Sekoliny Gileada​—Mahatsara Rahalahy Ndreky Ranabavy Erantany

Isaka taon̈o, maro panompo manontolo andra manokana erantany kahian̈a han̈ano Sekoliny Gileada amy Foibeny Fampianaran̈any Vavolombelon̈o Jehovah a Patterson, a New York.a An̈atiny sekoly io, ampianarin̈y iro pianatra aby io ino raha han̈ampy iro hahavita tsarabe asa isankarazany hampan̈anovin̈y iro, an̈ivony fandaminan̈any Jehovah. Fampiofan̈ana io han̈ampy iro hankahery ndreky hampiofan̈a iro rahalahy ndreky ranabavy an̈ivony fiangonan̈a salakady hampandroso asany birôny sampan̈a erantany.

Sekoliny Gileada io sekoly iraisampirenena. Taminy 2019 iziô natao kilasy faha-147 ke nisy pianatra 56 baka amy firenena 29. Panompo manontolo andra manokana iro kahian̈a man̈ano sekoly io, an̈isanizeny Betelita, piandraikitry faritry, misionera, baka io pisava lalan̈a manokana.

Maro fan̈omanan̈a atao aloha beny hanombohany sekoly. Sampandraharaha Mikarakara Dia Lavitry mividy biendro handihanan̈a han̈atriky sekoly io. Aminy ankamarozany, nahatakatra mandeha 1 075 dolara frais aleretoro niny pianatra araiky baka ambelan̈a Etazonỳ. Pianatra baka amy Nosy Salomon iziô tsy maintsy nifindrafindra avion inefatra aby vo avy a Patterson, baka io intelo nifindra avion iro lera iro nody. Izikoa natao konty, nahatakatra 35 400 kilometara dia nataondro io, baka io mandeha 2 300 dolara isaka pianatra bieny avion. Ke mba hitsitsian̈a vola, iro rahalahy amy Sampandraharaha Mikarakara Dia Lavitry mampiasa programo aminy ordinatera, baka iro mahavita man̈ano rezervasion, koa fa misy bie mora. Ndray efa vita rezervasion, Sampandraharaha io mbala manohy mizaha bie mora fo herin̈iandra maromaro na antsasaka fanjava alohany dia io, tsao fo mbala mahita bie moramorany araiky efa natao rezervasion in̈y. Ny raha misy koa, misy olo efa pandeha avion ke mahazo bie kadô, ke izio amy zay amiandro Sampandraharaha Mikarakara Dia Lavitry io.

Ankamarozany pianatra mila vizà antsendriky vo mahazo mandeha a Etazonỳ. Sampandraharaha Momba Lalàn̈a ndraiky man̈ampy iro hahazo vizà. Kadiriny 510 dolara isaka pianatra vola ilain̈y hikarakaran̈a vizà io.

Ino hatsaran̈a azontsika baka amy fiofan̈ana azondro pianatra aby io? Hendra Gunawan, antipan̈ahy amy fiangonan̈a araiky an Azia Atsimo Antin̈iana. Misy olo fivadiany nahazo diplomy tamy Sekoliny Gileada amy fiangonan̈a misy izy. Karaha ty ho izy: “Tsisy pisava lalan̈a maharitry foeky tamy fiangonan̈anay taloha. Koa fa navy iro fivadiany baka nan̈ano sekoly io, nanjary nisy pitory nan̈ano pisava lalan̈a maharitry tamy fiangonan̈anay, fotony nifindra tamindro zotompo ndreky toetsain̈indro fivadiany io. Tafara tatỳ, nisy ranabavy nan̈ano Sekolin’ny Mpitory Ilay Fanjakana foeky taminay tatỳ!”

Amy Betelany Azia Atsimo Antin̈iana an̈y, misy Betelita efatra mianadahy nahazo diplomy tamy Sekoliny Gileada, ke miaraka miasa amindro io Sergio Panjaitan. Karaha ty ho izy: “Tsy iro fo nahazo hatsaran̈a tamy sekoly io fa zahay koa. Ten̈a nianatra raha maro tamindro zahay kanefa iro tsy nipoerapoera! Rasaindro aminay fo raha nianarandro tan̈y fa tsy tanàndro nindro fo. Ten̈a mankahery zahay raha ataondro zen̈y, ke mba mifen̈y koa zahay hankahery olo hafa.”

Vola baka aia ma ampiasainy fandaminan̈a han̈anovan̈a sekoly io? Baka amy fan̈amezan̈a atao niny asa erantany izio. Maro izioty olo man̈ano fan̈amezan̈a amy donate.jw.org. Zahay ten̈a mankasitraka anaro fotony anaro ten̈a tsy matity mba hanohanan̈a iro pianatra baka amy firenena isankarazany han̈ano sekoly io.