Tantara 115

Paradisa Vaovao Ambony Tany

ZAHAVA kakazo maniry aby io, folera maro tsara, bongo. Tsara, tsy zen̈y? Zahava koa serfa mihina amy tan̈an’ny tsaiky io. Misy lion ndreky sevaly koa iô. Tsa mba tianao hipetraka amy tany karaha io?

Tian’ny Zan̈ahary anao ho velon̈o tsisy farany amy paradisa. Tsy tiany anao harary na halahelo karaha olo amin’andra ziôty. Baiboly mampan̈anten̈a olo hiain̈y amy paradisa vaovao io: ‘Zan̈ahary hiaraka amin-drô. Amy zen̈y, tsisy eky fahafatesan̈a, salakady tsisy alahelo ndray tarain̈y ndray teoteoko. Fa efa kabaro taloha zen̈y.’

Jesosy han̈ano raha beky tany ty tsara. Hainao ombian̈a? Lera izy boaka man̈adoso raha ratsy jiaby ndreky olo ratsy fan̈ahy. Alaiva onon̈o Jesosy, tamin’izy tambony tany, nampahivan̈a olo marary, namelon̈o olo maty. Jesosy nan̈ano zen̈y han̈aboahan̈a raha mbala hataony, lera izy Ampanjakan’ny fanjakan̈an’ny Zan̈ahary.

Miniminia hely hatsaran̈an’ny fiain̈ana amy paradisa io! Jesosy ndreky olo nifidiny hanjaka miaraka aminany an-dan̈itry an̈y, hikarakara raha ilain’olo jiaby ambony tany eto, beky olo sambatra. Hainao ino raha tôkony hataotsika beky mahazo fiain̈ana tsisy farany boaka amy Zan̈ahary? Alô zahavatsika.

Apokalypsy 21:3, 4; 5:9, 10; 14:1-3.