Nisy Anjely Nivadiky Tandan̈itry Tan̈y

Tsara aby anjely jiaby niforon̈iny Jehovah, fa baka tio nisy araiky tamindro niova ratsy fan̈ahy. Izio Satana Devoly. Tiany Satana izikoa olombelon̈o manompo izy fa tsy manompo Jehovah. Karaha ty raha niboaka:

Tamy zaridain̈y Edena tao nisy kakazo maro samy namoa voandraha maro mety hoanin̈y. Jehovah nivolan̈a taminy Adama ndreky Eva fa iro mahazo mihina amy voandraha jiaby io. Fa nisy kakazo araiky ndraiky tsy nimboany Zan̈ahary nihoanindro. Izy nivolan̈a tamindro fa izikoa iro mihina izio, iro hofoaty edy.​—Genesisy 2:9, 16, 17.

Tandraraiky, Eva zaraiky fo tao, nisy bibilava nikoran̈a taminany. Fa ny marin̈y aminany, Satana Devoly nivolan̈a io fa tsy bibilava io. Satana nivolan̈a taminy Eva fa izikoa izy mihina amy voandraha tsy nimboan̈a nihoanindro io, izy hanjary misain̈y mare miran̈a Zan̈ahary. Baka io izy nivolan̈a fa Eva tsy hofoaty zen̈y aby. Fa vandy areriky raha volan̈iny Satana zen̈y. Fa ndray zen̈y, ninoany Eva volan̈anany ke izy nihina tamy voandraha io. Baka io, nan̈amezany koa Adama, ke nihina koa.​—Genesisy 3:1-6.

Izio tantara ten̈a nisy ankitin̈y. Hitantsika baka amizio fa Satana io pivadiky sady pavandy. Izy nivolan̈a taminy Eva fa izikoa izy tsy man̈araka volan̈a Zan̈ahary, izy tsy hofoaty. Vandy raha zen̈y. Naty ankitin̈y Adama ndreky Eva. Fa Satana ndraiky tsy naty tamy zen̈y, fa ndray zen̈y izy tsy maintsy mbala haripaka fotony izy koa mba nanota. Fa mandrapavianizen̈y, izy mbala velon̈o salakady mbala mamitaka olombelon̈o fo. Izy mbala mavandy fo, sady izy tihitariky olo tsy han̈araka lalàn̈any Zan̈ahary.​—Jaona 8:44.

Nisy anjely hafa koa nivadiky

Tafara tatỳ, nisy anjely hafa koa nanjary ratsy fan̈ahy. Hitandro anjely aby io fa maro tsara man̈angy tambony tany tatỳ, ke iro nan̈iry han̈ano firaisan̈a tamy man̈angy aby io. Ke iro nijotso tambony tany tatỳ sady nisikiny vatan̈anolombelon̈o. Baka io iro samy nangala man̈angy. Raha zen̈y mifanohitry amy fikasan̈any Zan̈ahary.​—Genesisy 6:1, 2; Joda 6.

Raha zen̈y koa nanjary niteraka problemo taminy olombelon̈o. Iro man̈angy aby io niteraka, kanefa zanakandro tsy nitovy tamy tsaiky jiaby. Zanakandro anjely aby io izikoa fa nahaibe, loso olo befatiarin̈y salakady kafiry ndreky ratsy jery mare. Ke nanjary feno olo kafiry tambony tany tatỳ. Zen̈y nahavy Jehovah nanapakevitry nan̈ano safodrano nandripahan̈a olo jiaby ratsy fan̈ahy. Noa ndreky fianakavian̈anany fo olo tafitsaka tamy Safodrano in̈y.​—Genesisy 6:4, 11; 7:23.

Iro anjely ratsy aby io ndraiky tsy naty fotony iro nimpody tamy faritry arapan̈ahy tan̈y. Fa iro fo voasazy. Iro efa tsy nahazo niaraka tamy fianakavian̈any Zan̈ahary eky. Iro tsy nahazo niaraka tamindro anjely tsara aby io eky. Salakady iro efa tsy nimboany Jehovah nisikiny vatan̈anolombelon̈o eky. Hofoaty koa iro amy fitsaran̈a farany.​—2 Petera 2:4; Joda 6.

Satana niroasin̈y niala tandan̈itry tan̈y

Tan̈elan̈elan̈a taon̈o 1914 ndreky 1918, nisy ady tandan̈itry tan̈y. Karaha ty fitantarany bokiny Apokalypsy raha nandalo tamy zen̈y: “Vaky ady tandan̈itry tan̈y. Mikaela [Kristy Jesosy efa natsangana tamy maty] ndreky anjelinany [tsara] aby io niady tamy dragona [Satana]. Dragona ndreky anjelinany [ratsy] aby io koa niady fa iro fo tsy naharesy, salakady efa tsisy pilasindro eky tandan̈itry tan̈y. Ke dragona maventy be in̈y, bibilava araiky tamy voanalohany tan̈y in̈y, Devoly ndreky Satana zen̈y, araiky mamitaka tany jiaby misy olo in̈y natsipy mare tamy tany, baka io anjelinany [ratsy] aby io koa natsipy niaraka taminany.”

Ke ino vokany? Karaha ty tohiny tantara io: “Miravoravoa anaro jiaby mipetraka andan̈itry an̈y!” Iro anjely tsara aby io afaka ravoravo fotony Satana ndreky anjelinany, na fan̈ahy ratsy aby io, efa tsy andan̈itry an̈y eky. Fa karakory ndraiky olombelon̈o ambony tany? Karaha ty volan̈iny Baiboly: “Antambo navy aminaro ambony tany ndreky amy ranomasin̈y jiaby an̈y, fotony Devoly loso an̈y, meloko mare. Hainy baka fa hely fo andranany tavela.”​—Apokalypsy 12:7-9, 12.

Satana ndreky iro anjely ratsy fan̈ahy aby io miasa mamitaka ndreky mitondra problemo maventy aminolombelon̈o ambony tany fo. Demony ikahian̈a iro anjely nivadiky niaraka amy Satana io. Iro io fahavalony Zan̈ahary. Ratsy fan̈ahy aby iro jiaby io.