Ino ma Pisava Lalan̈a Zen̈y?

Olo ‘Pisava lalan̈a’ zen̈y, olo misava lalan̈a himboanolo na olo irahin̈y han̈ano asa amy tany araiky. Jesosy efa navy pisava lalan̈a, fotony izy nirahin̈y tambony tany taty hitory ndreky hampianatra ny marin̈y, baka atsika voavonjy ndreky hanohy asa nataony io. (Matio 20:28) Pianatra Jesosy jiaby koa man̈ano karaha nataony, fotony iro mandany ankamarozany fotoan̈andro ampianaran̈a olo Baiboly. (Matio 28:19, 20) Sasany mahavita man̈ano pisava lalan̈a.

Pisava Lalan̈a zen̈y olo afaka mandany fotoan̈a be amy fitorian̈a ndreky fampianaran̈a Baiboly. Vavolombelon̈o Jehovah jiaby mitory vaovao tsara aby. Sasany manakatra 70 lera isaka fanjava. Pisava lalan̈a maharitry an̈aranizen̈y. Ankamarozandro io miasa tapakandra. Sasany koa miala tanàna, mandeha amy tany mbala mila pitory maromaro, man̈ano 130 lera isaka fanjava. Pisava lalan̈a manokan̈a an̈aranizen̈y. Olo man̈ano pisava lalan̈a io tsy mitady raha maro amy fiain̈ana, fotony iro mahatoky fa Jehovah han̈amia zay raha ilaindro. (Matio 6:31-33; 1 Timoty 6:6-8) Zay olo tsy mahavita man̈ano karaha iro io, mety man̈ano 30 na 50 lera an̈atiny fanjava araiky na mandilatra zen̈y. Pisava lalan̈a pan̈ampy an̈aranizen̈y.

Fitiavan̈a Zan̈ahary ndreky fitiavan̈a olo mahavy olo man̈ano pisava lalan̈a io. Jesosy nahinakinaka nahita olo maro tsy nahay ny marin̈y mikasiky Zan̈ahary. Mbala maro koa izioty olo tsy mahay ny marin̈y. (Marka 6:34) Fitiavan̈a Zan̈ahary ndreky fitiavan̈a olo karaha zen̈y mahavy zahay man̈ambara raha hainay baka amy Baiboly. Fitiavan̈a zen̈y koa mandrisiky olo sasany aminay han̈ano pisava lalan̈a. (Matio 22:39; 1 Tesalonianina 2:8) Marin̈y ankitin̈y fa iro mandany fotoan̈a ndreky angovo han̈anovan̈a zen̈y, kanefa fan̈anovan̈a asa io mankafatatra finoan̈andro ndreky mampasambatra iro, fotony iro tsara fihavan̈ana amy Zan̈ahary.—Asan’ny Apostoly 20:35.

• Karakory ma pisava lalan̈a zen̈y?

• Ino ma raha aroe tokony handrisiky olo han̈ano pisava lalan̈a?