Tsaiky Lelahy Efatra Nan̈araka Volan̈a Jehovah

Nindesiny Nebokadnezara ta Babylony havany panjakany Joda. Aspenaza piasanany nirahiny nikarakara iro. Nebokadnezara nan̈iraka izy nifidy tsaiky lelahy salama tsara ndreky ten̈a nahay raha. Iro tsaiky aby io nampianariny tan̈atiny telo taon̈o, baka iro hanjary olo ambony ta Babylony. Nila nianatra namaky, nanoratra ndreky nivolan̈a teny akadianin̈y iro. Iro koa tsy maintsy nihina han̈iny nitovy taminy han̈iny panjaka. An̈isandro tsaiky aby io Daniela, Hanania, Misaela, baka io Azaria. Iro efadahy namiany Aspenaza an̈aran̈a babylonianin̈y: Beltesazara, Sadraka, Mesaka, baka io Abednego. Mbala hanompo Jehovah fo ma iro koa fa nampianarin̈y karaha zen̈y?

Iro efadahy tapakevitry han̈araka volan̈a Jehovah. Haindro fa iro tsy tokony hihina taminy han̈iny panjaka, fotony tamy lalàn̈any Jehovah naloto hanin̈y aby io. Ho Aspenaza tamindro: ‘Panjaka hamono zaho, izikoa anaro hitany malemilemy.’

Nahita hevitry Daniela. Hoizy tamy piambin̈y iro: ‘Zahay azafady ameza legimo ndreky rano fo an̈atiny folo andra. Ampitovisa amindro tsaiky aby mihina aminy han̈iny panjaka io amy zay zahay.’ Nan̈eky piambin̈y io.

Koa fa nafaka folo andra, Daniela ndreky iro namany telo lahy io salama tsara. Ravoravo mare Jehovah, fotony iro nan̈araka volan̈anany. Daniela koa nataony nahay nan̈azava dikany nofy ndreky fahitan̈a.

Koa fa vita fianaran̈a nataondro, nindesiny Aspenaza tamy panjaka tan̈y iro tsaiky lelahy aby in̈y. Nikoran̈a tamindro panjaka, ke hitany fa ten̈a nahay raha Daniela, Hanania, Misaela, baka io Azaria. Iro efadahy nifidiny hiasa tamy lapanany tao. Iro matetiky nan̈ontaniany koa fa nisy raha nanahiran̈a jerinany. Iro nataony Jehovah nahay nandilatra olo mahay raha ndreky pan̈ano mazy niasa tamy panjaka tao.

Tantanànanolo ry Daniela, Hanania, Misaela, baka io Azaria, fa iro tsy nan̈adin̈a fa iro olony Jehovah. Akory anaro tsaiky? Tsy han̈adin̈a Jehovah ma anaro, ndray tsy iô raimandreninaro?