Manompoa Jehovah fa Tsy Satana

Atsika jiaby samy afaka mifidy hanompo Jehovah sa hanompo Satana ndreky demony aby io. Fa tsy mety izikoa sady manompo Jehovah manompo Satana. Fa manompo Jehovah ten̈a fahendrena!

Jehovah Zan̈ahary tsara

Karaha efa nikoran̈intsika in̈y, iro demony aby io tia mampijaly olo ndreky mamitaka olo. Fa Jehovah ndraiky tsy karaha zen̈y. Atsika tiany, karaha ataony baba araiky tia zanaka in̈y. Jehovah Pan̈amia “fan̈amezan̈a tsara jiaby ndreky fan̈amezan̈a lavorary jiaby.” (Jakoba 1:17) Izikoa raha mbala mahatsara atsika olombelon̈o fo tsy hatitizany amintsika foeky, ndray raha farany sarotro.​—Efesianina 2:4-7.

Miniminia hely baka raha nataony Jesosy, Zanaka Zan̈ahary, taminizy tambony tany tatỳ. Olo moa nataony nahavita nivolan̈a, baka io olo gila nataony mahita. Izy nitaha olo boka ndreky malemy vity. Izy koa nandroaka demony ndreky nitaha karazan̈a aretin̈y jiaby. Baka taminy angovony Zan̈ahary nahavy Jesosy nahavita raha jiaby zen̈y. Firaka olo naty mbala vitany fo namelon̈o izy.​—Matio 9:32-35; 15:30, 31; Lioka 7:11-15.

Zan̈ahary tsy mavandy, ke mivolan̈a ny marin̈y fo. Izy tsy mamitaka olo zen̈y foeky.​—Nomery 23:19.

Aza man̈ano raha ratsy

Karaha ataony lalitry voafandriky an̈aty faraoratra in̈y, antapitrisany koa olo voafandrikiny finoanoampoan̈a ndreky vandy. Iro mavozo olo maty. Iro mazovo demony. Iro miasaloha tsao vorehinolo, azony ozon̈onolo, aody ataonolo ndreky sampy ataonolo hahatsara vintan̈a. Loso karaha gadra in̈y iro amy fan̈arehan̈a finoan̈a ndreky lovantsofin̈y miorin̈y amy vandiny Satana Devoly. Fa tsisy nata araiky amy raha aby io ndraiky mahavoa panompony Zan̈ahary.

Jehovah matanjaka lavitry mandilatra Satana. Izikoa anao manompo Jehovah, izy hiaro anao baka anao tsy ho voa raha baka amy raha ataondro demony aby io. (Jakoba 4:7) Tsy hahazo anao mosavy ataonolo. Karaha zen̈y raha nisy ta Nigéria. Nisy olo telo pan̈ano aody mahery namosavy Vavolombelon̈o Jehovah araiky, fotony izy tsy nan̈eky hiala tamy tanàna tao. Koa fa hitandro fa tsy navoa izy foeky mosavindro in̈y, araiky tamindro pan̈ano aody aby io nanjary navozo, ke izy nan̈aton̈o Vavolombelon̈o Jehovah io nan̈ano azafady.

Demony aby io izikoa tsy voly mampijaly anao, anao afaka mikaiky an̈aran̈any Jehovah fa izy hiaro anao. (Ohabolana 18:10) Kanefa izikoa tianao hahazo fiarovan̈a baka amy Zan̈ahary, mila ialanao raha jiaby misy ifandraisany amy fan̈ahy ratsy ndreky fanompoan̈a demony. Zen̈y raha nataondro panompony Jehovah ta Efesosy tan̈y. Navorindro bokindro jiaby momba mazỳ, avio niroandro. (Asan’ny Apostoly 19:19, 20) Mira zen̈y koa raha mila ataonolo manompo Jehovah aminy andra zioty. Adosoa aminao raha jiaby ampiasain̈y iarovan̈a amy vintan̈a, aody atao fiambin̈y ain̈y, tady atao “piaro”, sampy natao hahatsara vintan̈a, bokiny mazỳ, ndreky raha jiaby misy ifandraisany amy fan̈ahy ratsy.

Areha fivavahan̈a marin̈y

Izikoa tianao hamparavoravo Zan̈ahary, tsy ampy izikoa miala amy fivavahan̈a diso ndreky tsy man̈ano raha ratsy eky. Fa anao koa mila man̈araka fivavahan̈a marin̈y. Baiboly man̈ambara amintsika raha mila ataontsika:

Miarasa amy Vavolombelon̈o Jehovah

Satana ndreky demony aby io manan̈a panompo ambony tany eto. Iro io mampianatra raha ratsy ndreky man̈ano raha ratsy. Fa Jehovah koa manan̈a panompo. Iro io Vavolombelon̈o Jehovah. (Isaia 43:10) Ambony tany eto, misy Vavolombelon̈o Jehovah mandilatrany valo tapitrisa. Iro io mifen̈y mare man̈ano ny tsara ndreky mampianatra olo ny marin̈y. Amy tany maro, anao afaka mahita iro io amy tran̈o fivoriandro an̈y. Ravoravo iro handray anao.

Asandro man̈ampy olo hanompo Zan̈ahary. Iro afaka miaraka mianatra Baiboly aminao antran̈onao an̈y, ke han̈ampy anao hahay karakory atao manompo Jehovah amy fomba tiany. Tsy man̈efa mianatra Baiboly. Ravoravo Vavolombelon̈o Jehovah mampianatra anao ny marin̈y, fotony iro tia olo sady tiandro mare koa Zan̈aharindro Jehovah.