Tantara 13

Abrahama Kamaradin’ny Zan̈ahary

ORA an̈isan’ny tanàna nipitrahan’olo tafaran’ny Safodrano. Nanjary tanam-be izio, nisy tran̈o maro tsara. Fa olo tao nivavaka tamy raha hafa, fa tsy tamy Zan̈ahary. Karaha raha nataon-drô ta Babela tan̈y fo zen̈y. Olo ta Ora ndreky Babela tsy niran̈a Noa ndreky Sema zanany. Noa ndreky zanany nanompo Jehovah fo.

Naty Noa, lelahy tsy nivadiky tamy Zan̈ahary, 350 taon̈o tafaran’ny safodrano. Taon̈o aroe tafaran’izen̈y, teraka lelahy hitanao amy sary io. Zan̈ahary ten̈a tia izy. Abrahama an̈arany. Tamy tanàna Ora io izy ndreky ry havany nipetraka.

Andra araiky Jehovah nivolan̈a tamin’Abrahama: ‘Ialà Ora ndreky ry havanao, baka iô mandihana amy tany hambarako anao.’ Mba naraihan’Abrahama edy volan̈a Zan̈ahary, ke nialany fiadan̈ana ta Ora? Ia. Fan̈arahany volan̈a Zan̈ahary edy nahavy izy koran̈iny kamaradin’ny Zan̈ahary.

Havan’Abrahama sasany koa niala ta Ora, niaraka taminany. Nandeha babany. Tera an̈arany. Karaha zen̈y koa Lota, zanaka rahalahiny. Baka iô, Saraha vadin’Abrahama, nandeha koa. Irô koa fa nandeha, irô navy tamy tanàna araiky, Harana an̈arany. Tan̈y Tera naty. Irô tamy zen̈y tsy narikidrikitry Ora foeky.

Baka iô Abrahama ndreky ry havany niala ta Harana, ke navy tamy tanàna araiky. Kanana an̈aran̈a tanàna io. Tan̈y Jehovah nivolan̈a taminany: ‘Ty tany hamiako taranakanao zen̈y.’ Abrahama nidôko ta Kanana, nipetraka tan̈aty tran̈olay.

Zan̈ahary nanampôno nitahy Abrahama, ke izy baka iô nanan̈a ôndrikôndriky maro, ndreky biby hafa koa, aviô ampiasa maro. Kanefa izy ndreky Saraha tsy niteraka.

Abrahama koa fa 99 taon̈o, Jehovah nivolan̈a: ‘Zaho man̈amia toky anao fa ho maro taranakanao, ke anao ho baban’olo maro.’ Abrahama ndreky Saraha karaha fa matoe be, ke karakôry koa hampiteraka irô?

Genesisy 11:27-32; 12:1-7; 17:1-8, 15-17; 18:9-19.