Aza Miala amy Fitiavany Zan̈ahary

1, 2. Aia mety hahitantsika fialofan̈a azo antoko aminandra izioty?

OHATRA anao izio tatrany mahalen̈y mare be. Tselatra fo mampazava andra, varatra maresaka. Anao tsy maintsy hizahazaha tany mety hialofan̈a. Tio fo amy zay anao nahita tany araiky amy sisiny lalan̈a mety hialofanao. Tsisy raha hatahoranao amy tany io, sady anao tsy len̈y foeky an̈aty ao. Misora ravoravo anao, sa karakory?

² Fiain̈anantsika izioty koa mira andra ratsy, fotony mahairatsy fo donia ty isanandra. Nahatsara izy, misy tany tsara sady azo antoko mety hialofantsika. Izio miaro atsika amy raha mety handrobaka atsika. Aia ma tany misy izio? Baiboly mivolan̈a karaha ty: “Zaho hivolan̈a amy Jehovah karaha ty: ‘Anao hataoko fialofan̈a ndreky fiarovan̈a fatatra. Anao Zan̈aharinaka fo hatokisako.’ ”​—Salamo 91:⁠2.

3. Karakory hataontsika hialoko amy Jehovah?

³ Hitantsika baka amy zen̈y fa Jehovah niasa atsika ndreky Panjakany raha jiaby io von̈ono sady mahavita miaro atsika. Izy farany mahery, ke tsisy raha manahiran̈a tsy resiny. Akory hataontsika hialoko amy Jehovah? Atsika mila matoky izy. Baiboly mivolan̈a karaha ty: “Aza miala amy fitiavany Zan̈ahary.” (Joda 21) Dikanizen̈y, atsika tsy tokony han̈ano raha hampihen̈y fitiavantsika izy foeky. Atsika koa man̈ano zen̈y, hatoky tsarabe fa izy hiaro atsika. Karakory fo hataontsika hihavan̈a tsarabe amy Zan̈ahary?

FITIAVANY JEHOVAH ATSIKA NDREKY FITIAVANTSIKA IZY

4, 5. Karakory ahitan̈a fa Jehovah ten̈a tia atsika?

⁴ Izikoa tsy tiantsika hiala amy fitiavany Zan̈ahary, atsika mila resy lahatra fa izy tia atsika. Aleva onon̈o raha nampianariny Baiboly hitanao tamy boky ty. Jehovah niasa tany tsara hipitrahantsika. Mbala nataony koa hanin̈y isankarazany, rano igiahin̈y ndreky biby maro mahavarian̈a. Namiany atsika Baiboly, baka atsika mahay an̈aranany ndreky toetrinany. Hitantsika ao koa fa nirahiny tambony tany teto Jesosy, zanany ten̈a tiany, baka io nambelany nijaly ndreky naty nohony fitiavany atsika fo. (Jaona 3:​16) Ino hatsaran̈a ho azontsika baka amy zen̈y? Atsika manjary man̈anten̈a fiain̈ana tsara aminy amaray an̈y.

⁵ Jehovah koa nanangana Fanjakan̈any Mesia andan̈itry an̈y, ke miankiny amy zen̈y hazahoantsika fiain̈ana tsara aminy amaray an̈y. Tsy ho ela izio han̈adoso raha jiaby manahiran̈a atsika ndreky han̈ano tany ty paradisa. Mba iritrireta hely baka raha jiaby zen̈y! Hiadan̈a ndreky ho sambatra mandrakizay anao amy Paradisa ao. (Salamo 37:29) Alohany raha zen̈y ho avy, ambarany Zan̈ahary atsika raha tokony hatao. Ambelany mivavaka aminany koa atsika, ke atsika mety mikoran̈a aminany raha jiaby tiantsika, amy fotoan̈a mety amintsika. Mbala sasany amy raha nataony Jehovah fo zen̈y ahitan̈a fa izy ten̈a tia atsika.

6. Karakory hataonao hamaly fitiavany Zan̈ahary anao?

⁶ Tsara koa atsika man̈ontany karaha ty: “Akory eky hataoko hamaly fitiavany Jehovah zaho?” Maro olo mivolan̈a fa mila tia Zan̈ahary koa atsika. Anao koa mety karaha zen̈y. Jesosy nivolan̈a fa ty didy farany maventy: “Tiava Zan̈aharinao Jehovah amy fonao jiaby ndreky vatan̈anao jiaby, ndreky sain̈inao jiaby.” (Matio 22:37) Maro antony tokony hitiavanao Jehovah. Ke izikoa olo araiky mivolan̈a tia Jehovah, zen̈y ma mivolan̈a fa izy ten̈a tia izy ankitin̈y?

7. Karakory ma olo ten̈a tia Zan̈ahary zen̈y?

⁷ Koran̈iny Baiboly fa fitiavan̈a Zan̈ahary zen̈y tsy vitany tia amy vava fo. Olo araiky koa mieritreritry fa izy tia Zan̈ahary, zen̈y mbala fanombohany ten̈a fitiavan̈a fo. Ohatra, anao koa tihitsabo pomy, anao tsy maintsy mila voany pomy. Anao koa tihina pomy, han̈eky anao izikoa voany fo amian̈a anao? Anao baka tsy han̈eky e! Baiboly mivolan̈a karaha ty: “Dikany tia Zan̈ahary zen̈y mitandrin̈y didinany, fa didinany io fo tsy mavesatra.” (1 Jaona 5:⁠3) Tokony ho hita amy fiain̈ananolo araiky fa izy ten̈a tia Zan̈ahary ankitin̈y.​—Vakia Matio 7:​16-​20.

8, 9. Akory ahitan̈a fa atsika ten̈a tia ndreky mankasitraka Zan̈ahary ankitin̈y?

⁸ Ho hita fa atsika tia Zan̈ahary ankitin̈y, izikoa atsika man̈araka didinany ndreky toro lalan̈anany. Tsy sarotro man̈ano zen̈y, fotony didiny Jehovah jiaby nataony hampasambatra atsika ndreky hanan̈antsika fiain̈ana mahafapo. (Isaia 48:​17, 18) Izikoa atsika man̈araka taridalan̈a Zan̈ahary, ho hita fa atsika ten̈a mankasitraka raha jiaby nataony amintsika. Raha mampalahelo fo, vitsy olo tia man̈ano zen̈y izioty. Tantarainy Baiboly fa Jesosy tambony tany teto nampahivan̈a olo boka folo, fa araiky tamindro io fo nahazo onon̈o nisaotra izy. (Lioka 17:​12-​17) Izikoa atsika ampifidin̈y, tsy maintsy araiky nahay nankasitraka Jesosy in̈y tiantsika harehan̈a!

⁹ Ino aby didiny Jehovah mila tandremantsika? Sasany amindro io efa nianarantsika, fa mbala himpodianantsika. Atsika koa man̈araka didiny Jehovah, atsika tsy hiala amy fitiavan̈anany.

MAN̈ATON̈A JEHOVAH

10. Nan̈ino ma atsika mila mianatra raha momba Jehovah tsarabe?

¹⁰ Izikoa tiantsika han̈aton̈o Jehovah, atsika tsy tokony ho voly hianatra raha momba izy. Atsika koa man̈ano zen̈y, mira olo araiky mamindro alin̈y andra manintsy be in̈y. Mila sosohany fo hazomaty, baka tany misy izy mazava ndreky mafana fo. Mila ampitombosintsika koa fahaizantsika Zan̈ahary amy zay tsy hihen̈y fitiavantsika izy.​—Ohabolana 2:​1-5.

11. Nan̈ano karakory pianatra Jesosy aroe, izikoa fa baka nan̈azavany Soratra Masin̈y?

¹¹ Tiany Jesosy hitombo fo fitiavany pianatranany aby io Jehovah ndreky Soratra Masin̈y, fotony raha koran̈inizio marin̈y ndreky mahatsara atsika. Jesosy koa fa nivilominy Jehovah, izy nampianatra pianatranany aroe lahy raha momba izy efa nambarany Soratra Hebreo. Nan̈ano karakory iro koa fa nan̈azavan̈a Soratra Masin̈y io? Iro nivolan̈a karaha ty: “Tsy karaha nisy motro nizelazela tan̈aty fontsika tao, taminizy nan̈azava tsarabe Soratra Masin̈y tamintsika, taminy atsika tamy lalan̈a tan̈y in̈y?”​—Lioka 24:⁠32.

12, 13. a) Aminandra izioty, nan̈ano karakory fitiavanolo Zan̈ahary ndreky Baiboly? b) Ino raha tokony hataontsika, baka fitiavantsika Jehovah hitombo fo?

¹² Misora ravoravo anao taminy anao vo nahay raha ten̈a ampianariny Baiboly! Maro koa olo nan̈ano karaha zen̈y. Atsika ndraiky tokony hifen̈y fo hankamafy ndreky hampitombo fitiavan̈a Jehovah io, fa tsy han̈ano karaha olo aby amy donia ty. Karaha ty nivolan̈iny Jesosy momba zen̈y: “Fitiavan̈anolo maro hahaihanintsy.” (Matio 24:12) Ino raha tokony hataonao, baka fitiavanao Jehovah ndreky ny marin̈y nianaranao tamy Baiboly hitombo fo?

¹³ Tohiza fo fianaranao momba Jehovah ndreky Jesosy Kristy. (Jaona 17:⁠3) Anao koa fa mamaky Baiboly, iritrireta: ‘Ino raha momba Jehovah ianarako baka amy zen̈y? Ino amy raha ianarako ty ma tokony handrisiky zaho ho tia Jehovah amy fonaka, jerinaka ndreky vatan̈anaka jiaby?’ ( Vakia 1 Timoty 4:​15.) Hitombo fo fitiavanao Jehovah, izikoa isaka anao mianatra Baiboly mangala onon̈o karaha zen̈y.

14. Izikoa tiantsika hitombo fo fitiavantsika Jehovah, nan̈ino atsika mila mivavaka isanandra?

¹⁴ Mila mazoto mivavaka koa atsika, baka hafana tsarabe fitiavantsika Jehovah. (1 Tesalonianina 5:​17) Efa nianarantsika tamy Toko faha-17 tamy boky ty fa vavaka io kado baka amy Zan̈ahary. Izikoa olo kamarady mifampikoran̈a matetiky, hahay hifankatia fo iro. Karaha zen̈y koa atsika izikoa fa mivavaka amy Jehovah isanandra. Atsika tsy tokony han̈ano vavaka tsianjery fa tokony ho raha baka amy fontsika koran̈intsika aminany, karaha ataony tsaiky araiky mikoran̈a amy babany ten̈a tiany in̈y. Atsika tsy tokony hisalasala hikoran̈a aminany, fa izy fo tokony hataontsika ampan̈ajan̈a. (Salamo 62:⁠8) An̈isany raha maventy amy fanompoantsika Zan̈ahary koa fan̈anovan̈a fianaran̈a manokan̈a ndreky vavaka baka amy fo. Zen̈y han̈ampy atsika tsy hiala amy fitiavany Zan̈ahary.

MIRAVORAVOA KOA FA MAN̈ANO FANOMPOAN̈A

15, 16. Ino ivolan̈ana fa voninahitry ndreky harian̈a mikoran̈a aminolo vaovao tsara mikasiky Fanjakan̈a Zan̈ahary io?

¹⁵ Mety tsy ho hitanolo atsika mianatra manokan̈a Soratra Masin̈y ndreky mivavaka. Misy ndraiky fanompoan̈a hitanolo jiaby. Karaha ataony lera atsika mikoran̈a aminolo raha inoantsika. Asa anao mba efa nikoran̈a taminolo raha nianaranao tamy Baiboly? Ten̈a tsara anao koa fa nan̈ano zen̈y. (Lioka 1:​74) Fan̈ambaran̈a vaovao tsara mikasiky Fanjakan̈any Zan̈ahary io asa maventy nirahiny Jehovah ndreky Jesosy ataony ten̈a Kristianin̈y.​—Vakia Matio 24:14; 28:​19, 20.

¹⁶ Ten̈a tiany apostoly Paoly asa io, fotony harian̈a nivolan̈any izio. (2 Korintianina 4:⁠7) Tsisy asa tsara mandilatra mikoran̈a aminolo raha momba Jehovah ndreky raha mbala hataony. Izy Tompo farany an̈abo amy raha jiaby, ke atsika koa manompo izy fo, maro hatsaran̈a ho azontsika. Ke anao koa mitory, ho vitanao han̈ampy olo maro han̈aton̈o Babantsika andan̈itry an̈y, ndreky handeha amy lalan̈a mandeha amy fiain̈ana tsisy farany! Tsisy asa tsara mandilatra zen̈y! Anao koa mikoran̈a aminolo raha inoanao, finoan̈anao ho fatatra tsarabe. Hitombo koa fitiavanao Jehovah. Izy ho ravoravo anao koa mifen̈y mikoran̈a raha momba izy. (Hebreo 6:​10) Anao koa mazoto mitory fo, anao tsy hiala amy fitiavany Zan̈ahary.​—Vakia 1 Korintianina 15:⁠58.

17. Nan̈ino ma anao tsy tokony hangataka andra hitory?

¹⁷ Aza adin̈a fa fitorian̈a io asa ten̈a meky. Baiboly mivolan̈a karaha ty: ‘Toria volan̈a io, aza mangataka andra man̈ano izio.’ (2 Timoty 4:⁠2) Nan̈ino ma izio ten̈a asa meky? Baiboly mivolan̈a karaha ty: ‘Efa marikitry andrany Jehovah; efa marikitry sady mahaimarikitry fo izio.’ (Zefania 1:​14) Efa tsy ela eky Jehovah handravan̈a donia ratsy ty, ke zen̈y mahavy olo jiaby mila ampitandremin̈y. Tokony ho haindro fa izioty fotoan̈a hifidianan̈a Jehovah Pitondra atsika, fotony farany io ‘tsy mety ho tara.’​—Habakoka 2:⁠3.

18. Nan̈ino ma atsika tokony hanompo Jehovah miaraka aminolo ten̈a Kristianin̈y?

¹⁸ Tiany Jehovah atsika hanompo izy miaraka aminolo ten̈a Kristianin̈y. Zen̈y mahavy Baiboly mivolan̈a: “Tsara atsika mba mifampandiniky ke handrisiky amy fitiavan̈a ndreky asa tsara, ke aza manapatapaka fivorian̈a, karaha sasany efa zatra tsy mivory io, fa hifankahery fo, fotony hitanaro tsarabe fa efa marikitry andra io.” (Hebreo 10:​24, 25) Atsika mila mivory miaraka amy piaramanompo amintsika, amy zen̈y atsika afaka midera ndreky manompo Zan̈aharintsika io. Afaka mifankahery amy piaramanompo koa atsika amy zen̈y.

19. Karakory tokony hataontsika, baka atsika ho tia olo fiangonan̈a araiky amintsika?

¹⁹ Atsika koa zatra mivory miaraka amy Vavolombelon̈o Jehovah, hitombo fitiavantsika namantsika ndreky fihavan̈antsika amindro. Aleva onon̈o fa olo miaraka mivory amintsika io mba mahay diso mira atsika fo. Ke atsika tokony hizaha toetry tsarandro fo, karaha ataony Jehovah amintsika. ( Vakia Kolosianina 3:⁠13.) Tsy mira koa raha vitantsika amy fanompoan̈a Jehovah. Mitadiava naman̈a ten̈a tia Jehovah, amy zen̈y anao hazoto hanompo izy. Anao koa manompo izy miaraka amy rahalahinao ndreky anabavinao kristianin̈y, anao tsy ho tafiala amy fitiavany Zan̈ahary. Ino raha hamiany Jehovah zay olo tsy mivadiky aminany?

MIFEN̈A BAKA MAHAZO “TEN̈A FIAIN̈ANA”

20, 21. Ino ma “ten̈a fiain̈ana” zen̈y? Nan̈ino ma atsika ten̈a tokony han̈iry izio?

²⁰ Jehovah tsy mety han̈adin̈a olo manompo izy, ke izy han̈amia iro fiain̈ana. Karakory fahitanao fiain̈ananao izioty? Mba efa ten̈a fiain̈ana edy? Maro olo mivolan̈a fa iro efa nahazo ten̈a fiain̈ana. Atsika io koa efa miain̈y, mihina ndreky migiaka. Velon̈o ankitin̈y atsika io. Mety hivolan̈a karaha ty olo araiky koa fa an̈atiny hasambaran̈a: “Tsara velon̈o e!” Izikoa Baiboly zahan̈a, mbala tsendriky ten̈a miain̈y olo izioty.

²¹ Baiboly mivolan̈a fa atsika tokony “hitana mare ten̈a fiain̈ana.” (1 Timoty 6:​19) Dikanizen̈y, ten̈a fiain̈ana io raha mbala ho avy. Atsika amy zen̈y ho lavorary, hipetraka amy tany paradisa, fotony zen̈y raha tiany Jehovah hatao rango tamy voanalohany tan̈y. Atsika koa tsy harary fa hiadan̈a ndreky ho ten̈a sambatra tsisy farany. (1 Timoty 6:​12) Karaha zen̈y fiain̈ana irintsika, sa karakory?

22. Karakory ma ‘hitanantsika ten̈a fiain̈ana io’?

²² Karakory ma ‘hitanantsika ten̈a fiain̈ana io’? Apostoly Paoly nivolan̈a fa atsika mila man̈ano ny tsara ndreky manankarian̈a aminy asa tsara jiaby. (1 Timoty 6:​18) Izikoa tiantsika hahazo ten̈a fiain̈ana, atsika mila man̈ano raha mifan̈araka amy raha nianarantsika tamy Baiboly. Tsy vangany fanompoan̈a ataontsika fiain̈ana tsisy farany io, fa kado hamiany Zan̈ahary. (Romanina 5:​15) Ravoravo Jehovah mahita olonany tsy mivadiky, ke zen̈y mahavy izy han̈amia iro kado io. Tiany koa anao hahazo “ten̈a fiain̈ana.” Zay olo tsy miala amy fitiavany Zan̈ahary fo ho sambatra, hiadan̈a, ndreky hiain̈y tsisy farany.

23. Ino mahatsara atsika tsy miala amy fitiavany Zan̈ahary?

²³ Atsika tsiaraikiaraiky tokony han̈ontany karaha ty: ‘Zaho ty ma mba manompo Zan̈ahary mifan̈araka amy raha koran̈iny Baiboly?’ Atsika koa man̈ano zen̈y isanandra, atsika efa amy lalan̈a mandeha amy fiain̈ana tsisy farany. Atsika afaka matoky fa Jehovah ten̈a mety hataontsika fialofan̈a ankitin̈y. Izy han̈ampy olonany tsy mivadiky hamakivaky fiain̈ana ratsy amy donia ty. Jehovah koa han̈avotro atsika, baka atsika ho tafitsaka amy Paradisa efa tsy ho ela io. Ten̈a ho ravoravo ankitin̈y atsika amy zen̈y! Ke izikoa rango izioty atsika efa mifidy Jehovah pitondra atsika, atsika ho ravoravo, baka io hahazo fiain̈ana tsisy farany koa aminy amaray an̈y!