Resiny Gideona Midianita aby Io

Nimpody nanompo zan̈ahary hafa ndraiky iro Israelita aby io tafara tatỳ. Iro niala Jehovah. Tan̈atiny fito taon̈o, Midianita aby io nangalatra bibindro Israelita aby io, ndreky nandrobaka tsabondro. Ke voatery nisitriky tan̈aty lavabato ndreky tamy bongo iro Israelita aby io. Iro nangataka vonjy tamy Jehovah. Jehovah nandefa anjely araiky tamy Gideona. Anjely io nivolan̈a: ‘Anao ten̈a matanjaka, ke anao nifidiny Jehovah hamonjy Israelita.’ Ho Gideona: ‘Zaho olo tsisy dikany ty mba hahavita zen̈y?’

Akory nahaizany Gideona fa nifidy izy Jehovah? Nasiany Gideona volovolony ondrikondriky tamy tany, ke hoizy tamy Jehovah: ‘Izikoa len̈iny vonotro volovolony ondrikondriky ty amaray marandrain̈y, fa tany ndraiky maiky, haiko fa anao nifidy zaho.’ Koa fa kiaka andra, volovolony ondrikondriky io leny nikotsakotsakotsa fa tany ndraiky naiky! Gideona mbala nimpody nangataka, alo koa volovolony ondrikondriky io atao maiky, fa tany atao leny. Zen̈y ankitin̈y raha niboaka koa fa kiaka andra! Resy lahatra amy zay Gideona fa Jehovah nifidy izy ankitin̈y. Navoriny maramilanany jiaby handeha hiady Midianita aby io.

Ho Jehovah tamy Gideona: ‘Hataoko mandresy anaro. Kanefa maro loatra maramilanao io, ke mety hieritreritry iro fa ten̈a matanjaka matoa iro mandresy. Lan̈iany olo mavozo, iraha mody.’ Olo 22 000 nody, ke 10 000 lahy tavela. Jehovah mbala nivolan̈a: ‘Iro io mbala maro loatra fo. Mindao amorondrano ke iraha migiaka rano iro. Zay olo migiaka sady mizazaha tsao misy fahavalo, indesa miaraka aminao.’ Ke olo 300 lahy fo voafidy. Jehovah nivolan̈a fa iro 300 lahy io, handresy maramila midianita 135 000 aby io.

Koa fa alin̈y andra, ho Jehovah tamy Gideona: ‘Mindao amy zay manafiky iro Midianita aby io.’ Namiany Gideona bankora ndreky sajoa maventy nisy jiro maramilanany jiaby. Izy nivolan̈a tamindro: ‘Zahava zaho, ke zay raha ataoko ataova.’ Nitsoko bankora Gideona, nopotehiny sajoa, nihitsikitsefiny jiro, baka io izy nandronton̈o karaha ty: ‘Sabatra Jehovah ndreky Gideona!’ Karaha zen̈y koa nataony olonany 300 lahy aby io. Navozo mare iro Midianita aby io sady nilefa. Nialamboetry iro, ke nifamono. Mbala nan̈ampy iro Israelita aby io handresy ndraiky koa Jehovah taminio.