Fianaragna Faha-4

Azôvy ma Devoly Zegny?

Karakôry nampisy Satana Devoly? (1, 2)

Karakôry amitahan’i Satana olo? (3-7)

Nagnino anao tôkony hanohitry Devoly? (7)

1. Dikan’ny “devoly” zegny, mpavandy ndraiky mpagnaratsy. “Satana” ndraiky, fahavalo na mpanohitry. Io fikahiagna fahavaloben’ny Zagnahary. Anjely tsara, tsisy tsigniny izy tamy voanalohany, nipaitraka tan-dagnitry tagny niaraka tamy Zagnahary. Izy nanjary nagnambony taigna, kay nagniry pilasin’ny Zagnahary hivavahagna.—Matio 4:8-10.

2. Satana nikoragna tamy Eva. Nampiasa bibilava izy tamy zegny. Navandy taminany Satana, beky izy tsy hagnaraka volagna Zagnahary. Satana tamy zegny nagnaratsy Zagnahary amy maha Farany agnabo izy, fôtony nataony zay raha tsy hatokisagna Zagnahary. Izy nivolagna fa tsy mahay mitaondra tsarabe Zagnahary. Izy nagnambara koa fa tsisy olo hanompo Zagnahary izikoa sahiragna. Zegny antony ikahiagna izy Satana Devoly.—Genesisy 3:1-5; Joba 1:8-11; Apokalypsy 12:9.

3. Fitahin’i Satana olo beky hivavaka aminany. (2 Korintianina 11:3, 14) Izy mampiasa fivavahagna diso. Izikoa fivavahagna tsy mampianatra raha marigny mikasiky Zagnahary, dikan’izegny raha tian’i Satana fo ataon-drô. (Jaona 8:44) Olo maro mivolagna fa mivavaka amy Zagnahary marigny irô, kanaifa Satana fo taigna tompoen-drô. Izy “zagnaharin’ny tontolo ty.”—2 Korintianina 4:4.

4. Raha hafa ampiasain’i Satana koa fifandraisagna amy fagnahy ratsy. Olo mety hangataka angôvo amy fagnahy ratsy beky hiaraovan-taigna, hagnozognana olo na hagnambaragna raha mbala hoavy. Satana fo ambadiky raha ratsy jiaby io. Izikoa tiatsika amparavoravo Zagnahary, atsika tsy tôkony hagnano raha misy fifandraisagna amy fagnahy ratsy.—Deoteronomia 18:10-12; Asan’ny Apostoly 19:18, 19.

5. Arisik’i Satana koa olo beky tafiditry laligny amy pôlitiky ndraiky fagnavakavahagna. Mieritreritry irô fa razagnan-drô na tanin-drô fo tsara, kanaifa tsy marigny zegny. (Asan’ny Apostoly 10:34, 35) Sasany ndraiky mihevitry fa afaka mandamigny ra-manahiragna olo jiaby antoko pôlitiky araiky. Nanjary nanohitry Fanjakagnan’ny Zagnahary irô tamy fagnanaovagna zegny, fôtony Fanjakagnan’ny Zagnahary io zaraiky fo aodin’ny ra-manahiragna jiaby mahazo atsika.—Daniela 2:44.

6. Angolen’i Satana koa olo hagniry hagnano raha tsy tian’ny Zagnahary. Jehovah mivolagna fa tsy tôkony hagnano raha ratsy atsika, fôtony hainy fa tsy hampanjary atsika fagnanaovagna zegny. (Galatianina 6:7, 8) Mety hisy olo handrisiky anao hagnano raha ratsy miaraka amin-drô koa. Kanaifa, alaiva onogno fa Satana fo ambadiky raha ratsy jiaby zegny.—1 Korintianina 6:9, 10; 15:33.

7. Satana mampiasa fanohairagna koa beky anao miala amy Jehovah. Mety hisy olo tianao tsy ravoravo mahita anao mianatra Baiboly. Sasany mety magnadroadro anao. Kanaifa, boaka amin-jôvy nazahoanao fahignana? Hampavozo anao fo kendrin’i Satana beky anao tsy hianatra raha mikasiky Jehovah eky. Kaza magneky resin’i Satana! (Matio 10:34-39; 1 Petera 5:8, 9) Zegny faomba hagnambaranao fa tia Jehovah ankitigny anao sady manaohagna fitondrasagnanany.—Ohabolana 27:11.

[Sary, pejy 9]

Olo maro voafitaka fivavahagna diso, fifandraisagna amy fagnahy ratsy ndraiky fitiavagna tanindrazagna

[Sary, pejy 9]

Tohaira Satana amy fanohizagna mianatra maomba Jehovah