Ino aby Fiofan̈ana Ataony Pisava Lalan̈a?

Efa rango ela, Vavolombelon̈o Jehovah mampan̈ano fiofa­n̈ana momba Baiboly. Misy fampiofan̈ana manokan̈a natao han̈ampian̈a iro pisava lalan̈a aby io hankatsara fanompoan̈a ataondro.​—2 Timoty 4:⁠5.

Fianaran̈a Ataonolo Pisava Lalan̈a Maharitry. Olo pisava ­lalan̈a maharitry nahatapitry taon̈o araiky farany hely mahazo man̈ano fiofan̈ana io, an̈atiny tsiota andra. Amy Tran̈o ­Fivorian̈a an̈anovan̈a izio. Fiofan̈ana io mankatsara fihavan̈andro amy Jehovah, ndreky mahavy iro hankatsara fahaizandro mitory ndreky mampianatra, baka io han̈ampy iro ­hahadin̈y aminy asa io.

Fiofan̈any Pitory Momba Fanjakan̈any Zan̈ahary. An̈atiny ­fanjava aroe an̈anovan̈a izio. Vavolombelon̈o Jehovah efa ­pisava lalan̈a efa ela, lelahy ndreky man̈angy manambady na tsy manambady, an̈elan̈elan̈a 23 taon̈o ndreky 65 taon̈o, mahazo man̈ano izio. Iro io man̈araka raha nataony Jesosy, araiky pitory vaovao tsara ten̈a miavaka tambony tany in̈y, ke von̈ono handeha amy zay tany han̈irahan̈a iro. (Isaia 6:⁠8; ­Jaona 7:29) Tsy mora miova tanàna zen̈y, fotony maro raha tsy mahazatra. An̈atinizen̈y hanin̈y, fombantany ndreky toetrandra. Misy koa sasany mila mianatra volan̈anolo amy tany han̈irahan̈a izy io. Ino antony nan̈anovan̈a fiofan̈ana io? Izio man̈ampy iro pisava lalan̈a aby io hankatsara toetrindro, baka ho vitandro tsarabe fanompoan̈a ataondro ndreky hahavy iro mety ampiasainy Jehovah ndreky fandaminan̈anany.

Fianaran̈a Baiboly Ataony Misionera a Gileada. Dikany ­Gileada zen̈y amy volan̈a hebreo ‘vato vavolombelon̈o.’ ­Fampianaran̈a misionera io efa nanomboko tamy taon̈o 1943. Efa mandilatra 8 000 iro nan̈araka fiofan̈ana io nanjary misionera, mitory ‘amy tany farany lavitry ambony tany.’ (Asan’​ny Apostoly 13:47) Nahomby fampianaran̈a iro io. ­Karaha ataony ta Pérou izioty, nisy fiangonan̈a mandilatra 1000, kanefa tan̈y taloha tsisy fiangonan̈a foeky. Mira zen̈y koa Japon. Tamy misionera aby io tsendriky navy tan̈y, mbala tsy ampy folo Vavolombelon̈o Jehovah tan̈y. Izioty, efa mandilatra 200 000 iro an̈y. Azovy aby mahazo man̈ano izio? Pisava lalan̈a manokan̈a, misionera, betelita, piandraikitry faritry. An̈atiny dimy fanjava iro mandalin̈y Soratra Masin̈y. Zen̈y han̈ampy iro hahavita tsarabe asa fitorian̈a atao eran­tany io, ndreky hankafatatra finoan̈anolo hafa koa.

• Ino ma dikany nan̈anovan̈a Fianaran̈a Ataony Pisava Lalan̈a Maharitry io?

• Olo karakory ma mety man̈ano Fiofan̈any Pitory Momba Fanjakan̈any Zan̈ahary io?