Azovy ma ‘Panompo Atokisan̈a Ndreky Mahadiniky Raha’ Zen̈y?

Nisy koran̈a matomboko nataony Jesosy tamy pianatranany, tsy ela talohany nifatesany. An̈isanizen̈y Petera, Jakoba, Jaona ndreky Andrea. Tamy zen̈y izy nikoran̈a tamindro raha handalo amy andra farany, baka io izy nivolan̈a karaha ty: ‘Azovy ma ten̈a panompo atokisan̈a ndreky mahadiniky raha, hirahiny sefonany han̈amia hanin̈y olonany, amy lera ilandro izy?’ (Matio 24:3, 45; Marka 13:3, 4) Jesosy nan̈amia toky apostolinany aby io fa lera izy mipody andan̈itry an̈y, izy han̈iraka panompo han̈amia hanin̈y olonany, fotony izy ‘sefondro.’ Azovy aby ma ‘panompo’ tiany Jesosy koran̈iny io?

Panompo io lelahy vitsivitsy voahosotro fan̈ahy masin̈y. Karaha rahalahiny Kristy ambony tany eto iro io, irahiny han̈amia hanin̈y olony Jehovah amy lera ilandro izy, ke han̈ampy iro olo ten̈a tia Jehovah ho tsara fihavanan̈a amy Jehovah. Zen̈y koa mivolan̈a fa hanin̈y tiany koran̈iny io tsy hanin̈y ankitin̈y, fa boky momba Baiboly, fivorian̈a ndreky fivoriambe.—Lioka 12:42.

Mikarakara fanan̈ana Zan̈ahary ambony tany eto koa panompo io. (1 Timoty 3:15) Jesosy nan̈iraka panompo io hikarakara fandaminan̈a Jehovah ambony tany eto. Nirahiny koa iro hitariky asa fitorian̈a ndreky hampianatra atsika amy fiangonan̈a. Iro io han̈amia atsika raha ilaintsika amy lera ilantsika izy. Baka amy boky ndreky gazety han̈anovandro zen̈y.

Iro panompo io atokisan̈a marin̈y, fotony iro man̈ambara ny marin̈y koran̈iny Baiboly fo, ndreky mitory vaovao tsara nan̈irahan̈a iro. Iro io koa mahadiniky raha, fotony haindro tsarabe raha tokony hatao hikarakaran̈a fanan̈ana Kristy, an̈isanizen̈y olonany ambony tany eto. (Asan’ny Apostoly 10:42) Jehovah mitahy asandro io. Zen̈y mahavy olony Jehovah mahaimaro fo ndreky mahavita man̈azava Baiboly.—Isaia 60:22; 65:13.

• Azovy ma nirahiny Jesosy hikarakara olonany ambony tany eto?

• Nan̈ino atsika mivolan̈a fa panompo io atokisan̈a ndreky mahadiniky raha?