FOTOKEVITRY MAVENTY HITA ATO | INO ABY MA VANDY VOLAN̈INOLO MOMBA ZAN̈AHARY?
Vandy 1: Tsisy An̈aran̈a Zen̈y Zan̈ahary
RAHA INOANOLO MARO
“Raha mbala tsy mampifankahazo zahay firaka ziô Zan̈ahary misy an̈aran̈a sa tsisy, avio izikoa misy, azovy an̈arany?”—Profesera David Cunningham, Fianaran̈a Momba Teolojỳ (angiley).
NY MARIN̈Y BAKA AMY BAIBOLY
Volan̈iny Zan̈ahary: “Zaho Jehovah zen̈y! Efa zen̈y an̈aran̈anaka.” (Isaia 42:8) Jehovah io an̈aran̈a Hebreo. Dikanizio “Izy Man̈ano Raha Hahavy.”
Tiany Jehovah ampiasaintsika an̈aranany io. Baiboly mivolan̈a: “Kahia an̈aranany. Ambarà firenena aby io raha nataony, baka io ambarà fa efa mahazo voninahitry an̈aranany.”—Isaia 12:4.
Jesosy nampiasa an̈arany Zan̈ahary. Karaha ty nivolan̈iny tamy Jehovah tamy vavaka: “An̈aranao efa nampianariko iro [pianatrany Jesosy], baka io mbala hampianariko iro koa.” Nan̈ino mba izio nambarany iro? Karaha ty ho izy: “Amy zen̈y fitiavandro anao [Zan̈ahary] ho tafiditry mare, karaha fitiavanao zaho, baka io zaho koa hitambatra amindro.”—Jaona 17:26.
NAN̈INO TSARA HAY RAHA ZEN̈Y?
“Karaha ty nisoratiny Walter Lowrie, pandiniky fivavahan̈a: “Olo araiky koa tsy mahay an̈arany Zan̈ahary, izy tsy ten̈a mahay Zan̈ahary. Izikoa angovo matanjaka be fo fahaizany Zan̈ahary zen̈y, izy tsy mety ho tia Zan̈ahary.”
Miran̈a man̈adoso an̈arany Zan̈ahary amy Baiboly ao olo araiky izikoa manolo izio aminy an̈aran̈a hafa na man̈asitriky izio
Pandeha leglizy isaka dimansy i Victor, kanefa tsapany fa izy mbala tsy ten̈a mahay Zan̈ahary. Ho izy: “Tamy zaho vo nahay fa Jehovah an̈arany Zan̈ahary, tio zaho vo nanomboko nahay izy. Efa ren̈iren̈iko fo koran̈a momba izy fa tamy zen̈y zaho ten̈a nahay izy. Tiô izy vo ten̈a nisy ankitin̈y taminaka. Tamy zen̈y koa zaho nanomboko nifandray taminany.
Jehovah von̈ono hifandray marikitry aminolo mampiasa an̈aranany io. Karaha ty raha nampan̈antinainy ‘olo misaintsain̈y an̈aranany’: “Zaho hahinakinaka iro, karaha ataonolo mahinakinaka zanany manompo izy in̈y.” (Malakia 3:16, 17) Izy koa mampan̈anten̈a han̈amia iro hatsaran̈a. Baiboly mivolan̈a: “Zay olo mikaiky an̈aran̈any Jehovah fo ho voavonjy”—Romanina 10:13.