Fianaragna Faha-3

Azôvy ma Jesosy Kristy Zegny?

Nagnino Jesosy kahiagna Zanaka Zagnahary “talagnolo”? (1)

Ino antony ikahiagna izy “Hafatra”? (1)

Ino dian’i Jesosy tambony tany teto? (2-4)

Ino antony nagnanaovan’i Jesosy fahagagagna? (5)

Ino raha hataon’i Jesosy teteky iô? (6)

1. Jesosy tan-dagnitry tagny talohan’ny naviany tambony tany teto. Tsy hita maso izy tamy zegny. Izy voanalohany raha namboarin’ny Zagnahary. Zegny antony ikahiagna izy Zanaka Zagnahary “talagnolo.” (Kolosianina 1:15; Apokalypsy 3:14) Tamy zegny mbala Jehovah zaraiky fo, boaka iô izy nagnamboatra Jesosy. Nampiasainy amy zay Jesosy hagnamboatra raha hafa jiaby tan-dagnitry tagny ndraiky tan-tany teto. Jesosy “Mpiasa faran’izay mahay.” (Ohabolana 8:22-31; Kolosianina 1:16, 17) Nampiasainy hitaondra hafatranany koa Jesosy. Zegny antony ikahiagna izy “Hafatra.”—Jaona 1:1-3; Apokalypsy 19:13.

2. Jehovah nagniraka Zanany handaiha an-tany aty. Nafindrany tagnaty kibon’i Maria fahignan’i Jesosy. Dikan’izegny, tsy olombelogno baban’i Jesosy. Zegny navian’izy tsisy fahotagna ndraiky antsany. Misy antony telo nagnirahan’ny Zagnahary Jesosy tambony tany teto: 1) Hampianatra atsika ny marigny mikasiky Zagnahary (Jaona 18:37), 2) tsy hivadiky amy Zagnahary foeky beky alaitsika tahaka (1 Petera 2:21), boaka iô 3) hagnano fagnatitry aigninany beky atsika afaka amy fahotagna ndraiky fahafataisagna. Nagnino raha zegny nilaigna?—Matio 20:28.

3. Tsy nagnaraka volagna Zagnahary Adama, lelahy voanalohany. “Fahotagna” ikahian’ny Baiboly zegny. Kaila fahafataisagna sazy namian’ny Zagnahary izy. (Genesisy 3:17-19) Nanjary nisy tsigniny izy boaka tiô, kay tsy nahavita nagnaraka lalàgnan’ny Zagnahary jiaby eky. Aila ny aila, natoe irô, boaka iô naty. Adama namindra fahotagna zegny tamy taranakanany jiaby. Zegny avian’ny olo matoe, marary boaka iô maty. Karakôry namonjiagna olombelogno?—Romanina 3:23; 5:12.

4. Olo tsisy antsany, tantairaka Jesosy, karaha Adama tamin’izy mbala nagnaraka volagna Zagnahary. Tsy nampiragna irô fo, Jesosy nagnaraka volagna Zagnahary nata mare fitsapagna nahazo izy. Kaila afaka nagnamia aignin’olombelogno tsisy antsany nanagnany Jesosy agnifagna vidin’ny fahotagnan’Adama. “Vidim-pagnavaotagna” ivolagnan’ny Baiboly zegny. Taranak’Adama mety ho afaka amy sazin’ny fahafataisagna. Zay olo mino Jesosy afaka mahazo familan-keloko, kay hahazo fiaignana tsisy farany.—1 Timoty 2:5, 6; Jaona 3:16; Romanina 5:18, 19.

5. Tamy Jesosy tambony tany teto, nampahivagna olo marary, nagnamia hanigny olo silaogno, nampijanogno sikilaony. Nata olo aifa maty koa mbala voavelogno Jesosy fo. Nagnino izy nagnano fahagagagna? 1) Nahinakinaka izy mahita olo mijaly kay mba tiany hagnampy irô. 2) Fahagagagna nataony magnambara koa fa izy Zanaka Zagnahary ankitigny. 3) Hagnaboahagna amin’olo magnaraka volagna Zagnahary raha handaiha ataony laira izy Mpanjakan’ny tany.—Matio 14:14; Marka 2:10-12; Jaona 5:28, 29.

6. Naty Jesosy, boaka iô nivilômin’ny Zagnahary ndraiky miragna amin’anjely. Boaka iô, izy nimpody tan-dagnitry. (1 Petera 3:18) Nataon’i Jehovah Mpanjaka izy. Teteky iô, hifoagnany tsisy eky zaka tsy manjary ndraiky jaly jiaby misy ambony tany eto.—Salamo 37:9-11; Ohabolana 2:21, 22.

[Sary, pejy 7]

Tafiditry amy fanompoagnan’i Jesosy: fampianaragna, fagnanaovagna fahagagagna, ndraiky nagnamaizany aigninany hamonjiagna atsika