Karakory ma Ataonay Mitory Aminolo Jiaby Io?

Izikoa efa tsy ela ho avy andra hifatesany Jesosy, izy nivolan̈a karaha ty: ‘Hambara amy tany jiaby misy olo vaovao tsara mikasiky fanjakan̈a ty, baka firenena jiaby ambony tany maharen̈y.’ (Matio 24:14) Karakory ma ahavitan̈a zen̈y? Mila man̈araka raha nataony Jesosy, taminizy tambony tany teto.—Lioka 8:1.

Zahay man̈aton̈o olo antran̈o. Jesosy ndreky pianatranany nandeha isaka tran̈onolo, nan̈ambara vaovao tsara mikasiky fanjakan̈any Zan̈ahary. (Matio 10:11-13; Asan’ny Apostoly 5:42; 20:20) Iro nandeha nitory io, efa nampianarin̈y iro raha tokony hatao ndreky tany itorian̈a. (Matio 10:5, 6; 2 Korintianina 10:13) Mira zen̈y koa zahay. Fiangonan̈a tsiaraikiaraiky samy manan̈a tany itorian̈a. Zen̈y mahavy zahay mahavita ‘man̈ambara vaovao tsara aminolo jiaby ambony tany’ nivolan̈iny Jesosy in̈y.—Asan’ny Apostoly 10:42.

Zahay mikoran̈a aminolo jiaby. Tsy tantran̈olo fo Jesosy nitory, fa tamy zay tany nahitany olo koa. (Marka 4:1; Jaona 4:5-15) Zahay koa mikoran̈a aminolo tomabily araiky aminay ndreky olo fanojy zahay amy lalan̈a. Zahay koa mitory amy telefony, amy jirany, aminolo fiasan̈a araiky aminay, lekoly araiky aminay, ndreky havanay. Raha jiaby zen̈y mahavy olo amy tany jiaby maharen̈y ‘vaovao tsara mamonjy olo’ io.—Salamo 96:2.

Vaovao tsara karaha zen̈y tsara ambara naman̈a. Azovy ma olo fankazatra aminao, mba tianao hikoran̈ana vaovao tsarany Fanjakan̈any Zan̈ahary io? Aton̈a izy.

• Ino ma ‘vaovao tsara’ mila ambara olo io?

• Nan̈ino ma atsika mivolan̈a fa mira raha nataony Jesosy fo raha ataony Vavolombelon̈o Jehovah koa fa mitory?