Fianaragna Faha-9
Mpivavaka amy Zagnahary Tsy Maintsy Madio
Nagnino atsika tsy maintsy madio amy raha jiaby? (1)
Ino ma dikan’ny fivavahagna madio zegny? (2) Fitondran-taigna madio? (3) saigny madio? (4) Vatagna madio? (5)
Karazagna koragna karakôry aby fady atsika? (6)
1. Madio sady masigny Zagnahary Jehovah. Takiny amy mpivavaka aminany fahadiovagna amy fivavahagna, fitondran-taigna, fisaignana ndraiky vatagna. (1 Petera 1:16) Magnano zegny tsy maora. Atsika mila mifegny mare beky hitan’ny Zagnahary madio fo, fôtony tany pitrahatsika ty maloto. Fagnaraka zegny, atsika malaky voantsory hagnano raha ratsy isan’andra, kay mila miady mare. Fa zegny ndraiky tsy tôkony hahakivy atsika.
2. Fivavahagna madio: Izikoa tiatsika ankitigny hanompo Jehovah, atsika tsy tôkony hagnaraka fampianaragna fivavahagna diso na faombafaombany eky. Atsika tsy maintsy miala malaky sady tsy hanaohagna fivavahagna diso foeky. (2 Korintianina 6:14-18; Apokalypsy 18:4) Atsika koa fa mahay ny marigny mikasiky Zagnahary, tsy maintsy mitandrigny tsao voafitak’olo mampianatra vandy.—2 Jaona 10, 11.
3. Fitondran-taigna madio: Tian’i Jehovah mpivavaka aminany hadio fitondran-taigna amy fotoagna jiaby. (1 Petera 2:12) Hitany raha jiaby ataotsika nata tsisy olo mahita. (Hebreo 4:13) Atsika tsy tôkony haloto fitondran-taigna na hagnaraka raha ratsy fataon’olo tsy tia Zagnahary.—1 Korintianina 6:9-11.
4. Saigny madio: Izikoa saignitsika madio, hadio koa fitondran-taignatsika. (Filipianina 4:8) Fa izikoa ndraiky raha maloto fo ampidiritsika amy jery, atsika hahavita raha tsy manjary. (Matio 15:18-20) Kaila atsika mila mitandrigny amy raha atao laira tsy miasa, tsao magnano raha mety handoto saigny. Atsika mila mianatra Saoratra Masigny beky madio saignitsika.
5. Vatagna madio: Kristianigny misolo taigna Zagnahary, kaila tôkony madio fo vatagnan-drô ndraiky lamban-drô. Tôkony hanasa tagnana atsika izikoa fa boaka an-kabone. Mila manasa tagnana koa atsika izikoa hihinagna na hikarakara hanigny. Anao koa tsisy kabone, tôkony totofagna malotonao. (Deoteronomia 23:13, 14) Ho salama vatagna atsika izikoa madio. Tragnon’ny Kristianigny tôkony hilamigny ndraiky hadio na agnaty zegny na ambailagna. Tôkony aohatra amy fiaraha-monigny irô.
6. Koragna madio: Mpivavaka amy Zagnahary tsy maintsy mivolagna ny marigny fo. Olo mpavandy tsy handova fanjakagnan’ny Zagnahary. (Efesianina 4:25; Apokalypsy 21:8) Kristianigny tsy magnasaha. Irô tsy mitandregny sady tsy magnano koragna, kidikidy ndraiky tantara vaitavaita. Fôtony Kristianigny zatra magnano koragna madio, miavaka irô na alekaoly zegny na ampiasagna na amy fiaraha-monigny.—Efesianina 4:29, 31; 5:3.
[Sary, pejy 18, 19]
Mpivavaka amy Zagnahary tsy maintsy madio amy raha jiaby