Fihetsehampo Ndreky Problemo Hafa

Misy manampahizan̈a mivolan̈a fa mitovy fo fihetsikinolo koa fa misy havan̈a maty, baka io miboaka tsihelihely raha zen̈y. Olo tsiaraikiaraiky koa samy amy fomba an̈aboahany alahelonany. Zen̈y ma mivolan̈a fa tsy ten̈a malahelo olo araiky izikoa tsy man̈aboaka alahelonany? Tsy zen̈y foeky. Tsy voatery halahelo loatra olo araiky izikoa izy man̈eky raha misy baka io mikoran̈a fihetsehamponany aminolo hafa. Tsisy olo afaka mivolan̈a fomba ten̈a mety hiatrehan̈a alahelo baka aminy havan̈a maty. Miankin̈y amy kolotsain̈inolo io ndreky toetrinany ndreky raha niain̈any raha zen̈y. Miankin̈y amy zen̈y koa fomba nifatesany havany io.

METY TSY HO MORA RAHA ZEN̈Y!

Mety tsy ho hainolo araiky, han̈ano akory fihetsehamponany izikoa misy havany maty baka io ino problemo mety hiaretany. Ny sasany ndraiky efa ampoizin̈y. Hizaha vitsivitsy amy zen̈y atsika.

An̈atiny alahelo mare. Ty raha mety handalo: Anao mitomoan̈y be, mahatsiaro olo naty tsy foenao io, baka io miovaova fihetsehampo. Mety halahelo mare koa anao koa fa mahatsiaro ny taloha na man̈inofy izy. Amy voanalohany taitry mare, baka io karaha tsy mino fa izy naty. Ohatra, naty tampoko Timoty. Karaha ty ho Tina vadiny: “Tamy voanalohany zaho tsy tafivolan̈a foeky. Firaka amy nitomoan̈y mbala tsy vitako. Nalahelo loatra zaho ke ndraikindraiky sahiran̈a zaho nangala fahin̈ana. Sarotro amy jerinaka han̈eky fa izy naty!”

Miasaloha mare, meloko, ndreky man̈amelonten̈a. Karaha ty nivolan̈iny Ivan: “Tafarany nifatesany Eric zanakanay, taminizy 24 taon̈o in̈y, zahay roeny Yolanda vadiko meloko fo. Nahagaga zahay zen̈y fotony zahay taloha tsy olo mora meloko foeky. Zahay koa nan̈ameloten̈a, fotony zahay nieritreritry fa tsao mbala nisy raha hafa tokony nataonay tamy zanakanay.” Nan̈amelonten̈a koa Alexandro izikoa fa naty vadinany, karaha ty ho izy: “Tamy voanalohany zaho nieritreritry fa matoa zaho ambelany Zan̈ahary mijaly be karaha ty fotony zaho olo tsy manjary. Fa baka tio zaho nan̈ameloten̈a fotony zaho karaha olo nan̈amia tsin̈y Zan̈ahary ndraiky.” Karaha ty koa nivolan̈iny Kostas, araiky tamy lahatsoratra taloha tio in̈y: “Nisy fotoan̈a aby zaho neloko mare tamy Sophia noho izy naty. Avio zaho nan̈ameloten̈a mare. Tsy hadisovan̈anany izio!”

Loso tsy mieritreritry tsara. Ndraikindraiky mety tsy marin̈y raha iritriretinao. Mety hieritreritry, ohatra, anao fa mbala ren̈inao feonolo naty in̈y, na koa mbala hitanao izy, na afaka mikoran̈a aminao. Mety tsy hahavita hifantoko koa anao na loso tsy mahatadidy raha eky. Karaha ty nivolan̈iny Tina: “Ndraikindraiky zaho izikoa fa mikoran̈a aminolo, jerinaka tsy ao foeky. Zaho baka nieritreritry momba Timoty naty in̈y fo. Mampahinihiny zaho, zaho tsy mahavita mifantoko io.”

Tihitokantokan̈a. Olo araiky izikoa malahelo mety hahinihiny, na koa mety hahatsiaro hafahafa izikoa fa miaraka aminolo. Karaha ty nivolan̈iny Kostas: “Mahatsiaro hafahafa mare zaho izikoa fa miaraka aminolo fivadiany. Karaha zen̈y koa izikoa fa miaraka aminolo selibatera.” Karaha ty koa nambarany Yolanda: “Tsy nora taminay foeky naharen̈y olo nitarain̈y momba problemondro, kanefa izio tsisy dikany foeky izikoa ampiran̈iny amy ninay. Tio koa ny sasany mitantara momba zanakandro aminay. Tsara ndraiky zen̈y fa tsy din̈iko mitandren̈y raha karaha zen̈y. Hainay roeny vadiko ndraiky fa fiain̈ana tsy maintsy mitohy fo, fa tsy din̈inay foeky nitandren̈y koran̈a karaha zen̈y.”

Tsy salama. Anao mety tsy hahalany hanin̈y, hahaimahia, ndreky tsy avy tôro. Karaha ty raha tsaroany Aaron, taon̈o araiky tafarany nifatesany papany: “Tsy nazontôro foeky zaho. Isaka alin̈y, zaho taitry fo sady izy aminio amy lera mitovy fo, ke zaho nieritreritry momba papa.”

Tsaroany Alexandro koa fa izy nanjary nisy problemo arapahasalaman̈a. Karaha ty ho izy: “Efa matetitetiky zaho nizahavany dokotera, baka io nivolan̈iny fa zaho salama tsara. Hitako fa kaiky baka amy zaho nalahelo be in̈y nahavy zaho nahatsiaro karaha tsy metimety io.” Nafaka fo izio izikoa fa nandeha fotoan̈a. Fa ndray zen̈y, nety tsara raha nataony Alexandro, nandeha tamy dokotera in̈y. Alahelo be io mety hampihen̈y angovo fiarovan̈a an̈atiny vatan̈antsika ao. Ke zen̈y mety hampiaho aretin̈y efa ao, na koa han̈etsiky araiky vaovao.

Tsy maintsy mankefa adidy maro. Karaha ty nivolan̈iny Ivan: “Eric koa fa naty, tsy maintsy nan̈ambaran̈a ry havanay ndreky namanay avio olo hafa koa, karaha ataony olo iasany ndreky tompintran̈onany. Avio mbala nisy taratasy maro koa tsy maintsy nifinoan̈a. Tio koa iro entan̈any Eric aby io koa tsy maintsy nikarakarain̈y. Raha jiaby io nitaky fifantohan̈a kanefa zahay efa kajo vatan̈a, kajo jery, sady nalahelo mare.”

Raha ten̈a sarotro aminolo sasany ndraiky, lera iro fa mila man̈ano raha araiky fataonolo in̈y taminizy mbala velon̈o. Karaha zen̈y ziô raha navoa Tina. Ho izy: “Timoty fo pandeha labankinay ndreky pikarakara asa velonten̈anay. Fa zioty ndraiky, zaho tsy maintsy man̈ano raha aby io. Miasaloha mare zaho. Raha mba ho vitako tsarabe ndraiky edy han̈ano izio?”

Izikoa raha nikoran̈intsika aby io zahavan̈a, ten̈a sarotro mare miatriky fahafatesany havan̈a zen̈y. Anao baka mety halahelo mare. Fa ho vitanao hiatriky zen̈y izikoa efa hainao tsialohaloha ino raha mety ho tsapanao ndreky ino problemo mety hatrefinao. Aleva onon̈o koa fa, tsy olo jiaby maty havan̈a avoa raha jiaby io. Salakady izikoa anao malahelo mare, aza kivy fa zen̈y raha pohisy fo.

MBALA HO RAVORAVO EDY ZAHO TY?

Raha antinain̈y: Alahelonao io hihen̈y fo izikoa fa mandeha fotoan̈a. Fa zen̈y tsy midika fa anao efa tsy halahelo zen̈y eky na koa hanjary hadin̈anao havanao naty in̈y. Tsy zen̈y! Fa alahelonao fo ho kirikiry. Izio fo mety himpody ndraiky izikoa sendra misy raha tsaroanao tampoko na koa izikoa fa fananjo fotoan̈a araiky, karaha ataony aniverserany mariazy, na daty nifatesany. Izikoa fa mandeha fotoan̈a, vitany ankamaraozanolo mifehy fihetsehampondro, ke vitandro mimpody mifantoko amy fiain̈anandro andavanandra. Mahavita zen̈y iro izikoa iro tompiny miezaka, salakady mahazo fanohan̈ana baka aminy havan̈a na naman̈a.

Firaka ombian̈a loatra? Olo sasany mety malahelo an̈atiny fanjava maro. Ny sasany ndraiky, mety an̈atiny taon̈o araiky na aroe, na mandilatrany zen̈y.a “Alahelonaka”, volan̈iny Alexandro, “nahadin̈y tan̈atiny kadiriny telo taon̈o tio.”

Manàn̈a faharetan̈a. Man̈anaova raha tsihelihely; niany antsendriky, avio amaray koa. Baka io tsarova fa anao tsy halahelo be karaha io fo mandrakizay. Ke ino basy raha mety ataonao hampahivankivan̈a alahelonao, ke hahavy izio tsy hahadin̈y ela be?