Fianaran̈a 15

Ino ma Asandro Antipan̈ahy aby Io?

Antipan̈ahy mikoran̈a aminolo amy fiangonan̈a — Failandy

antipan̈ahy amy fiangonan̈a mampianatra amy fivorian̈a — Mampianatra

antipan̈ahy amy fiangonan̈a mankahery naman̈a amy fiangonan̈a — Mamangy antran̈o

antipan̈ahy amy fiangonan̈a mitory — Mitory

Olo mampianatra amy fiangonan̈anay tsy karamain̈y. Izio mira tamy faha apostoly aby io fo. Iro nirahin̈y hikarakara olony Zan̈ahary. (Asan’ny Apostoly 20:28) Iro io lelahy mahay mampianatra Soratra Masin̈y tsarabe ndreky man̈araka volan̈a Zan̈ahary. Iro tsy tiren̈y mikarakara fiangonan̈a, fa amy fondro jiaby. (1 Petera 5:1-3) Ino aby ma asa ataondro amy fiangonan̈a?

Iro mikarakara ndreky miaro fihavan̈antsika amy Zan̈ahary. Iro mampianatra atsika raha baka amy Soratra Masin̈y, baka atsika ho tsara fihavanan̈a amy Zan̈ahary. Haindro tsarabe fa Zan̈ahary nan̈iraka iro hikarakara atsika. Zen̈y mahavy iro mizaha raha mahatsara atsika, baka atsika ravoravo. (2 Korintianina 1:24) Karaha ataony tsiman̈aja araiky mahay aombinany jiaby an̈aty vario in̈y, iro io koa mahay olo jiaby amy fiangonan̈a ao.—Ohabolana 27:23.

Iro mampianatra atsika han̈ano sitrapony Zan̈ahary. Isaka herin̈andra, misy antipan̈ahy mitariky fivorian̈any fiangonan̈a, ke zen̈y mankafatatra finoan̈antsika. (Asan’ny Apostoly 15:32) Iro koa mitariky lera mitory vaovao tsara. Iro tsy raha man̈iraka olo handeha hitory fo, fa mbala miaraka mitory aminolo jiaby koa. Iro koa mampianatra olo mankatsara fitorian̈a ndreky fampianaran̈a.

Iro mankahery olo tsiaraikiaraiky. Misy lera iro mikaiky olo amy Tran̈o Fivorian̈a ao, mankahery olo ndreky mikoran̈a torohevitry baka amy Baiboly. Misy lera koa iro io mamangy antran̈o.—Jakoba 5:14, 15.

Ankamarozandro io koa tsy maintsy miasa, mamelon̈o vadindro ndreky zanakandro, baka io mbala mandany fotoan̈a miaraka amindro. Zen̈y mahavy atsika mila man̈aja iro.—1 Tesalonianina 5:12, 13.

Ino aby asandro antipan̈ahy aby io?
Karakory ahitan̈a fa ten̈a mikarakara atsika ankitin̈y iro antipan̈ahy aby io?