Amy Vavolombelon̈o Jehovah ma Misy Man̈angy Mitory Teny?

Ia, misy man̈angy antapitrisany mitory vaovao tsarany Fanjakan̈any Zan̈ahary. Karaha ty koran̈iny faminanian̈a amy Salamo 68:11 momba iro io: “Jehovah man̈amia beko; tafiky maventy iro man̈angy pitory vaovao tsara aby io.”

Fa tsy mitovy foeky iro man̈angy aby koran̈iny Baiboly io ndreky iro man̈angy amy fivavahan̈a hafa. Ino aby ma raha maventy tsy mampitovy iro io?

Tsy mitovy olo an̈anaovandro toriteny io. Iro man̈angy amy fivavahan̈a hafa aby io pitondra fivavahan̈a, ke iro mitory teny amindro olo an̈atiny legilizindro ao fo. Iro man̈angy Vavolombelon̈o Jehovah ndraiky, man̈aton̈o olo amy tany jiaby, na amy tany maro olo, na mitety tran̈onolo, na antany hafa koa.

An̈isany raha maventy tsy mampitovy iro amy man̈angy amy fivavahan̈a hafa, raha ataondro izikoa fa avy amy tany ivavahandro ao. Iro man̈angy aby amy fivavahan̈a hafa aby io baka mitariky fivavahan̈a ndreky mampianatra olondro ao fampianaran̈any fivavahan̈andro. Fa iro man̈angy Vavolombelon̈o Jehovah aby io ndraiky tsy mampianatra an̈atiny fiangonan̈a, izikoa misy lelahy vita batisa ao. Iro lelahy efa mahafeno fepetra hampianatra fo mampianatra an̈atiny fiangonan̈andro.​—1 Timoty 3:2; Jakoba 3:1.

Koran̈iny Baiboly ao fa lelahy fo manan̈a andraikitry hampianatra an̈atiny fiangonan̈a. Zahava tsarabe baka raha nambarany apostoly Paoly, taminizy nanoratra tamy Titosy, piandraikitry karaha izy. Ho izy: ‘Nirahiko nijanon̈o ta Kreta anao ... hifidy iro antipan̈ahy isaka tanàna.’ Nivolan̈a koa Paoly fa iro lelahy aby io ‘tsisy raha tokony hivolan̈ana iro, avio araiky fo vadindro.’ (Titosy 1:5, 6) Mira zen̈y koa taratasy nisoratiny Paoly nalefany tamy Timoty: “Izikoa misy lelahy mifen̈y hanjary piandraikitry, dikanizen̈y izy man̈iry asa tsara. Ke piandraikitry zen̈y tokony tsy ho hisy raha hivolan̈ana izy, hanambady tokana, ... mahay mampianatra.”​—1 Timoty 3:1, 2.

Nan̈ino ma lelahy fo nirahin̈y hiandraikitry fiangonan̈a? Paoly nivolan̈a: “Iro man̈angy aby io tsy imboako mampianatra, avio iro tsy manan̈a fahifan̈a amy lelahy, fa iro tokony hangin̈y fo. Adama baka namboarin̈y taloha, zay vo Eva.” (1 Timoty 2:12, 13) Hitantsika baka amy zen̈y fa nata fomba nan̈amboarany Zan̈ahary olo efa ahitan̈a antony mahavy lelahy namiany Zan̈ahary andraikitry hampianatra ndreky han̈aramaso fiangonan̈a.

Iro pitory vaovao tsara aby io koa man̈araka modeliny Jesosy Kristy, Pitariky iro. Karaha ty nivolan̈iny Lioka pianatrany Jesosy momba fanompoan̈a nataony Jesosy: “Nandeha nitety tanambe ndreky ambanivolo Jesosy ke nitory ndreky nan̈ambara vaovao tsarany Fanjakan̈any Zan̈ahary.” Tafaranizin̈y, Jesosy nan̈iraka iro pianatranany aby io han̈ano asa mira araiky nataony io: ‘Ke iro nandeha nitety faritry ndreky tanàna, nitory vaovao tsara ndreky nampajanga olo narary.’​—Lioka 8:1; 9:2-6.

Iro pitory aminy andra izioty koa, na lelahy na man̈angy, mazoto man̈ano asa nan̈irahany Jesosy ty: “Hambara amy tany jiaby misy olo antsendriky vaovao tsara mikasiky Fanjakan̈a ty, baka firenena jiaby ambony tany maharen̈y, zay vo avy ny farany.”​—Matio 24:14.