Mahay Man̈avaka ny Tsara Ndreky Ratsy

KARAKORY MA MAHAY MAN̈AVAKA NY TSARA NDREKY RATSY ZEN̈Y?

Olo araiky mahay man̈avaka ny tsara ndreky ratsy zen̈y, tsy raha indesiny fihetsehampo fo izikoa fa man̈ano raha, fa efa misy toro lalan̈a arehany. Ke nata tsisy olo mahita izy, efa hainy raha mila atao.

NAN̈INO MA ILAIN̈Y MAHAY MAN̈AVAKA NY TSARA NDREKY RATSY?

Maro hevitry diso ren̈iny tsaiky aby io momba ny tsara ndreky ratsy. Mety baka aminolo a lekolindro an̈y harin̈esandro zen̈y, na aminy hira, filma ndreky dessin animé baka io programo hafa amy tele. Ke raha aby zen̈y mety hahavy zanakantsika aby io hisalasala amy raha efa nampianarin̈y iro.

Tsy mora amy tanora miatriky raha karaha zen̈y. Ke volan̈iny boky zay fa “mila haindro fa maro olo mitady handrisiky iro han̈ano raha baka ho tianolo, avio izikoa fa misy raha efa haindro fa tsara, iro mila tapakevitry fo han̈ano izio ndray kamaradindro tsy man̈ano karaha raha zen̈y.” Dikanizen̈y, diany iro mbala tsaiky, iro efa mila ampianariny olobendro man̈ano raha aby zen̈y.

AKORY HAN̈AMPIAN̈A IRO?

Ampianara iro ino ny tsara ino ny ratsy.

TORO LALAN̈A BAIBOLY: ‘Olo matotro manan̈a fahaizan̈a misain̈y efa nizarin̈y han̈avaka ny tsara ndreky ratsy.’​—Hebreo 5:14.

• Mampiasà volan̈a mety tsara. Arakaraka raha mandalo, anao afaka mivolan̈a: “Mety raha nataony in̈y” na “tsy pare karaha in̈y ay.” Na koa anao afaka mivolan̈a: “Atsika tsy tokony man̈ano karaha io fa karaha ty.” Ke izikoa fa hainy ino ny mety ndreky ino ny tsy mety, ho hainy han̈avaka iro io.

• Hazavà nan̈ino raha araiky tsara na ratsy. Ohatra, an̈ontania izy: Ino ma mahatsara mivolan̈a ny marin̈y zen̈y? Ino vokany izikoa olo araiky mavandy amy kamaradiny? Nan̈ino ma ratsy mangalatra? Tsara izikoa anao zatra mampisaintsain̈y zanakanao karaha zen̈y.

• Ataova mazava tsarabe aminany nan̈ino ilain̈y man̈ano ny tsara. Mety volan̈inao aminany: “Izikoa anao man̈ano ny marin̈y, olo manjary matoky anao” na koa “ho tianolo miaraka aminao izikoa anao tsara fan̈ahy.”

Ataova fahazaran̈anaro tran̈o araiky man̈ano ny tsara.

TORO LALAN̈A BAIBOLY: “Mandiniha ten̈a fo.”​—2 Korintianina 13:5.

• Izikoa ataonaro tran̈o araiky fahazaran̈a man̈ano ny tsara io, anao afaka hivolan̈a fa:

  • “Zahay tsy mavandy zen̈y.”

  • “Zahay tsy miady aminolo.”

  • “Zahay tsy man̈aratsy olo ndreky man̈asaha olo.”

Ho hitany zanakanao amy zen̈y fa anaro tsy raha zisty man̈araka fitsipiky fo fa, efa ten̈a fomba fiain̈ananaro man̈ano ny tsara io.

• Koràn̈a matetiky amy zanakanao raha hiveriny fianakavian̈anaro fa mety ndreky tsy mety. Araraota ampianaran̈a izy raha fohita amy fiain̈ana andavanandra. Ampiràn̈a amy raha volan̈indro a lekoly an̈y na koa amy tele hevitrinaro. Baka io an̈ontania karaha ty zanakanao: “Ino raha nataonao izikoa anao tamy plasinany?” na “mety ho karakory eky nataony lafamìntsika izikoa tatrany raha karaha io?”

Ataova raha hahavy izy han̈iry mare han̈ano ny tsara.

TORO LALAN̈A BAIBOLY: “Ataova fo raha hanan̈anaro eritreritry madio.” ​—1 Petera 3:16.

• Deray izy izikoa fa man̈ano ny tsara. Zanakanao koa fa man̈ano raha tsara, deray izy. Baka io hazavà aminany nan̈ino mety raha nataony io. Ohatra, anao afaka mivolan̈a: “Ravoravo zaho fotony anao nan̈ano ny marin̈y.” Izikoa tantarainy aminao raha tsy mety nataony, deray antsendriky izy fotony tsy nasitriny anao raha zen̈y, zay anao vo man̈itsy izy.

• Ahitsia izy izikoa fa man̈ano raha tsy mety. Ataova hainy zanakanao fa izy fo tomponandraikitry amy raha ataony. Mila haindro ino raha tsy mety nataondro io, baka io nan̈ino izio mifanohitry amy raha hiveriny fianakavian̈anaro fa mety. Misy raimandreny sasany tsy tia mivolan̈a zanakandro momba raha tsy mety nataondro, fotony tsy tiandro zen̈y hamparivan̈a tsaiky. Kanefa raha zen̈y efa karazandraha mampiofan̈a eritreritriny tsaiky io, salakady man̈ampy izy tsy han̈ampody raha tsy mety, afara an̈y.