Fiain̈ana Tsara Aminy Amaray An̈y

Satana ndreky demoninany mamitaka olo io, efa hely andrandro tavela. Iro efa niroasiny Jehovah niala baka ta tandan̈itry tan̈y. (Apokalypsy 12:9) Tsy ho ela, Zan̈ahary mbala han̈ano raha ndraiky amy Satana ndreky demoninany aby io. Apostoly Jaona nahita fahitan̈a baka tamy Zan̈ahary. Karaha ty ho izy: “Ke nisy anjely araiky hitako nijotso baka tandan̈itry tan̈y, tamy tan̈anany nisy lakileny lavaka tsy hita farany ndreky silisily maventy. Ke nisamboriny anjely io dragona, bibilava araiky tamy voanalohany tan̈y in̈y, Devoly ndreky Satana an̈arany, baka io nigadrainy tan̈atiny arivo taon̈o. Izy baka tio natsipiny mare tan̈aty lavaka tsy hita farany. Nigadrainy anjely in̈y lavaka io, baka io nataony tombokase, amy zen̈y dragona io tsy hahavita hamitaka firenena eky mandrapitaperany arivo taon̈o.” (Apokalypsy 20:1-3) Hely tavela, efa haripaka amy zay Devoly ndreky demoninany aby io.​—Apokalypsy 20:10.

Olo ratsy fan̈ahy ambony tany eto koa mbala haripaka.​—Salamo 37:9, 10; Lioka 13:5.

Hivilomin̈y ndraiky olo efa naty aby in̈y

Satana ndreky demony aby io izikoa fa ripaka, maro hatsaran̈a hamiany Jehovah olombelon̈o. Mety tsaroanao fa olo maty efa tsisy fahin̈ana eky. Iro io nampitovisiny Jesosy aminolo mandry mare fa tsy man̈inofy fo. (Jaona 11:11-14) Nahavy izy nivolan̈a zen̈y fotony hainy fa mbala ho avy fotoan̈a iro olo mandry ampasan̈a an̈y mbala hifohazin̈y ndraiky, ke himpody velon̈o. Karaha ty ho izy: ‘Ho avy fotoan̈a, iro jiaby ampasan̈a ao hiboaka.’​—Jaona 5:28, 29; ampiràn̈a aminy Asan’ny Apostoly 24:15.

Iro himpody velon̈o ambony tany eto. Efa tsisy eky filazana manjo, fa filazan̈a mamparavoravo fo momba olo efa natsangana tamy maty. Haravoan̈a tsisy ambaka izy amy zen̈y, lera atsika hitsena iro havantsika miboaka baka ampasan̈a ao!