Nirasa Aroe Fanjakan̈a

Tamy Solomona nanompo Jehovah, niadan̈a iro Israelita aby io. Solomona nanambady man̈angy maro baka tamy firenena hafa, kanefa iro io nanompo sampy. Niova tsihelihely Solomona, ke nanjary nanompo sampy koa. Neloko mare Jehovah, ke hoizy tamy Solomona: ‘Hadosoko aminao ndreky amy zanakanao fanjakan̈any Israely, ke hirasaiko aroe. Faritry hely fo hamiako zanakanao fa ambiny jiaby hamiako piasanao.’

Tandraraiky, nifanojy taminy Ahia paminan̈y piasany Solomona araiky, Jeroboama an̈arany. Nitriatriany Ahia 12 lambanany, ke hoizy tamy Jeroboama: ‘Hadosony Jehovah amy Solomona ndreky zanany fanjakan̈any Isarely, baka io hirasainy aroe. Mangalà folo amy tapatapaka lamba io ninao fotony anao hanjaka amy foko folo.’ Koa fa ren̈iny Solomona raha zen̈y, nitady hamono Jeroboama izy. Nilefa ta Ezipta Jeroboama. Solomona koa fa naty, Rehoboama zanany loso panjaka. Nasaky nimpody ta Israely amy zay Jeroboama.

Antipan̈ahiny Israely aby io nivolan̈a tamy Rehoboama: ‘Anao koa tsara fan̈ahy amy vahoaka, iro tsy hivadiky aminao.’ Ho iro tanora kamaradiny Rehoboama aby io taminany: ‘Izikoa tianao limen̈y iro vahoaka aby io, tiria hiasa mare iro!’ Narehany volan̈a kamaradiny aby io. Rehoboama ratsy jery tamy vahoaka, ke nitoherindro. Nirasa aroe foko 12 ta Israely. Jeroboama nanjary panjakany foko folo, na fanjakan̈any Israely. Rehoboama ndraiky panjakany foko aroe tavela, na fanjakan̈any Joda.

Tamy fanjakan̈any Rehoboama tan̈y baka nisy Jerosalema, ke olo nandeha tan̈y nivavaka. Tsy tiany Jeroboama raha zen̈y tsao iro mimpody amy Rehoboama. Ke izy nan̈amboatra zanaka aomby volamena aroe. Hoizy tamy vahoaka: ‘Lavitry loatra a Jerosalema an̈y, fa alo eto fo anaro mivavaka.’ Nanomboko nivavaka tamy zanaka aomby volamena aby io vahoaka, ke nan̈adin̈a Jehovah.