Tantara 85
Jesosy Teraka Tan̈aty Vario
AZÔVY zazamena io, koa hainao? Izio Jesosy. Izy ziô vo teraka tan̈aty vario. Tamy zen̈y, tan̈aty vario nitarimian̈a aomby, boriky baka iô biby hafa. Tamy tany fan̈ambilan̈a hanin̈’aomby, Maria niteraka Jesosy. Nino ma nahavy Maria ndreky Josefa tao? Tsiary nisy olo niteraka tan̈aty vario zen̈y, sa karakôry?
Ia. Kara’ty nahavy irô tao: Aogosto Kaisara, mpanapaka ta Roma nan̈ano lalàn̈a fa olo jiaby tôkony himpody amy tany nitirahany, beky soratin̈y amy boky. Josefa baka teraka ta Betlehema. Irô’roen’i Maria koa fa navy tan̈y, tsisy tran̈o nety nifondroen̈a eky tan̈y. Ke irô voatery nan̈ano tran̈o araiky tamy biby aby io. Tamin’andra navian-drô tao, Maria niteraka Jesosy! Kanefa, tsaiky io tsy nan̈ino.
Hitanao amy zay mpiambin̈y ôndrikôndriky avy rỳ? Irô io handeha hamangy Jesosy. Alin̈y andra tamy zen̈y. Irô koa fa niambin̈y ôndrikôndriky tamy kijà tan̈y, irô nahita raha mazavabe nikodidin̈y irô. Anjely izio! Mpiambin̈y ôndrikôndriky aby io tamy zen̈y navozo. Kanefa, volan̈in’anjely io: ‘Anarô kaza mavozo! Misy vaovao tsara ambarako anarô. Ziôty, Kristy Tômpo teraka a Betlehema. Izy hamonjy olo jiaby! Ho hitanarô izy voakodidin̈y lamba, nampandrin̈y amy fihinanam-biby.’ Tiô fo, nisy anjely maro koa navy, nan̈amia voninahitry Zan̈ahary. Mpiambin̈y ôndrikôndriky aby in̈y niaraka naharen̈y zen̈y, irô nilomoay, nizaha Jesosy. Irô iziô fa ho avy aminany.
Hainao nan̈ino Jesosy tsy niran̈a tsaiky hafa? Mba hainao azôvy marin̈y izy? Alaiva onon̈o fa tamy voanalohany atsika nianatra boky ty, atsika nikoran̈a mikasiky Zanaka Zan̈ahary talan̈olo. Izy ndreky Jehovah niaraka niasa raha jiaby an-dan̈itry ndreky ambony tany. Zen̈y ny marin̈y mikasiky Jesosy!
Jehovah namindra fahin̈an’ny Zanany boaka tan-dan̈itry tan̈aty kibon’i Maria. Niaraka tamy zen̈y, nisy tsaiky velon̈o tan̈aty kibony tao, karaha ataon’ny tsaiky jiaby an̈aty kibon’ny reniny fo. Tsaiky io fo Zanaka Zan̈ahary. Jesosy teraka ta Betlehema tan̈aty vario tao. Hainao amy zay antony namparavoravo anjely aby io nivolan̈a tamin’olo fa Jesosy teraka?