Fan̈ampian̈a Olo Tatrany Antambo Tamy 2022: Hita Tsarabe fa Atsika Ten̈a Mifankatia

Baiboly efa nivolan̈a fa aminy andra misy atsika izioty ho hisy ady, horohorontany, valan̈aretin̈y baka io “raha mampatahotro” hafa koa. (Lioka 21:10, 11) Hita fa ten̈a tanteraka faminanian̈a io tamy taompanompoan̈a 2022 in̈y.a Mbala mitohy fo lagera an Ukraine, salakady misy vokany amy fiain̈ananolo antapitrisa izio. Mbala ahitagna takaitry baka tamy fiparitahany COVID-19 koa ankamarozanolo erantany. Ankoatranizen̈y, maro koa olo mijaly baka aminy antambo, an̈isanizen̈y horohorontany tan̈y Haïti, ndreky siklony tan̈y Ameriky Afovoany avio ta Philippine ndreky tan̈y atsimo antin̈ianany Afriky. Akory nan̈ampiany Vavolombelon̈o Jehovah iro olo tatrany antambo aby in̈y?

Nan̈ampy olo tatrany antambo kadiriny 200 io fandaminan̈antsika tamy taompanompoan̈a 2022 in̈y! Izikoa atambatra, nandany vola 12 tapitrisa dolarab atsika nan̈ampian̈a olo tatrany antambo. Hikoran̈intsika ato fomba nampiasan̈a fan̈amezan̈a antsitrapô mba han̈ampian̈a olo tatrany antambo.

Horohorontany ta Haïti

Nisy horohorontany mahery ankitin̈y nandalo taminy faritry atsimony Haïti tamy 14 Aoty 2021. Nampalahelo fa nisy ranabavy aroe ndreky rahalahy araiky naty taminy antambo nandalo io. Lan̈iany tsy naty ndraiky ten̈a niaritry raha sarotro mare baka taminy antambo io fotony very fanan̈ana ndreky kivy mare. Nivolan̈a karaha ty rahalahy Stephane: “Ten̈a maro olo naty tantanana tao. Nisy fandiven̈ana olo maromaro fo tao tan̈atiny fanjava aroe mandilatra hely.” Karaha ty koa nivolan̈iny rahalahy Éliézer: “Ten̈a maro Vavolombelon̈o tsisy tran̈o hipitrahan̈a salakady tsy nanan̈a ankanjo, kiraro na raha ten̈a ilain̈y andavanandra. Maro koa olo mbala niasaloha mare tan̈atiny fanjava maromaro fotony ndraikindraiky mbala nihetsiketsiky fo tany tafarany horohorontany maresaka be in̈y.”

Tsy ela, efa nan̈ampy edy fandaminan̈a. Sampan̈any Haïti izio nan̈amia hanin̈y mandilatra 53 taonina, baka io nan̈amia lay, labasy, kidoro baka io koa fitaovan̈a fisarzen̈a telefony mandeha amy masoandra. Ankoatranizen̈y, tran̈o mandilatra 100 nisy robaka, namboarin̈y na nampody nahorin̈y ndraiky, tan̈atiny taompanompoan̈a 2022 in̈y. Vola mandilatra 1 tapitrisa dolara lany nan̈ampian̈a olo tatrany antambo.

Iro rahalahy ndreky ranabavy an̈y ten̈a mankasitraka mare fan̈ampian̈a nazondro. Karaha ty volan̈iny Lorette: “Baka tamy horohorontany in̈y, potiky tanteraka tran̈onay ndreky asanay ke tsisy raha hoanin̈y foeky zahay. Kanefa fandaminan̈a ten̈a nan̈ampy zahay ke nahazo raha ten̈a nilainay fo zahay.” Karaha ty koa nivolan̈iny Micheline: “Tran̈o kakazo nipitrahako ndraiky ry zanako aroe lahy ten̈a potiky tanteraka. Tsisy raha nety nataonay koa tsy nivavaka fo, ke Jehovah nampiasa fandaminan̈anany hamalian̈a vavaka nataoko. Zahay izioty nanjary nanan̈a tran̈o mety pitrahan̈a tsarabe. Zaho tapakevitry fa han̈ano lan̈iany vitako mba han̈aboahako fa zaho mankasitraka raha nataony Jehovah taminay.”

Azondro manampahifan̈a tan̈y onon̈o fan̈ampian̈a olo tatrany antambo nataonay. Nivolan̈a pikarakara lapany tanànany l’Asile: “Betibety fo anaro efa navy edy nan̈ampy. Ten̈a derain̈y koa anaro fotony nan̈aja manampahifan̈a. Mamparavoravo zaho koa mahita fa tsy raha hamory fanan̈ana raha ten̈a mahasetry anaro fa tihan̈ampy olo. Fitiavan̈a ten̈a mahavy anaro han̈ampy.”

Namango mare Malawi ndreky Mozambiky siklony Ana

Tamy 24 Zanvie 2022, namango mare Mozambiky siklony Ana, baka io nan̈andrefa firaka tan̈y Malawi. Nahatakatra 100 kilometara isaka lera falakisany baka io be mahalen̈y ndreky tsiko nindesiny. Rongana pôtony jiro, potipotiky pon baka io koa nisy tondradrano be oe.

Siklony in̈y ten̈a nisy vokany mare tamy Vavolombelon̈o mandilatra 30 000 ta Mozambiky ndreky ta Malawi. Rahalahy Charles izio an̈isany mba nan̈ampy tamy fan̈ampian̈a olo tatrany antambo. Karaha ty volan̈iny: “Ten̈a nijaly mare iro piaramanompo aby io baka io maro koa rahandro very. Nalahelo mare zaho koa fa nahita zen̈y salakady nahatsapa fa tsy afaka nan̈ampy.” Nampalahelo ankitin̈y raha nandalo fotony nipotipotehiny siklony in̈y hanin̈y mba nakajindro ndreky tsabondro. Maro koa tsy nanan̈a tran̈o eky. Nisy rahalahy araiky zay, naty foeky vadiny ndreky ry zanany aroe vavy. Nivadiky lakana nimboandro ke maty tan̈aty rano iro telo mianaka.

Ten̈a nampavozo mare siklony in̈y. Mipetraka a Nchalo an̈y Malawi ry Sengeredo ndreky fianakavian̈anany. Iro naharen̈y ranobe nampavozo nan̈aton̈o tran̈ondro tamy maraindrain̈y araiky. Kaiky izio ten̈arano aroe niaraka tondraka. Nanapakevitry rahalahy Sengeredo fa hiala malaky amy tran̈ondro. Nahatsara izy iro niala fotony tsy ela efa narongana rano tran̈o nipitrahandro in̈y. Nandeha vity tamy Tran̈o Fivorian̈a izy ndreky fianakavian̈anany. Kadiriny 30 minity tio fo fan̈anovandro dia vity amy lalan̈a io, kanefa lera aroe iro baka io navy tan̈y tamy fotoan̈a io. Iro kotsakotsa baka io kajo mare koa fa navy tan̈y. Iro koa fa navy tan̈y, efa mba tsy navozoan̈a eky ain̈indro.

Tsy ela efa nan̈ampy edy sampan̈any Malawi ndreky Mozambiky. Nirahiny sampan̈a piandraikitry faritry ndreky antipan̈ahy mba hizaha raha ten̈a ilainy piaramanompo baka io nirahin̈y hankahery piaramanompo. Komitiny Vonjy Rano Vaky na (KVRV) maromaro nirahin̈y han̈aramaso fan̈ampian̈a iro olo tatrany antambo aby io. Iro komity io nan̈ampy piaramanompo hahazo hanin̈y ndreky hahazo raha ten̈a nilaindro. Vola 33 000 dolara nilain̈y mba han̈ampian̈a olo baka io vola mandeha 300 000 dolara han̈oren̈ana tran̈o na han̈amboaran̈a tran̈o robaka.

Nampiasaindro tamy KVRV tsarabe vola tampelatan̈anandro ke nety tsarabe raha nataondro fotony nanonga mare vidindraha. Ohatra izio, vidiny kobany tsakotsako, nanonga 70 isanjato tan̈atiny fito fanjava voanalohany nan̈ampian̈a olo tatrany antambo, kanefa izio ten̈a fototsakafonolo a Malawi an̈y. Nanonga mare koa vidiny lesansy. Ke mba hitsitsian̈a vola, tan̈y fo iro rahalahy aby io nividy hanin̈y ndreky fitaovan̈a fan̈oren̈ana baka io direkty nividy maro be. Najotsondro pivarotro vidiny raha nivarotindro koa fa nividy maro be iro rahalahy aby io baka io koa tsy nan̈efa vola be hitateran̈a entan̈a.

Ten̈a nanohin̈y fôny vahoakany Jehovah fan̈ampian̈a aby io. Nivolan̈a karaha ty rahalahy Felisberto a Mozambiky an̈y: “Zaho mbala tsiary ndraiky nahita fikambanan̈a man̈amiara raha olo naro be karaha ty. Namiandro na fitaovan̈a fan̈oren̈ana zen̈y, na fitateran̈a, olo han̈ano fan̈oren̈ana, na hanin̈y na taridalan̈a tsara be. Ten̈a hita baka tamy fan̈ampian̈a nazonay in̈y fitiavan̈a nikoran̈iny Jesosy amy Jaona 13:34, 35 in̈y.” Ravan̈a tran̈ony ranabavy araiky maty vady. Esther an̈arany ranabavy io a Malawi an̈y. Karaha ty nivolan̈iny: “Ten̈a kivy mare zaho fotony tsy nanan̈a vola han̈amboaran̈a tran̈o vaovao ndraiky. Ke iro ranadahy aby io koa fa nan̈aboatra tran̈onaka, efa karaha tamy paradisa fahitako zaho.”

Mahaihomaro fo antambo hiboaka izioty fotony efa mahay marikitry donia vaovao. (Matio 24:7, 8) Fa atsika matoky fa hahazo fan̈ampian̈a ilain̈y fo vahoakany Jehovah, fotony anaro tsy matity ke man̈ano fan̈amezan̈a antsitrapô. Hazavain̈y amy donate.jw.org ao fomba isankarazany mety an̈anovan̈a fan̈amezan̈a. Zahay ten̈a mankasitraka mare anaro tsy matity.