Tantara 42

Boriky Mivolan̈a

ANAO ma fa naharen̈y boriky nivolan̈a? Mety hivolan̈a anao: ‘Tsendriky. Taia koa ma nisy biby mivolan̈a?’ Baiboly mikoran̈a fa navy nisy boriky nivolan̈a. Alô zahavatsika karakôry nahavy zen̈y. 

Israelita aby io efa vôn̈ono hiditry amy tany Kanana. Balaka, ampanjakan’i Moaba, nanjary navozo irô. Ke izy nan̈iraka lelahy araiky misain̈y han̈ozon̈o Israelita aby io. Balama an̈aran̈a lelahy io. Balaka nivolan̈a tamy Balama fa izikoa izy man̈ano zen̈y, hamiany volabe. Ke Balama nitenginy boriky, hizaha Balaka.

Tsy tian’i Jehovah Balama han̈ozon̈o olonany. Ke izy nan̈iraka anjely mitana mesobe hisakana lalan̈a Balama. Balama tsy nahita anjely io, fa boriky io nahita. Ke boriky io nitady hiary anjely io, zisk’izy nidôko tsy nety nandeha. Balama neloko farany mare. Nivangoeny koboay borikinany.

Jehovah baka tiô nan̈ano raha, harin̈esan’i Balama boriky io mivolan̈a aminany. ‘Ino ma ratsy nataoko anao ke zaho poponao?’ nambaran’ny boriky io taminany.

Volan̈in’i Balama: ‘Anao mivolan̈a zaho adala. Izikoa zaho nisy mesobe, fa ela namoniako anao!’

Namaly amy zay boriky in̈y: ‘Zaho ma fa navy nan̈ano anao karaha io?’

‘Aha’, volan̈in’i Balama.

Jehovah nan̈ano raha, hahitan’i Balama anjely mitsangana alohany iô. Volan̈in’anjely in̈y taminany: ‘Ino antony namopoanao borikinao io? Zaho iziô navy hanakana lalan̈anao, fôtony anao tsy mahazo man̈ozon̈o Israelita aby io. Izikoa tsy borikinao io, anao fa nivoneko.’

Balama baka iô nivolan̈a kara’ty: ‘Mifôno zaho fa diso. Zaho tsy raha nahay fa anao nidôko talohanakahy tiô.’ Nambelan’anjely in̈y izy nandeha. Balama amy zay nandeha tamy Balaka tan̈y. Izy mbala ti han̈ozon̈o Israelita aby io fo. Kanefa isaka izy man̈ozon̈o Israelita aby io, Jehovah nan̈ova volan̈anany manjary jôro tsara. Intelo aby izy nan̈ano zen̈y.

Nomery 21:21-35; 22:1-40; 23:1-30; 24:1-25.