Karakory ma Atao Man̈oman̈a Fivorian̈a?

Anao koa fa mianatra Baiboly amy Vavolombelon̈o Jehovah, iro mandrisiky anao han̈oman̈a fianaran̈a. Tsara izikoa anao zatra man̈oman̈a fivorian̈a alohany andra ivorian̈a.

Anao mila mizaha andra ndreky lera mety aminao. Lera karakory ma ten̈a mety aminao? Maraindrain̈y sa alohany anao hiasa sa hariva sa lera tsaiky jiaby efa mandry? Fan̈omanan̈a fivorian̈a io koa mety atao tsihelihely. Anao fo mila man̈aja fotoan̈a helinao in̈y, baka mahavita man̈oman̈a. Baka anao tsy ho voatabataba, tsara izikoa vonen̈a radio, tele ndreky telefony. Mila mivavaka koa anao alohany han̈oman̈a, baka jerinao jiaby amy raha ianaranao io.—Filipianina 4:6, 7.

Tsipìha valiny hitanao, baka io zahava aia anao mety mamaly. Anao koa fa mahazo boky misy fianaran̈a, zahava antsendriky raha jiaby momba fianaran̈a io. Zahava titranany, titra aby an̈ivony fianaran̈a an̈y, raha tiany fianaran̈a io koran̈iny, sary ndreky fan̈ontanian̈a vitsivitsy momba fianaran̈a io. Vakia amy zay fehintsoratra tsiaraikiaraiky, ndreky fan̈ontanian̈a fan̈araka aminany. Anao koa fa mitsipiky valiny amy bokinao, ten̈a valiny fo tsipìha fa tsy volan̈a jiaby ao. Izikoa anao fa mahita toko ndreky andininy amy Baiboly, zahava ino ifandraisany raha ianaranao io amy toko ndreky andininy nivakin̈y. (Asan’ny Apostoly 17:11) Anao amy zay koa fa avy amy fivorian̈a an̈y, aza mavozo manangantan̈ana, baka io ataova amy volan̈a ahaizanao izy fo raha valinao.

Malaky mahay raha momba Zan̈ahary anao, koa mazoto man̈oman̈a fivorian̈a jiaby.—Matio 13:51, 52.

• Ino raha tokony hataonao baka anao zatra man̈oman̈a fivorian̈a?

• Mila man̈ino anao baka mahavita mamaly fan̈ontanian̈a amy fivorian̈a an̈y?