Tantara 57

Zan̈ahary Nifidy Davida

INO eky raha nandalo? Zanaka ôndrikôndriky io saiky nahanin’orsy io, ke tsaiky lelahy io namonjy izy. Orsy io koa fa nan̈aton̈o, nalainy tamy vavany zanaka ôndrikôndriky io, handeha hahaniny. Tsaiky lelahy io amy zay nan̈ian̈a orsy io, nalainy zanaka ôndrikôndriky tamy vavan’ny raha io. Orsy io koa fa nitsangana, nivangoen’ny tsaiky lelahy io, ke naty! Baka iô koa, tsaiky lelahy io fa navy namono lion, saiky hihina ôndrikôndrikinany araiky. Izy tsy navozovozo, tsy zen̈y? Azôvy izio koa hainao?

Davida. Izy nipetraka ta Betlehema. Obeda, zanaka Rota ndreky Boaza, dadilahiny. Mbala azonao onon̈o irô in̈y? Davida mpiambin̈y ôndrikôndriky. Jese an̈aran̈a babany. Folo taon̈o tafaran’i Jehovah nifidy Saoly ampanjaka, Davida teraka.

Andra araiky, Jehovah nivolan̈a tamy Samoela: ‘Alà menaka man̈itry in̈y, indesa amy tran̈on’i Jese a Betlehema an̈y. Misy araiky amy zanakanany nifidiko ampanjaka.’ Samoela koa fa nahita Eliaba, zanaka Jese talan̈olo, volan̈iny tan̈aty jerinany tao: ‘Tsy maintsy ty fo araiky nifidin’i Jehovah zen̈y.’ Jehovah nivolan̈a taminany: ‘Aza mizaha halavasan̈a ndreky sora. Tsy izy nifidiko ampanjaka.’

Jese baka iô nikaiky zanany araiky koa, Abinadaba. Volan̈in’i Samoela taminany: ‘Mbala tsy izy fo io.’ Baka iô, Jese nitaondra Sama. Nambaran’i Samoela: ‘Mbala tsy araiky nifidin’i Jehovah fo io.’ Nisy zanany fito lahy hafa koa nindesin’i Jese tamy Samoela, kanefa tsisy tamin-drô io nifidin’i Jehovah. Ke Samoela nan̈ontany: ‘Fa irô jiaby ma tiô in̈y, tsisy hafa eky?’

Jese baka tiô namaly: ‘Zandrin-drô faralahy mbala an̈y, fa izy zay mbala miambin̈y ôndrikôndriky.’ Davida koa fa nindesin̈y tamy Samoela tiô, hitany izy zatôvo. Jehovah nivolan̈a taminany: ‘Io izy aminany. Hidin̈a menaka lohanany.’ Nidin̈an’i Samoela menaka lohanany. Davida amy zay hanjary ampanjakan’Israely.

1 Samoela 17:34, 35; 16:1-13.