Demony aby io Miaboko Olo Maty

Baiboly mivolan̈a fa Satana “mamitaka tany jiaby misy olo.” (Apokalypsy 12:9) Tsy tiany Satana ndreky demoninany aby io atsika mino Baiboly, Volan̈a Zan̈ahary io. Tiandro olo hino fa olo maty aby in̈y mbala velon̈o ankoatra an̈y. Alo zahavantsika fomba han̈anaovandro zen̈y.

Fivavahan̈a diso

Maro fivavahan̈a mampianatra fa atsika olombelon̈o manan̈a fan̈ahy tsy mety maty. Ke izikoa zen̈y olo araiky maty, vatan̈anany fo maty fa fan̈ahinany ndraiky mandeha ankoatra an̈y.

Baiboly ndraiky tsy mampianatra raha karaha zen̈y. Baiboly man̈ambara fa fan̈ahy io tsy raha an̈atinolo ao, fa izio ny maha izy olo araiky. Ohatra ziô, karaha ty hivolan̈any Baiboly fomba namoron̈ana Adama: “Jehovah Zan̈ahary niasa olo, baka amy fotaka. Nalainy Jehovah amy zay fahin̈ana, baka io nampidiriny tamy lavakoron̈onolo niasainy io, ke olo nanjary olo velon̈o.” (Genesisy 2:7) Hitantsika amy zen̈y fa Adama tsy namian̈a fan̈ahy, fa izy fan̈ahy.

Biby koa fan̈ahy.​—Genesisy 1:20, 21, 24, 30.

Efa tsy mahagaga atsika eky mahay fa kaiky fan̈ahy io mety maty fotony efa haintsika fa dikany “fan̈ahy” io amy Baiboly ao, olo araiky. Karaha ty volan̈iny Baiboly:

• ‘Hofoaty zay fan̈ahy manota.’​—Ezekiela 18:4.

• ‘Ke ho Samsona: “Ambilà zaho maty miaraka amy Filistiny”.’​—Mpitsara 16:30.

• “Ino raha mety atao koa fa sabata: ‘Man̈ano ny tsara sa man̈ano ny ratsy, man̈avotro olo sa mamono olo?”​—Marka 3:4.

Misy andininteny hafa koa man̈aboaka fa fan̈ahy io mety foan̈ana (Genesisy 17:14), mety matiny sabatra (Josoa 10:37), mety kindain̈a (Joba 7:15), baka io mety maty andrano (Jona 2:5). Dikanizen̈y, fan̈ahy io maty.

Izikoa vakinao rango amboanalohany Baiboly io, anao tsy mety hahita volan̈a “fan̈ahy tsy mety maty” zen̈y foeky. Olombelon̈o efa olombelon̈o edy, fa tsisy raha tapatapany an̈atinany ao. Fampianaran̈a momba fan̈ahy tsy mety maty io tsy baka amy Baiboly. Izio fampianaran̈a baka amy Satana ndreky demoninany aby io. Halany Jehovah vandy jiaby ampianariny fivavahan̈a.​—Ohabolana 6:16-19; 1 Timoty 4:1, 2.

Moasy

Fomba hafa hamitahany Satana olo, izy mampiasa moasy. Izio olo araiky afaka mahazo hafatra mivantan̈a baka amy faritry tsy hita maso an̈y. Olo maro, firaka amindro moasy aby io koa mino fa hafatra aby io baka amy fan̈ahinolo maty aby in̈y. Fa karaha efa hitantsika baka tamy Baiboly tio in̈y, zen̈y tsy marin̈y.​—Mpitoriteny 9:5, 6, 10.

Ke baka aminjovy fo basy hafatra aby in̈y? Baka amy demony! Mora amindro mangala tahaka olo araiky efa maty, fotony iro efa nandiniky izy fo taminizy mbala velon̈o. Haindro fomba fivolan̈anolo io, pozinany, raha fataony, ndreky raha hainy.​—1 Samoela 28:3-19.

Tantara tsy marin̈y

Baka amy tantara tsy marin̈y koa han̈aparitahany Satana vandy momba olo maty. Baka amy tantara aby io matetiky mahavy olo tsy han̈araka fahamarin̈ana an̈aty Baiboly.​—2 Timoty 4:4.

An Afriky, misy tantara maro momba olo aby efa naty, kanefa hitanolo velon̈o zen̈y. Fa matetiky fo, amy toeran̈a araiky lavitry tany nipitrahanolo io fo zen̈y iboahanolo io. Ke man̈ontania ten̈a karaha ty: ‘Mba normaly edy izikoa olo maty mbala manan̈a angovo ke, amy toeran̈a lavitry ry havany ndreky namany an̈y ndraiky izy miboaka?’

Tsy olo mitovy aminolo maty in̈y fo hitandro zen̈y va? Ohatra ziô, niremarkeny pitory aroe zay fa taminiro nitory tamy faritry araiky, nisy matoelahy araiky nan̈araka iro fo tan̈atiny lera maro. Izikoa izy fa nan̈ontaniandro, nivolan̈iny fa araiky tamindro rahalahy aby io zen̈y rahalahiny efa naty efa taon̈o maro niokatra. Izy diso hevitry kanefa tsy nikeny foeky izio tsy izy. Ke iritrireta amy zay baka matoelahy io tsy maintsy hitantara raha zen̈y amindry namany ndreky olo antanànandro.

Mahitahita raha, man̈inofy, ndreky maharen̈y feo

Azo antoko fa anao efa naharen̈y olo nahitahita raha, naharen̈y feo, na nan̈inofy raha hafahafa. Iro aminjay mavozo mare. Matetiky isaka alin̈y, Marein mipetraka an Afriky Andrefa an̈y maharen̈y feony dadiny mikaiky izy. Azonizy mavozo loatra, miafatrafatra mare izy, ke mamoha olo jiaby tran̈o araiky aminany. Nivadiky adala foeky izy tamy farany.

Ke izikoa mbala velon̈o ankitin̈y olo efa naty aby in̈y, iro hampavozo mare havandro? Tsy marin̈y. Baka amy demony hafatra mampavozo karaha zen̈y.

Fa karakory ndraiky izikoa hafatra tsaratsara azonolo? Narary mare, ohatra, Gbassay mipetraka a Sierra Leone. Nan̈inofy nahita papany efa naty izy. Papany io nan̈iraka izy nandeha nangala raviny kakazo, nalatsaka an̈aty rano, baka io nigiahiny. Fa izy tsy mahazo mivolambolan̈a zen̈y aminolo alohany han̈anaovany zen̈y. Nataony Gbassay raha zen̈y ke izy janga marin̈y.

Nisy man̈angy zay nivolan̈a fa alin̈y araiky tafarany nifatesany vadiny, lelahy io niboaka taminany. Man̈angy io nivolan̈a fa vadiny tsy nan̈ino sady misikiny lamba tsara oe.

Baka amy Zan̈ahary ma iro hafatra ndreky olo mahitahita raha karaha mba tsara karaha zen̈y? Ehe. Jehovah “Zan̈ahariny fahamarin̈ana.” (Salamo 31:5) Izy tsy mety hamitaka na havandy amintsika. Demony fo tompinizen̈y.

Ke izio ma misy demony tsara? Ehe. Iro io tsisy manjary nata iro man̈ano sary karaha man̈ampy olo ndraikindraiky. Tamy Devoly nikoran̈a taminy Eva in̈y koa nan̈ano sary karaha tsara fan̈ahy in̈y. (Genesisy 3:1) Kanefa ino raha niboaka izikoa Eva fa nitandren̈y ndreky nan̈araka volan̈anany? Izy naty.

Efa raha fohita matetiky olo araiky ratsy fan̈ahy man̈ano sarisary tsara fan̈ahy izikoa fa misy olo tiany fitahin̈y. Karaha ty ho Volan̈a Zan̈ahary: “Satana koa man̈ano karaha anjeliny mazava fo.”​—2 Korintianina 11:14.

Zan̈ahary efa tsy mampiasa nofy, fahitan̈a na feo baka andan̈itry hikoran̈ana aminolo ambony tany. Izy mitariky ndreky mampianatra atsika baka amy Baiboly. Izio mahavy atsika “ho ampy fitaovan̈a aminy asa tsara jiaby.”​—2 Timoty 3:17.

Dikanizen̈y, matoa Jehovah mampitandrin̈y atsika amy tetiky Devoly, atsika tiany. Hainy baka fa demony aby io ten̈a fahavalo tsy manjary.