Tantara 26

Joba Tsy Nivadiky Tamy Zan̈ahary

Mampahinakinaka lelahy io! Joba an̈arany, aviô man̈angy io vadiny. Hainao raha volan̈iny amy Joba? ‘Ozòn̈a Zan̈ahary, beky anao maty.’ Nan̈ino eky vadiny nivolan̈a zen̈y taminany? Nan̈ino Joba nijaly be karaha io? Alô zahavatsika.

Joba io lelahy tsy nivadiky tamy Jehovah. Izy nipetraka ta Oza, tanàna araiky marikitry Kanana. Jehovah ten̈a tia Joba, kanefa misy olo araiky tsy tia izy. Hainao azôvy olo io?

Satana Devoly. Tsaraova fa Satana anjely ratsy fan̈ahy tsy tia Jehovah in̈y. Izy nahavita nandrisiky Adama ndreky Eva tsy han̈araka volan̈a Jehovah. Ke izy nieritreritry fa vitany koa mandrisiky olo hafa tsy han̈araka volan̈a Jehovah. Vitany edy zen̈y? Tsy vitany. Alaiva onon̈o fo lelahy ndreky man̈angy maro, nan̈araka volan̈a Zan̈ahary, nianaratsika taloha aby in̈y. Firy amin-drô in̈y hainao?

Jakoba ndreky Josefa koa fa naty, Joba lelahy tsy nivadiky tamy Jehovah tambony tany teto. Tian’i Jehovah ho hain’i Satana fa tsy mahavita mitaon̈o olo jiaby han̈ano raha ratsy izy. Volan̈iny tamy Satana: ‘Zahava Joba. Izy ten̈a olo tsy mivadiky aminakahy zen̈y.’

Hoy Satana: ‘Izy baka tsy hivadiky aminao, aia izy namianao raha maro tsara, ke hiala aminao. Adosoa aminany baka raha jiaby io, ahitatsika izy tsy hiala aminao zen̈y.’

Volan̈in’i Jehovah: ‘Mindao edy. Adosoa aminany raha jiaby zen̈y. Ataova amy Joba zay raha hitanao fa ratsy. Ho hitatsika izikoa izy hivadiky aminakahy. Fa tandrema fo tsao vonenao izy.’

Voanalohany, Satana nan̈ano raha angalaran’olo aomby ndreky ramevan’i Joba, baka iô nivoneny ôndrikôndriky ndreky benginany jiaby. Koa fa vita zen̈y, Satana nandefa tsiko mare, nahafaty zanaka Joba folo mianadahy. Farany, Satana namparary Joba. Izy tamy zen̈y nijaly. Zen̈y nahavy vadin’i Joba nivolan̈a: ‘Ozòn̈a Zan̈ahary, beky anao maty.’ Joba tsy nan̈ano zen̈y. Nisy kamaradin’i Joba telo lahy koa navy. Irô nivolan̈a taminany, fa raha tsy manjary nataony fo nahavy izy mijaly karaha io. Joba mbala tsy nivadiky fo.

Jehovah ravoravo nahita izy tsy nivadiky, ke namaly ny tsara nataony, karaha hitanao amy sary io. Izy nampahivan̈a Joba. Joba baka tiô nanan-janaka folo, maro tsara. Izy nanan̈a aomby ndreky ôndrikôndriky, ndreky rameva indroen’ny nanan̈any taloha.

Tsa mba tianao tsy hivadiky amy Jehovah, karaha nataon’i Joba? Izikoa zen̈y ataonao, Zan̈ahary han̈amia anao rady maro koa. Anao ho velon̈o tsisy farany ambony tany eto, lera izy ty manjary paradisa, karaha zaridain̈’Edena in̈y.

Joba 1:1-22; 2:1-13; 42:10-17.