Nan̈ino ma Anao Tokony Hivory Miaraka Aminay?

Maro olo efa tsy mandeha mivavaka eky, fotony iro tsy afapo amy fivavahan̈andro. Amy Vavolombelon̈o Jehovah tsy karaha zen̈y. Nan̈ino ma anao taominay hivory hiaraka aminay? Anao koa ma avy an̈y, ino raha ho hitanao an̈y?

Anao hahita olo ravoravo ndreky ten̈a tia olo an̈y. Kristianin̈y aby tamy faha apotsoly aby io tan̈y nivory isaka fiangonan̈a nisy izy, ke tan̈y iro niaraka nandiniky Soratra Masin̈y, ndreky nifanohan̈a. (Hebreo 10:24, 25) Iro ten̈a nifankatia, mira olo kibo araiky. (2 Tesalonianina 1:3; 3 Jaona 14) Mira zen̈y koa zahay koa fa mivory.

Ianaran̈a an̈y akory atao man̈araka toro lalan̈a Baiboly. Mira tamy faha Israelita aby io fo, olo jiaby niaraka nivory, na lelahy na man̈angy na tsaiky. Lelahy efa mahay Baiboly tsarabe mampianatra zahay hahay han̈araka toro lalan̈a Baiboly isanandra. (Deoteronomia 31:12; Nehemia 8:8) Olo jiaby an̈y miaraka mihira, izikoa fa lera mihira. Izikoa fa lera mianatra, olo jiaby mahazo mivolan̈a hevitrinany.—Hebreo 10:23.

Fivorian̈a io koa mampafatatra finoan̈a. Karaha ataony apostoly Paoly, tsy din̈iny lera hahitany iro Kristianin̈y ta Roma, fotony mampafatatra finoan̈anany mikoran̈a amindro namany aby io. (Romanina 1:11, 12) Mampafatatra finoan̈anay koa mahita namanay aby io, ke zen̈y mahavy zahay mazoto mivory ndreky von̈ono fo han̈araka volan̈a Zan̈ahary.

Zahay mikaiky anao ho avy amy fivorian̈a ataonay amy man̈araka, ahitanao raha jiaby nikoran̈inay tio in̈y. Ravoravo zahay handray anao an̈y. Tsisy tanty rakitry an̈y.

• Karakory ma ataony Vavolombelon̈o Jehovah koa fa mivory?

• Ino mahatsara atsika mandeha mivory?