TOKO 25

Akory Hialako amy Fahazaran̈a Misoma Raha Mahalelahy Zaho?

Tamy zaho valo taon̈o, zaho nanomboko tia nisoma raha mahalelahy zaho. Fa tafara tatỳ loso haiko akory fahitany Zan̈ahary izio. Ke nalahelo mare zaho isaka zaho resy. Ho zaho tan̈aty jeriko tan̈y: “Zan̈ahary donko fa tsy tia zaho eky ay!”​—Luiz.

IZIKOA fa avy amy taon̈ony tanora iô, maresaka mare fan̈irian̈a tihan̈ano firaisan̈a. Baka amy zen̈y mety hahavy anao hanjary hanan̈a fahazaran̈a misoma raha mahalelahy na mahaman̈angy anao.a Maro ziô io olo mety hivolan̈a fa zen̈y tsy man̈ino. “Anao tsy raha man̈ano raha ratsy aminolo izikoa man̈ano izio”, ho iro. Kanefa atsika tsy han̈ano raha karaha zen̈y. Apostoly Paoly nivolan̈a ‘vonia rantsambatan̈anaro, tsy ino zen̈y fa fan̈irian̈a mare tihan̈ano firaisan̈a.’ (Kolosianina 3:5) Olo araiky misoma raha mahalelahy na mahaman̈angy izy tsy mamono fan̈irian̈anany tihan̈ano firaisan̈a, fa mahaimampitombo izio fo. Avio diniha koa baka ty:

● Fahazaran̈a misoma raha mahalelahy na mahaman̈angy io mahavy olo araiky manjary tia ten̈a. Jerinany jiaby baka amy raha azahoany fahafinaretan̈a fo.

● Lelahy araiky izikoa zatra misoma raha mahalelahy izy, loso karaha fitaovan̈a azahoan̈a fahafinaretan̈a fo fahitavany man̈angy.

● Lera izy manambady afara an̈y, manjary samy tsisy ho afapo iro fivadiany izikoa iro fa man̈ano firaisan̈a, fotony izy efa nanjary tia ten̈a loatra.

Ke amy fotoan̈any anao tihan̈ano firaisan̈a in̈y, fiheza mare ain̈inao fa aza misoma raha mahalelahy na mahaman̈angy anao. (1 Tesalonianina 4:4, 5) Baka hahavitanao zen̈y, Baiboly mandrisiky anao mba hiala amy zay raha mety hampisy fakampan̈ahy aminao. (Ohabolana 5:8, 9) Fa karakory ndraiky izikoa fahazaran̈a io efa man̈andevo anao? Anao mety efa niezaka ho voly, kanefa mbala tafimpody amizio fo. Ke anao mety hivolan̈a: ‘Zaho ty efa tsy avotro ay.’ Mety hieritreritry koa anao fa tsy ho vitanao foeky han̈araka fitsipikiny Zan̈ahary. Karaha zen̈y raha tsapany Pedro. Ho izy: “Isaka zaho resy, zaho nanen̈iny mare, ke ho zaho: ‘Zan̈ahary efa tsy hamindra fô aminaka eky.’ Zaho nanjary tsy nasaky nivavaka.”

Izikoa karaha zen̈y koa raha tsapanao, aza rivan̈a fa anao mbala avotro. Maro tanora ndreky olobe nahavita nandresy fahazaran̈a ratsy io. Ke raha zen̈y koa anao. Io vitanao!

Ino han̈ampy anao tsy han̈ameloten̈a?

Karaha efa hitantsika tio, mety han̈ameloten̈a mare olo araiky izikoa zatra misoma raha mahalelahy na mahaman̈angy izy. Tsara izikoa izy malahelo mare “erakany sitrapony Zan̈ahary.” (2 Korintianina 7:11) Alahelonany zen̈y baka handrisiky izy hiova. Fa ratsy ndraiky izikoa efa dila loatra alahelonany, fotony raha zen̈y mety hampakivy izy ke hahavy izy tsy harisiky hifen̈y eky.​—Ohabolana 24:10.

Ke aza mieritreritry fa anao efa tsy avotro eky. Fisoman̈a raha mahalelahy na mahaman̈angy io an̈isany fahalotoan̈a. Izio mahavy anao loso ‘andevony fan̈irian̈a ndreky fahafinaretan̈a samy amy karazany’, baka io mety hampiova toetsain̈inao ho ratsy. (Titosy 3:3) Fa ndray zen̈y, izio tsy fahotan̈a maventy karaha fijangajangan̈a. (Joda 7) Izikoa anao manan̈a fahazaran̈a ratsy io, aza mieritreritry fa efa tsy hambelany Zan̈ahary eky hadisovan̈anao. Mifen̈a fo hifehy ten̈a, baka io aza man̈eky resy zen̈y foeky!

Marin̈y ndraiky fa anao mety ho kivy mare izikoa sendra tsy mahafehy ten̈a. Fa amy fotoan̈a zen̈y, tsarova volan̈a aminy Ohabolana 24:16 ty: “Mety ho lavo impito aby olo marin̈y, fa ho tafianko fo izy; fa olo ratsy fan̈ahy ndraiky higorosy baka amy raha ratsy havoa izy.” Nata anao resy ndraikindraiky, zen̈y tsy midika fa anao an̈isanolo “ratsy fan̈ahy.” Ke aza rivan̈a foeky. Diniha ino raha nahavy izio, baka io mifen̈a baka tsy han̈ampody izy in̈y eky aminy afara.

Mangalà fotoan̈a hisaintsain̈ana momba fitiavany Zan̈ahary ndreky famindrapônany. Davida koa efa navy nisy fotoan̈a nan̈ano fahotan̈a. Karaha ty ho izy: “Karaha ataony baba mahinakinaka zanany in̈y ataony Jehovah mahinakinaka olo matahotro izy. Fotony hainy tsarabe raha niasany atsika, ke tsaroany fa atsika io fotaka.” (Salamo 103:13, 14) Hainy Jehovah fa atsika io tsy lavorary, ke izy “von̈ono han̈ambela hadisovan̈antsika.” (Salamo 86:5) Fa ndray zen̈y, atsika koa mba tiany mifen̈y miova. Ke ino raha han̈ampy anao amy zen̈y?

Diniha fangalan̈a diandian̈a ataonao. Mampiaho fan̈irian̈anao tihan̈ano firaisan̈a ma raha zahanao amy tele na aminy Internet? Karaha ty vavaka nataony pan̈ano salamo: “Aza ambela hizaha raha tsisy dikany masonaka.”b​—Salamo 119:37.

Raha tsara fo iritrireta. Ty torohevitry namezany Willliam: “Alohany handeha hoandry, mamakia raha baka amy Baiboly. Tsara izikoa mba raha arapan̈ahy raha niditry farany an̈aty jerinten̈a ao.”​—Filipianina 4:8.

Ambarà olo atokisanao raha io. Mety ho sarotro aminao handeha hikoran̈a izio aminolo araiky, fotony anao mety men̈atra. Kanefa fan̈anaovanao raha zen̈y han̈ampy anao hahavita handresy fahazaran̈a ratsy io. Karaha zen̈y nataony Davida. Ho izy: “Zaho nikoran̈a tamy papako. Tsisy andra han̈adin̈asako raha nivolan̈iny. Tokiky hely izy salakady nivolan̈a moramora karaha ty: ‘Ten̈a mamparavoravo zaho anao nikoran̈a raha io taminaka.’ Hainy fa ten̈a tsy nora taminaka hikoran̈a izio taminany. Nampisy korazy zaho mare raha nivolan̈iny in̈y, ke zaho nahaitihifen̈y fo.

“Baka io zaho nan̈aboahany papako andininteny nan̈ampy zaho hahita fa kaiky zaho tsy olo ratsy jery. Avio izy koa nan̈aboaka andininteny hafa nan̈ampy zaho hahita fa ten̈a ratsy raha ataoko io. ‘Mifen̈a fo miady’ antsendriky an̈atiny fotoan̈a vitsivitsy, ho izy taminaka, fa avio atsika mimpody mikoran̈a ndraiky. Izy nivolan̈a fa zaho tsy tokony ho kivy izikoa zaho sendra lavo, fa zaho fo tokony hiezaka hifehy ten̈a elaela amy man̈araka. Nakiry izy zaho tsy natity vava! Ziô zaho mba misy man̈ampy ke!”c

[Lamariky amy pazy ambany]

ANDININY TSARA ALAIN̈A ONON̈O

“Ke ialà lavitry fan̈irian̈a pahazo tanora, fa tadiava ny marin̈y, finoan̈a, fitiavan̈a, fihavan̈ana, miaraka aminolo mikaiky Tompo amy fô madio.”​—2 Timoty 2:22.

SOSOKEVITRY

Mivavaha alohany anao mbala tsy miady mare amy fan̈irian̈anao io. Mangataha “angovo fan̈ampiny” amy Jehovah.​—2 Korintianina 4:7.

ASA MBA HAINAO...

Anao koa ten̈a tapakevitry hifehy ten̈a, ho vitanao tsy hisoma raha mahalelahy na mahaman̈angy anao, nata tsisy olo mahita anao. Fa anao koa mbala tsy ten̈a tapakevitry, io tsy vitanao.

RAHA HANDEHA ATAOKO!

Ty raha tiako hatao baka zaho tsy hieritreritry raha ratsy: ․․․․․

Ty raha hataoko zaho koa fa tihisoma raha mahalelahy zaho: ․․․․․

Ty raha mba tiako han̈ontanian̈a ry olobeko momba raha nikoran̈iny toko ty: ․․․․․

AKORY HEVITRINAO?

● Nan̈ino ten̈a ilain̈y mahatsiaro fa Jehovah “von̈ono han̈ambela hadisovan̈a?”​—Salamo 86:5.

● Atsika nataony Zan̈ahary manan̈a fan̈irian̈a han̈ano firaisan̈a. Ke izikoa izy man̈iraka anao hifehy ten̈a, ino dikanizen̈y raha atokisany fa ho vitanao?

[Volan̈a nalain̈y]

Rango zaho voly tsy nan̈ano izin̈y eky, loso nilamin̈y eritreritrinaka. Haiko baka fa Jehovah efa tsy meloko aminaka eky. Tsisy raha atakaloko zen̈y!’’​—Sarah

[Sary]

Olo araiky milomoay koa lavo, zen̈y tsy mivolan̈a fa tsisy dikany izy nifen̈y ela jiaby in̈y. Karaha zen̈y koa, izikoa anao sendra tsy mahafehy ten̈a, aza mieritreritry fa tsisy varany anao nifen̈y in̈y