Tantara 86

Lakintan̈a Nitariky Lalan̈an’olo

HITANAO lakintan̈a mazavabe tondroen’ny lelahy aby io? Irô koa fa niala ta Jerosalema, niboaka lakintan̈a io. Lelahy aby io boaka Tantin̈ana. Irô mpandiniky lakintan̈a. Irô natoky fa lakintan̈a io hitariky irô amin’olo araiky niavaka.

Lelahy aby io koa fa navy ta Jerosalema, nan̈ontany: ‘Aia ma tsaiky hanjary ampanjakan’ny Jiosy zen̈y?’ “Jiosy” koa ikahian̈a Israelita aby io. Lelahy aby io baka iô nivolan̈a: ‘Tantin̈ana tan̈y baka nahitanay lakintan̈a tsaiky io voanalohany, ke zahay navy hankôhoko aminany.’

Niasa loha Heroda ampanjakan’i Jerosalema koa fa naharen̈y zen̈y. Tsy tiany hisy ampanjaka hafa hisolo pilasinany. Ke Heroda nikaiky mpisôron̈obe aby io nan̈ontany: ‘Aia ma tany hitirahan’ny ampanjaka

zen̈y?’ Irô nivolan̈a: ‘Betlehema, volan̈in’ny Baiboly.’

Nikahian’i Heroda lelahy aby boaka Tantin̈ana in̈y, baka iô nivolan̈iny: ‘Tadiavanarô tany misy tsaiky zen̈y. Anarô koa fa mahita izy, volàn̈a zaho fa zaho koa ti hankôhoko aminany.’ Hamono tsaiky io fo ten̈a tetiky Heroda!

Lakintan̈a in̈y amy zay nitariky lelahy aby io nandeha ta Betlehema, baka iô nijanon̈o fananjo tany misy tsaiky in̈y. Lelahy aby io koa fa niditry tamy tran̈o in̈y, nahita Maria ndreky Jesosy. Irô nitaondra kadô namian̈a Jesosy. Jehovah nampan̈inôfy olo aby io nivolan̈a fa irô tsy mahazo mimpody amy Heroda an̈y. Ke irô nan̈araka lalan̈a hafa, nody tamy tanin-drô.

Heroda neloko farany mare koa fa nahay fa lelahy boaka Tantin̈ana aby in̈y efa nody. Izy amy zay nan̈amia beko fa tsaiky lelahy jiaby taon̈o aroe mijotso, mila vonen̈a. Jehovah efa nampan̈inôfy Josefa, ke Josefa nitaondra vadiny ndreky zanany nilefa ta Ejipta. Josefa amy zay koa fa nahay fa naty Heroda, izy ndreky Maria ndreky Jesosy nody ta Nazareta. Tan̈y Jesosy tombo.

Azôvy nampazava lakintan̈a araiky in̈y? Alaiva onon̈o fa lelahy aby in̈y koa fa nahita lakintan̈a in̈y, nandeha ta Jerosalema antsendriky. Satana Devoly baka mila hamono Zanaka Zan̈ahary, ke hainy fa Heroda, ampanjakan’i Jerosalema ti hamono izy. Dikan’izen̈y, Satana fo nampazava lakintan̈a in̈y.

Matio 2:1-23; Mika 5:1.