Jesosy Nisamborin̈y

Efa nandilatra sasakalin̈y tamy zen̈y, baka io bory fanjava. Jesosy ndreky apostoly aby io nandalo tamy Vavasahany Kidrona. Iro nandeha tamy Bongo Oliva. Iro koa fa navy tamy zaridain̈y Getsemane, Jesosy nivolan̈a: “Ambesa eto, anaro aza mandry.” Niteky hely Jesosy, baka io izy nandohaliky. Izy niasa loha mare ke nivavaka tamy Jehovah: “Sitrany sitraponao fo atao.” Nisy anjely nirahiny Jehovah nankahery izy. Nan̈aton̈o apostoly aby io amy zay Jesosy baka tio, hitany iro efa nandry. Hoizy: ‘Mifohaza! Anaro tsy tokony hoandry fa efa ho avy olo hamadiky zaho. Hisamboriny fahavalonaka aby io zaho.’

Navy Jodasy niaraka tamy vahoaka nitondra sabatra ndreky kobay. Efa hainy Jodasy aia tany ahitan̈a Jesosy, fotony iro efa natetiky nandeha tan̈y. Izy efa nivolan̈a tamy maramila aby io fa izy han̈ambara iro tany misy Jesosy. Nan̈aton̈o Jesosy izy, sady nivolan̈a: ‘Mbalatsara anao, Papianatra!’ Izy nioroko Jesosy. Ho Jesosy: ‘Hamadiky zaho ma dikany orokonao Jodasy?’

Nan̈aton̈o iro Jesosy, ke nan̈ontany iro: “Azovy tadiavinaro?” Iro nivolan̈a: “Jesosy baka Nazareta.” Ho Jesosy: “Zaho ty.” Iro somary nimpody afara, baka io lavo tamy tany. Jesosy nan̈ontany iro: “Azovy tadiavinaro ty e?” Iro nivolan̈a: “Jesosy baka Nazareta.” Ho Jesosy: ‘Zaho efa nivolan̈a taminaro fa zaho ty, fa iro namako aby io ambilà handeha.’

Taitry Petera ke nifirainy tamy sabatra sofin̈y Malko, piasany pisoron̈obe, ke nafaka. Nikasihiny Jesosy sofin̈y lelahy io, ke janga. Ho Jesosy tamy Petera: ‘Ampodiana an̈y sabatra in̈y, fa anao koa mampiasa sabatra, hofoatiny sabatra.’ Iro maramila aby io baka tio nanambotro Jesosy, nifihezindro tan̈anany. Iro apostoly aby io nilefa. Nindesindro vahoaka aby io Jesosy nandeha taminy Anasy, sefony pisoron̈o. Nan̈ontany raha izy Anasy, baka io izy nalefany tamy Kaiafa Pisoron̈obe. Nan̈ano akory eky apostoly aby in̈y?