Man̈angy Tamy Vovo

Koa fa vita Pasky, nandeha nimpody ta Galilia Jesosy ndreky pianatranany, fa iro fo nandalo hely ta Samaria. Iro koa fa narikitry tanànany Sykara, Jesosy nangala kajo tamy vovo araiky. Vovony Jakoba an̈aranizio. Pianatranany aby io ndraiky nandeha nivanga han̈iny tantanàna tan̈y.

Nisy man̈angy nandeha nantsaka tamy vovo io. Ho Jesosy taminany: ‘Amia rano zaho higiako.’ Ho Man̈angy io: ‘Anao karaha mivolan̈a aminaka ndraiky? Zaho kony Samaritanin̈y e. Jiosy kony tsy mikoran̈a amy Samaritanin̈y!’ Ho Jesosy: ‘Anao koa nahay zaho, anao hangataka rano aminaka, ke zaho han̈amia anao rano velon̈o.’ Man̈angy io nivolan̈a: ‘Ndray anao tsisy fangalan̈a rano ke.’ Ho Jesosy: ‘Tsy ho sakara eky olo migiaka rano hamiako zen̈y.’ Ho man̈angy io: ‘Tompoko anao, amia rano zen̈y zaho.’

Ho Jesosy taminany: ‘Indesa atỳ vadinao.’ Man̈angy io nivolan̈a: ‘Zaho tsy manambady.’ Ho Jesosy: ‘Ia marin̈y zen̈y. Anao efa indimy nanambady, baka io tsy vadinao lelahy miaraka mipetraka aminao ao io.’ Ho man̈angy io: ‘Paminan̈y anao io! Zahay mino fa amy bongo ty tokony hivavahan̈a amy Zan̈ahary, fa jiosy aby io ndraiky mivolan̈a fa a Jerosalema an̈y fo. Zaho matoky fa Mesia koa avy, izy hampianatra atsika hivavaka.’ Ho Jesosy: ‘Zaho Mesia zen̈y.’ Mbala tsiary nisy olo nivolan̈any Jesosy zen̈y.

Nandeha nalaky tantanàna tan̈y man̈angy io, izy baka tio nivolan̈a tamy Samaritanin̈y aby io: ‘Zaho matoky fa Mesia olo hitako arỳ an̈y. Hainy raha jiaby momba zaho. Alo baka atsika hizaha izy!’ Nandeha nan̈araka man̈angy io tambovo tan̈y olo aby io, baka io nitandren̈y Jesosy.

Iro Samaritanin̈y aby io nan̈iraka Jesosy hidoko tantanànandro tao. Nampianatra tao aroe andra Jesosy. Maro olo nino izy. Iro olo aby io nivolan̈a tamy man̈angy io: ‘Zahay koa fa nitandren̈y izy, zahay mino fa izy marin̈y olo han̈avotro donia ty.’