Jesosy Mbala Hely

Nipetraka ta Nazareta Josefa ndreky Maria, baka io Jesosy ndreky zandriny aby io. Pandrafitry Josefa, ke io asa namilomany fianakavian̈anany. Iro nampianariny momba Jehovah ndreky Lalàn̈anany. Iro jiaby zatra nandeha nivavaka tamy Synagoga. Isaka taon̈o koa iro nandeha nankalaza Pasky ta Jerosalema.

Tamy Jesosy 12 taon̈o, iro nandeha ta Jerosalema. Feno olo nandeha nankalaza Pasky tamy tanàna io tamy zen̈y. Koa fa vita fety, nody ry Josefa ndreky Maria. Iro nieritreritry fa efa niaraka taminolo aby io Jesosy. Kanefa iro koa fa nan̈ontany havandro aia izy, izy tsy hitandro.

Iro nimpody ta Jerosalema tan̈y nizaha izy tan̈atiny telo andra. Farany iro nandeha tamy tempoly tao. Hitandro Jesosy. Tsy taitry izy nipetraka tan̈ivony papianatra aby io, baka io nitandren̈y tsara sady nan̈ontany. Lany fan̈ahy papianatra aby io tamy Jesosy, ke iro nan̈ontany izy. Nahaigaga fo iro, fotony izy ten̈a nahay Lalàn̈any Jehovah.

Josefa ndreky Maria efa niasa loha nitady izy, ke ho Maria taminany: ‘Zahay efa nitady anao tantany jiaby. Taia fo ma anao?’ Ho Jesosy: ‘Tsy hainaro ma fa zaho tsy maintsy antran̈ony Papako ato?’

Jesosy baka tio niaraka nody taminy olobeny ta Nazareta. Nampianariny Josefa nandrafitry izy. Mba tsaiky karakory eky Jesosy zen̈y? Tsaiky misy jery izy, tiany Zan̈ahary sady tianolo. Karaha zen̈y fo izy, firaka izy be.