Davida Tsy Navozo

Anao koa mavozo, ino raha ataonao?... Anao mety mikaiky mamanao na papanao. Misy olo hafa koa tokony tsaroanao. Tsisy olo mahadin̈y angovonany. Azovy zen̈y koa hainao?... Jehovah. Atsika hizaha tantarany tsaiky lelahy araiky amy Baiboly ao, Davida an̈arany. Izy tsy navozo, fotony hainy fa Jehovah han̈ampy izy fo.

Rango Davida mbala hely efa nampianariny raimandreniny ho tia Jehovah. Zen̈y nahavy Davida tsy navozo foeky. Hainy tsarabe fa Jehovah kamaradinany io han̈ampy izy fo. Tandraraiky, Davida niambin̈y ondrikondriky, nisy lion maventy hitany. Ondrikondrikinany araiky efa tan̈aty vavany lion io! Karakory eky nataony Davida? Nian̈iny lion io, baka io nivoneny. Tan̈anany fo namonoany lion io! Nisy orsy araiky koa mila hamono ondrikondrikinany, ke nivoneny koa! Azovy nan̈ampy Davida namono biby aby io?... Ia, Jehovah.

Tandraraiky koa, Filistiny aby io niady tamindro Israelita aby io. Davida tamy zen̈y koa tsy navozo foeky. Nisy Filistiny araiky zay lava be ndreky fatatra oe. Goliata an̈arany. Izy nan̈adroadro Jehovah ndreky iro maramila israelita aby io. Izy nikaiky iro hiady aminany. Maramila jiaby navozo Goliata. Davida koa fa naharen̈y zen̈y, izy nivolan̈a tamy Goliata: ‘Zaho pare hiady anao! Aia imboanao tsy ho resy! Raha Jehovah han̈ampy zaho!’ Sakiny Davida ankitin̈y ma Goliata io?... Ia, fotony izy tsy navozo. Karakory eky nataony Davida niady izy?

Davida nangala pilotronany ndreky vato malamatra dimy. Izy amy zay nan̈aton̈o Goliata. Nitokiky Goliata nahita Davida hely in̈y! Davida nivolan̈a taminany: ‘Anao man̈aton̈o zaho amy sabatra, fa zaho man̈aton̈o anao aminy an̈arany Jehovah.’ Izy nangala vato araiky nataony tamy pilotronany. Raha io koa fa nalefany in̈y, navoa laharany Goliata! Lavo Goliata, baka io naty! Nilefa iro Filistiny aby io. Azovy nan̈ampy Davida niady Goliata fatatra be in̈y?... Jehovah, fotony Jehovah mbala fatatra mandilatra Goliata!