Jesosy Nitaha Olo Taminandra Sabata

Tsy tia Jesosy iro Fariseo aby io ke iro nizaha hevitry hanamboran̈a izy. Iro nivolan̈a tamy Jesosy fa tsy mety mitaha olo koa fa Sabata. Tamy Sabata zay, nisy olo gila pangataka tamy lalan̈a zay tojy Jesosy. Hoizy tamy pianatranany: ‘Zahava fa ho janga lelahy io baka aminy angovony Zan̈ahary.’ Nangala fotaka Jesosy, nandrorany raha io, nigodroeny, baka io nataony tamy masony lelahy io. Ho Jesosy taminany: ‘Mindao sasà amy matsaboriny Siloama masonao.’ Nengo tan̈y lelahy io, ke nahita izy baka tio. Sambany izy nahita tamy zen̈y!

Lany fan̈ahy olo! Iro nivolan̈a: ‘Lelahy gila pangataka in̈y ma io, sa olo mira izy fo?’ Lelahy io nivolan̈a: ‘Zaho izin̈y!’ Iro nan̈ontany izy: ‘Ke nan̈ino fo basy anao iziô mahita?’ Koa fa nivolan̈iny tamindro raha nandalo, nindesindro tamy Fariseo tan̈y izy.

Ho lelahy io tamy Fariseo aby io: ‘Nasiany Jesosy godra tamy masonaka, nirahiny nisafo zaho, ke mahita zaho ziô.’ Ho Fariseo aby io: ‘Andra Sabata Jesosy mitaha olo! Tsy baka amy Zan̈ahary angovo nan̈anovany zen̈y.’ Sasany ndraiky nivolan̈a: ‘Tsy nahavita zen̈y izy izikoa tsy angovo baka amy Zan̈ahary.’

Nikahindro Fariseo aby io olobeny lelahy io, ke nan̈ontaniandro: ‘Karakory nahavy zanakanaro nanjary nahita?’ Navozo olobeny lelahy io fotony Fariseo aby io efa nivolan̈a fa lan̈iany olo mino Jesosy, hiroasin̈y miala amy synagoga. Ke iro nivolan̈a: ‘Tsy hainay fa an̈ontania izy.’ Ke nan̈ontany lelahy io Fariseo aby io. Ho lelahy io: ‘Efa nivolan̈iko taminaro raha zen̈y, fa nan̈ino anaro mbala man̈ontany zaho fo?’ Neloko mare Fariseo aby io, ke niroasindro izy.

Nandeha tamy lelahy io tan̈y Jesosy, baka io nan̈ontany izy: ‘Anao ma mino Mesia?’ Ho lelahy io: ‘Inoako izy, izikoa haiko.’ Ho Jesosy: ‘Zaho Mesia.’ Ten̈a tsara raha nataony Jesosy zen̈y! Izy nitaha lelahy io ndreky nan̈ampy izy hanan̈a finoan̈a.