FOMBA FIAIN̈ANA KRISTIANIN̈Y
Fivoriambe Isaka Taon̈o: Fotoan̈a An̈aboahan̈a Fitiavan̈a
Ino ma raha ten̈a itiavantsika man̈aton̈o fivoriambe? Karaha tamindro Israely aby io fo, fivoriambe io fotoan̈a anompoantsika Jehovah miaraka amy rahalahy ndreky ranabavy anjatony, na andrivony aby. Mahazo hanin̈y arapan̈ahy maro koa atsika an̈y. Mifankahita amy kamaradintsika ndreky fianakavian̈antsika koa atsika amizio. Fitiavantsika raha jiaby zen̈y mahavy atsika man̈aton̈o fivoriambe telo andra io.
Atsika koa fa miaraka mivory, atsika tsy tokony hieritreritry raha ho azontsika fo fa tokony handiniky koa akory an̈aboahantsika fa atsika tia olo. (Ga 6:10; He 10:24, 25) Atsika koa man̈amia plasy rahalahy na ranabavintsika, avio plasintsika tompiny zaraiky fo ipitrahantsika, zen̈y mivolan̈a fa atsika mizaha raha mahatsara namantsika. (Fi 2:3, 4) Mety mahazo kamarady maro koa atsika amy fivoriambe. Mety ataontsika tanjon̈o mba mikoran̈a aminolo tsy haintsika lera alohany fivorian̈a na lera mihina matsan̈a. (2Ko 6:13) Mety hanjary kamaradintsika mandrakizay iro io! Fa bebeny jiaby, mety hanapakevitry hanompo Jehovah olo sasany, izikoa hitandro fa atsika ten̈a mifankatia.—Jn 13:35.
ZAHAVA VIDEO FIVORIAMBE IRAISAMPIRENENA “FITIAVAN̈A IO TSY HO RAVAN̈A FOEKY”! AVIO TADIAVA VALINY FAN̈ONTANIAN̈A ABY TY:
Karakory fandraisan̈a vahiny baka antany hafa tamy fivoriambe iraisampirenena taminy 2019 in̈y?
Nan̈ino miavaka firaisantsain̈y ndreky fitiavan̈a misy amy vahoakany Jehovah?
Fitiavan̈a karakory nazavainy rahalahy an̈isany Filankevipitantan̈ana in̈y?
Akory han̈aboahanao fitiavan̈a lera fivoriambe?
Nan̈ino fitiavan̈a io nampiray sain̈y iro rahalahintsika tan Allemagne ndreky ta Kore Atsimo?
Tokony ho tapakevitry han̈ino atsika?