ‘Mavia anarô. Tatahia zaho hiady amy Gibeona.’ Zen̈y amy zay raha nataon-drô. Nahay edy Gibeonita aby io nikamarady tamin’Israely, fôtony ampanjaka dimy aby io iziô hiady amin-drô? Ho hitatsika zen̈y amy man̈araka.

Josoa 9:1-27; 10:1-5.