TOKO 13
Niakatra Fitsaran̈a Vahoakany Fanjakan̈a Io
1, 2. a) Ino raha nataony pitondra fivavahan̈a aby io, baka io ino raha nataondro apostoly aby io? b) Ino raha nivolan̈indro apostoly aby io izikoa iro fa nisakan̈ana tsy hitory eky?
TAON̈O 33 tamy zen̈y. Mbala vo tsy ela nivitany Pantekoty, sady mbala vaovao mare fiangonan̈a kristianin̈y ta Jerosalema. Zen̈y nahavy Satana nieritreritry fa mety tsara izikoa aminio izy tafihin̈y, amy zen̈y ravan̈a edy. Direkty nataony raha hahavy iro pitondra fivavahan̈a aby io hisakan̈a asa fitorian̈a. Ndray zen̈y, apostoly aby io tsy navozo zen̈y foeky, fa iro nitory fo. Ke maro lelahy ndreky man̈angy nanjary “nino Tompo.”—Asa. 4:18, 33; 5:14.
Ravoravo apostoly aby io fotony “natao man̈eva alain̈y baraka” nohony an̈arany Jesosy
2 Iro pitondra fivavahan̈a aby io neloko mare ke nigadraindro apostoly jiaby. Fa taminy alin̈y io fo, nibiafiny anjeliny Jehovah varavaran̈any prizon aby io ke tafiboaka iro. Mbala maraindrain̈y be andra, iro efa loso nandeha nitory edy! Nimpody voasambotro ndraiky koa iro, fotony iro efa nisakanan̈a tsy hitory eky kanefa mbala nan̈ano fo. Ke iro nindesin̈y man̈oloan̈a iro pitondra fivavahan̈a tamy Fitsaran̈a Avo Jiosy. Fa iro apostoly aby io tsy navozo foeky nivolan̈a karaha ty: “Zan̈ahary fo tsy maintsy arehanay volan̈a fa tsy olo, fotony izy pitondra zahay.” Nahairomotro fo pitondra fivavahan̈a aby io, ke “tiandro hivonen̈a” foeky apostoly aby io. Fa tamy zen̈y, Gamaliela, izio olo an̈abo salakady papianatra lalàn̈a, nampitandrin̈y fitsaran̈a io karaha ty: “Ambilà iro lelahy aby io fa aza kotabesin̈y.” Mahagaga fa narehany fitsaran̈a io volan̈anany zen̈y, ke nivotsorandro iro apostoly aby io. Niaraka iro nafaka, apostoly aby io “tsy voly nampianatra ndreky nitory vaovao tsara momba Kristy Jesosy.”—Asa. 5:17-21, 27-42; Ohab. 21:1, 30.
3, 4. a) Ino tetiky ampiasainy Satana firaka amy zioty? b) Ino raha hidinihintsika amy toko ty ndreky amindro toko aroe fan̈araka ty?
3 Tamy zen̈y sambany nisy manampahifan̈a nanakan̈a Kristianin̈y tsy hitory, ke nitory iro tamy fitsaran̈a. (Asa. 4:5-8; 16:20; 17:6, 7) Fa iro tsy nijanon̈o tio. Mbala ataony Satana fo raha hisakanan̈a atsika tsy hitory eky. Izy mandrisiky olo hivolan̈a raha ratsy momba atsika amy manampahifan̈a an̈y. Atsika, ohatra, ataondro fa pan̈akorontan̈a vahoaka zen̈y, mandrisiky olo hivadiky, avio koa pivarotro boky. Ndraikindraiky afera io alefantsika amy fitsaran̈a, izikoa fa hitantsika fa zen̈y hevitry mety. Alo atsika hizaha afera vitsivitsy nindesin̈y man̈oloan̈a fitsaran̈a ndreky didimpitsaran̈a naboaka tamy zen̈y. Ho hitanao fa didimpitsaran̈a aby io ten̈a mahatsara anao, sady iro io koa nan̈ampy atsika ‘hiaro vaovao tsara ndreky hifen̈y hahazo zo aradalàn̈a hitory momba izio.”—Fil. 1:7.
4 Ho hitantsika amy toko ty ato fa nisy Vavolombelon̈o Jehovah nandeha tamy fitsaran̈a nitaky zondro hitory. Amy toko aroe fan̈araka ty ndraiky atsika hahita fa nisy tamindro koa nandeha tamy fitsaran̈a fotony tsy nan̈eky hanjary an̈isany donia ty, sady tihan̈araka fitsipiky Jehovah fo.
Vahoakany Fanjakan̈any Zan̈ahary ma pan̈akorontan̈a olo?
5. Nan̈ino nisy Vavolombelon̈o Jehovah nisamborin̈y ta Etazonỳ, taloha heliny 1940, baka io nieritreritry han̈ino iro rahalahy tamy foibe?
5 Taloha heliny 1940, Vavolombelon̈o Jehovah ta Etazonỳ tsy nahazo nitory izikoa tsy nangataka lalan̈a tamy manampahifan̈a. Fa iro tsy nan̈eky nan̈ano raha zen̈y fotony haindro fa vitany fanjakan̈a fo man̈afoan̈a fazahoan̈a lalan̈a io. Salakady Jesosy nan̈amia beko mila mitory io, ke fanjakan̈a tsy manan̈a zo hisakan̈a iro tsy han̈ano zen̈y. (Mar. 13:10) Ke vokany, mandeha anjatony aby pitory nisamboriny polisy. Ke iro rahalahy tamy foibe tan̈y nieritreritry handefa afera io tamy fitsaran̈a. Tiandro porofoin̈y baka fa tsy rariny foeky Vavolombelon̈o Jehovah tsy hambela mitory zen̈y, fotony iro manan̈a zo han̈ano raha fataony fivavahan̈andro. Ke nandeha tamy fitsaran̈a iro taminy 1938. Ten̈a nisy vokany tsara izio tafara tatỳ. Alo baka zahavantsika ino raha nandalo.
6, 7. Ino raha navoa Newton ndreky vady amanjanakanany?
6 Tamy talata 26 Avrily 1938, mbala maraindrain̈y andra taminio, nandeha nitory ta New Haven, ta Connecticut, rahalahy Newton Cantwell, 60 taon̈o, ndreky Esther vadiny. Niaraka tamindro koa zanakandro telo mirahalahy, Henry, Russell ndreky Jesse. Iro dimy mianaka samy pisava lalan̈a manokan̈a. Iro efa nan̈ampoy fa mety tsy ho tafody arivanizio. Efa matetiky samboriny polisy iro, ke efa nampoizindro fa mety mbala ho voasambotro koa iro taminio. Fa raha zen̈y tsy namparivan̈a iro. Iro nitondra tomobily aroe. Araiky nindesiny Newton, ke nisy boky ndreky gazety baka io grafofony tao. Fa Henry ndraiky nitondra tomobily nisy bafla. Mbala vo 22 taon̈o fo izy taminio. Kanefa mbala vo tsy ela loatrany nitoriandro, efa nisy polisy edy nanakan̈a iro.
7 Russell antsendriky voasambotro. Izy taminio 18 taon̈o. Baka io voasambotro koa Newton ndreky Esther. Hitany Jesse baka lavitry fa nazony polisy iro telo mianaka. Ke izy zaraiky fo tavela tamy tanàna io tao, fotony Henry mbala nitory tantany hafa. Fa loso fo izy nandeha nitory niaraka tamy grafofony. Nisy lelahy katoliky aroe nan̈eky hitandren̈y izy. Nalefany Jesse kabarony Rahalahy Rutherford, titranizio “Fahavalo.” Iro mbala mitandren̈y in̈y fo iro fa neloko mare edy, ke tseky nivonendro Jesse. Safe nialany malaky tio. Fa tsy ela tafaranizen̈y, izy nisamboriny polisy avio nigadraindro. Mbala vo 16 taon̈o fo Jesse tamy zen̈y. Navosotrondro Esther, fa Newton ndreky zanakanany ndraiky nigadrain̈y. Fa iro nan̈efa lamandy, ke andranin̈y fo efa niboaka, mandrapaviany fitsaran̈a iro.
8. Nan̈ino Jesse Cantwell nivolan̈indro fa pan̈akorontan̈a?
8 Ta New Haven iry Cantwell mianakavy nitsarain̈y, tamy Septambra 1938. Newton ndreky Russell baka io Jesse voaheloko higadra, fotony iro zen̈y nangataka vola taminolo, kanefa tsy nahazo lalan̈a nan̈ano zen̈y. Ke nalefandro tamy Fitsaran̈a Tampony Connecticut afera io. Fa tan̈y Jesse voaheloko fa pan̈akorontan̈a zen̈y. Navy tan̈y baka iro lelahy aroe nitoriany in̈y, ke iro nivolan̈a fa nankaratsy fivavahan̈andro zen̈y kabaro nalefany Jesse salakady nampaneloko iro. Ke afera io nampanongaintsika tamy Fitsaran̈a Tampony Amerikain. Io fitsaran̈a farany an̈abo a Etazonỳ.
9, 10. a) Ino didimpitsaran̈a naboakany Fitsaran̈a Tampony tamy le 20 May 1940? b) Nan̈ino didimpitsaran̈a io mbala mahatsara pitory a Etazonỳ an̈y?
9 Rahalahy Hayden Covington avokàntsika tamy zen̈y.a Charles Hughes ndraiky Prezidany Fitsaran̈a Tampony, baka io nisy pitsara valo niaraka niasa taminany. Tamy 29 Marsy 1940 iro nanomboko nandiniky momba afera io. Nitandrin̈esany fitsaran̈a io tsarabe porofo aby nivolan̈iny Rahalahy Covington. Avokàny Connecticut koa mba nifen̈y nan̈aporofo fa atsika pan̈akorontan̈a. Ke nisy araiky tamindro pitsara aby io nivolan̈a taminany: “Zaho koa tsy diso, ndray Kristy Jesosy zay koa mba tsy tianolo koa, fotony tsy tiandro raha nitoriany, tsy zen̈y?” Namaly karaha ty avokà io: “Zen̈y tsarabe! Ary zaho zay koa tsy diso, nisazinolo izy fotony mbala nitory izio fo kanefa efa tsy tianolo raha zen̈y. Tsy zen̈y raha volan̈iny Baiboly?” Nazava zen̈y! Tsy azony avokà io onon̈o foeky fa izy efa niaiky fa atsika io mitovy amy Jesosy fotony tsy tianolo raha torintsika, avio fitsaran̈a a Connecticut an̈y mitovy iro olo namono Jesosy in̈y fo fotony nan̈asazy atsika. Ke tamy 20 May 1940, Fitsaran̈a Tampony nan̈aboaka didimpitsaran̈a fa Vavolombelon̈o Jehovah manan̈a ny rariny.
Rahalahy ndreky ranabavy nahazo fandrisian̈a tamy fitsaran̈a. Hayden Covington (aloha, an̈ivo), Glen How (ankavia)
10 Nisy vokany tsara didimpitsaran̈a io. Izio baka nahainiaro zonolo han̈ano raha fataony fivavahan̈anany fo, ke manampahifan̈a tsy mahazo manakan̈a izy amy zen̈y. Fitsaran̈a io koa nivolan̈a fa Jesse ‘tsy atahoran̈a han̈akorontan̈a vahoaka zen̈y foeky’ izikoa zahan̈a raha nataony. Voaporofo fa Vavolombelon̈o Jehovah tsy pan̈akorontan̈a. Nandresy iro! Firaka amy zioty, didimpitsaran̈a io mbala mahatsara iro fo. Karaha ty nivolan̈iny rahalahy avokà araiky zay: ‘Zahay ziô efa tsy voafehifehy eky, fa afaka mitory vaovao tsara aminolo man̈odidin̈y zahay. Efa tsy mazovo tsao hisakanany manampahifan̈a eky zahay.’
Atsika ma mitaon̈o olo hivadiky amy fitondrasan̈a?
Hen̈atra Niny Kanada Tsy Fitiavany Québec Zan̈ahary Ndreky Kristy Avio Fan̈afahan̈a
11. Ino raha nataony Vavolombelon̈o Jehovah ta Kanada, avio nan̈ino?
11 Tojy fanoheran̈a mare koa Vavolombelon̈o Jehovah ta Kanada, tafara heliny 1940. Fanjakan̈a tsy nan̈omba iro hitory. Ke taminy 1946, iro nan̈aboaka trakty mikoran̈a momba raha zen̈y. Trakty io nizarain̈y tan̈atiny 16 andra. Tan̈atinizio tao nisy pazy efatra, titranany: Hen̈atra Niny Kanada Tsy Fitiavany Québec Zan̈ahary Ndreky Kristy Avio Fan̈afahan̈a (fransay). Nivolan̈iny tan̈atiny trakty io tao raha jiaby natao tamy Vavolombelon̈o Jehovah. Ohatra ziô, pitondra fivavahan̈a ta Québec nitariky vahoaka hiady tamindro, polisy koa nampijaly iro mare. Karaha ty nivolan̈iny trakty io: “Misy Vavolombelon̈o Jehovah fo voasambotro, kanefa iro aminio tsy nandika lalàn̈a aby. A Montréal, efa kadiriny 800 iô fitorian̈a iro.”
12. a) Karakory nataondro panohitry aby io, izikoa fa nirasain̈a trakty in̈y? b) Ino raha niampangan̈a atsika? (Zahava koa fan̈amarihan̈a.)
12 Maurice Duplessis, premie ministrany Québec, neloko mare izikoa fa baka namaky trakty io, ke izy nivolan̈a fa han̈ano “ady tsisy indrafô” amy Vavolombelon̈o Jehovah. Nan̈ano tetiky araiky taminany koa Kardinaly Villeneuve. Lan̈iany pitory taka nizara trakty io, nivolan̈iny fa “pandrisiky olo hivadiky amy fitondrasan̈a.”b Betibetiky efa nahatakatra 1600 isany fitorian̈a atsika tamy tribinaly. Karaha ty nivolan̈iny anabavy pisava lalan̈a zay: “Efa tsy voakontinay impiry zahay voasambotro fotony efa matetiky loatra.”
13. Azovy nandeha tamy fitsaran̈a voanalohany, avio ino didy naboaka tamizio?
13 An̈isany mba navoa raha koran̈iny trakty io tao koa rahalahy Aimé Boucher ndreky zanany aroe vavy, kahian̈a Gisèle ndreky Lucille. Iro nipetraka tatsimony Tanànany Québec tan̈y. Rahalahy Boucher farandraha nanetry ten̈a ndreky nalemy fan̈ahy eky. Izy pamboly ndreky pitarimy biby, ke ndraikindraiky fo izy vo mandeha antanàbe. Miondran̈a sarety izy izikoa fa mandeha an̈y. Ke tsy honohono iro telo mianaka foeky pan̈akorontan̈a olo zen̈y. Kanefa iro izikoa fa nizara trakty io tamy tanànandro tan̈y, volan̈inolo aby io fa pandrisiky olo hivadiky zen̈y. Ke iro olo voanalohany nalefa tamy fitsaran̈a taminy 1947. Mbala vo 18 taon̈o fo Gisèle tamy zen̈y, avio Lucille 11 taon̈o. Pitsara io tsy tia Vavolombelon̈o Jehovah foeky, ke tsy marin̈y taminany ry Boucher tsy diso zen̈y, ndray efa voaporofo raha zen̈y. Izy nifidy nanohan̈a hevitriny avôkany tanàna io fa trakty nizaraindry Boucher in̈y zen̈y mandrisiky olo tsy hifankatia. Kanefa raha misy fo nitantarainy trakty io. Hita baka amy zen̈y fa tihivolan̈a pitsara io fa diso lan̈iany olo mivolan̈a ny marin̈y. Nalefa tamy prizon Aimé ndreky Gisèle, avio firaka amy Lucille koa nigadrain̈y andra aroe kanefa izy mbala hely. Ke nalefantsika tamy Fitsaran̈a Tampony Kanada afera io. Io fitsaran̈a farany an̈abo an̈y.
14. Ino raha nataondro pitory ta Québec tan̈y, ndray iro nampijalen̈a?
14 Nahainampijalinolo fo pitory ta Québec, kanefa iro mbala nasaky nitory momba Fanjakan̈any Zan̈ahary fo. Matetiky raha zen̈y nisy vokany tsara. Tamy mbala vo komansy nirasa trakty in̈y, mbala 300 fo Vavolombelon̈o Jehovah tan̈y. Efatra taon̈o tafaranizen̈y, iro nanjary mandeha 1000 aby!c
15, 16. a) Ino didimpitsaran̈a naboakany Fitsaran̈a Tampony Kanada? b) Ino vokatrany zen̈y tamy pitory ta Kanada ndreky taminolo hafa?
15 Tamy Ziain 1950, ry Aimé Boucher nalefa tamy Fitsaran̈a Tampony. Sivy pitsara tamy fitsaran̈a io. Rahalahy Glen How avôkàntsika. Tamy 18 Desambra 1950, niboaka didimpitsaran̈a mivolan̈a fa iro afaka madiodio. Nazavainy Rahalahy How tamy fitsaran̈a baka fa dikany “mitaon̈o olo hivadiky amy fitondrasan̈a” zen̈y mandrisiky olo han̈ano lagrevo ndreky hanongana fanjakan̈a. Kanefa trakty in̈y ho izy, “tsy nampirisiky olo han̈ano zen̈y foeky, fa raha zisty nivolan̈a ny marin̈y fo, ke lalàn̈a tsy mandrova raha zen̈y.” Nikeny fitsaran̈a fa marin̈y ankitin̈y volan̈anany. Karaha ty nivolan̈iny Rahalahy How: “Hitako tsarabe taminin̈y fa zahay nataony Jehovah nandresy.”d
16 Nandresy ankitin̈y Fanjakan̈any Zan̈ahary! Fotony izikoa fa niboaka didimpitsaran̈a in̈y, nanjary nisy fiampangan̈a 122 hafa koa loso foan̈a. Olo mipetraka a Kanada ndreky firenena maromaro mivolan̈a angiley (Commonwealth Britaniky) loso afaka mivolan̈a zay raha hitany fa tsy mety ataony fanjakan̈a. Tsy basinizen̈y fo fa loso tsy nahomby eky tetikiny pitondra fivavahan̈a ndreky fitondrasan̈a ta Québec tan̈y mitady hifehifehy atsika.e
Vahoakany Fanjakan̈any Zan̈ahary ma pivarotro boky?
17. Ino raha volan̈iny fitondrasan̈a sasany momba atsika?
17 Kristianin̈y voanalohany tsy ‘nivarotro volan̈a Zan̈ahary.’ Ke mira zen̈y koa ataontsika. (Vakia 2 Korintianina 2:17.) Misy fitondrasan̈a sasany mivolan̈a fa atsika io pivarotro boky fa tsy olo mitory teny fo, ke atsika zen̈y mila man̈araka lalàn̈a momba varotro. Nisy tamintsika koa nalefa tamy tribinaly foeky baka tamy raha zen̈y. Alo baka hidinihintsika raha niboaka.
18, 19. Ino raha nataony manampahifan̈a ta Danemark hanakan̈ana atsika tsy hitory eky?
18 Danemark: Tamy 1 Oktobra 1932, fanjakan̈a nan̈aboaka lalàn̈a fa tsy mety mivarotro boky na gazety izikoa tsy mangataka lalan̈a amindro. Pitory aby io tsy nan̈ano raha zen̈y. Ke amarainizin̈y, nisy Vavolombelon̈o Jehovah dimy nitory ta Roskilde. Izio tanàna mandeha kadiriny telopolo kilometara andrefany Copenhague, kapitaliny Danemark. Araiky tamindro io August Lehmann. Nisamborindro izy fotony nivarotro boky, kanefa tsy nahazo lalan̈a nan̈ano zen̈y.
19 Lehmann nalefa nitsarain̈y ta Roskilde, tamy 19 Desambra 1932. Izy nan̈eky fa izy nitondra boky handeha amian̈a olo, kanefa nazavainy fa tanjon̈onany tsy handeha hivarotro izio. Nan̈eky raha nivolan̈iny zen̈y fitsaran̈a io. Karaha ty nivolan̈iny fitsaran̈a: ‘Olo torindro io mahavelonten̈a tsarabe. Tsisy tombony azony lera izy mizara boky, salakady izy tsy mieritreritry hangala tombony amy zen̈y aby. Nata izy aby miala vola izikoa fa mandeha mitety tran̈o.’ Ke niboaka didimpitsaran̈a fa Lehmann tsy “pivarotro.” Kanefa mbala tsy nijanon̈o tio fahavalony vahoakany Jehovah. Nalefandro tamy Fitsaran̈a Tampony Danemark afera io, fotony Vavolombelon̈o Jehovah man̈eran̈a Danemark tiandro voly mitory. (Sal. 94:20) Ino raha nataondro rahalahintsika aby io?
20. Ino didimpitsaran̈a naboakany Fitsaran̈a Tampony Danemark, baka io ino raha nataony rahalahy aby io?
20 Herin̈iandra talohany nitsaran̈a Lehmann, pitory erany Danemark nifen̈y mare nitory. Niboaka tamy talata 3 Oktobra 1933 didimpitsaran̈a, ke Fitsaran̈a Tampony io nitovy hevitry tamy fitsaran̈a ta Roskilde fo. Nivolan̈inizio fa Lehmann tsy nandika lalàn̈a. Ke Vavolombelon̈o Jehovah tsy mila mangataka lalan̈a izikoa fa hitory. Nikendro rahalahintsika aby io fa Jehovah nahavy raha zen̈y, ke iro nahainazoto nitory fo. Tafaranizen̈y, fitondrasan̈a efa tsy nisakantsakan̈a iro eky.
Vavolombelon̈o Jehovah nisy korazy mare ta Danemark, tafarany taon̈o 1930
21, 22. Ino didimpitsaran̈a naboakany Fitsaran̈a Tampony Amerikain?
21 Etazonỳ: Pisava lalan̈a rahalahy Robert Murdock. Tamy dimansy 25 Fevrie 1940, izy ndreky pitory fito niaraka nitory ta Jeannette, marikitry Pittsburgh, a Pennsylvanie. Fa iro tamy zen̈y voasambotro, avio nitsarain̈y. Diso zen̈y iro fotony tsy nan̈efa vola tamy fanjakan̈a hazahoan̈a lalan̈a hizara boky. Ke afera io nalefa tamy Fitsaran̈a Tampony Amerikain.
22 Niboaka tamy 3 May 1943 didimpitsaran̈a. Izio nivolan̈a fa tsy diso Vavolombelon̈o Jehovah. Nivolan̈iny fitsaran̈a fa atsika tsy tokotro hangataka lalan̈a, fotony arakany lalàmpan̈oren̈ana, zontsika mirasa boky ndreky gazety. Nifoan̈any fitsaran̈a io lalàn̈a naboakany tanànany Jeannette, fotony “manakantsakan̈a olo han̈aboaka boky ndreky gazety, avio tsy han̈ano raha fataony fivavahan̈andro.” Karaha ty nivolan̈iny pitsara araiky kahian̈a William Douglas: ‘Vavolombelon̈o Jehovah izikoa fa mitety tran̈o, tsy raha mizara boky fo fa mitory teny koa. Ke tsy tokony hisakasakan̈ana iro, fotony mitovy aminolo mandeha mivavaka a leglizy ndreky mitory teny an̈abo sehatra fo raha ataondro zen̈y.’
23. Nan̈ino didimpitsaran̈a taminy 1943 aby in̈y mbala ilain̈y fo firaka amy zioty?
23 Niavaka mare didimpitsaran̈a in̈y, fotony izio nankamafy fa atsika io tsy pivarotro fa pitory. Tamy 3 May 1943 io, nisy afera 13 nitsarain̈y tamy Fitsaran̈a Tampony, ke atsika nandresy tamy 12 tamindro io. Didimpitsaran̈a niboaka taminio ten̈a nilain̈y mare tafara tatỳ, fotony isaka nisy olo nitady hisakan̈a atsika tsy hitory, na isaka tran̈o zen̈y na antany hafa, mbala iro in̈y fo nampiasain̈y.
“Zan̈ahary fo tsy maintsy arehanay volan̈a”
24. Ino raha ataontsika izikoa fitondrasan̈a misakan̈a atsika tsy hitory eky?
24 Atsika ravoravo mare izikoa fa imboany fitondrasan̈a mitory vaovao tsara. Kanefa ndraikindraiky, misy fitondrasan̈a mivolan̈a amintsika mivantan̈a fa atsika tsy mahazo mitory foeky. Akory ataontsika koa fa karaha zen̈y? Atsika man̈ano mira nataondro apostoly aby io, ke ‘Zan̈ahary fo tsy maintsy arehantsika volan̈a fa tsy olo.’ (Asa. 5:29; Mat. 28:19, 20) Ke atsika mitory fo, fa mitady fomba hafa fo hikoran̈ana aminolo. Fa tsy zen̈y fo koa fa alefantsika amy fitsaran̈a afera io. Ty misy ohatra aroe:
25, 26. Nan̈ino Vavolombelon̈o Jehovah ta Nikaragoà nandeha tamy Fitsaran̈a Tampony, avio ino vokany?
25 Nikaragoà: Rahalahy Donovan Munsterman misionera sady izy koa pikarakara sampan̈a. Tamy 19 Novambra 1952, izy voakaiky tamy Kapitainy Arnoldo García. Izio sefo tamy Birômpanjakan̈a Miandraikitry Fifindramonin̈y ta Managoà, kapitaliny Nikaragoà. Kapitainy io nivolan̈a taminany fa Vavolombelon̈o Jehovah a Nikaragoà “tsy mahazo mitory raha inoandro eky sady tsy mahazo mitaon̈o olo han̈araka fivavahan̈andro.” Kapitainy io nan̈azava fa iro tsy mahazo mitory sady misy olo mivolan̈a fa iro zen̈y Koministy. Tsy azovy iro niampanga atsika io fa pitondra fivavahan̈a katoliky.
Fivoriambe ta Nikaragoà, tamy fotoan̈a nisiany fandraran̈a
26 Ke Rahalahy Munsterman direkty niezaka nikoran̈a tamy ministerany fivavahan̈a ndreky tamy Prezidà Anastasio Somoza García. Fa raha zen̈y tsisy vokany foeky. Ke pitory nitady fomba hafa hanompoan̈a Jehovah. Iro efa tsy nivory tamy Tran̈o Fivorian̈a eky fa nivory tantany hafa, avio olo vitsy fo iro niaraka nivory. Iro mbala nitory fo fa tsy tamy lalan̈a eky. Iro koa nangataka tamy Fitsaran̈a Tampony Nikaragoà han̈afoan̈ana fandraran̈a io. Nanjary korambe tamy gazety izio, ke nan̈eky foeky Fitsaran̈a Tampony io fa handiniky afera io. Ke niboaka tamy 19 Ziain 1953 didimpitsaran̈a. Nivolan̈a fitsaran̈a io fa Vavolombelon̈o Jehovah tsy tokony hisakan̈ana hitory, fotony erakany raha koran̈iny lalàmpan̈oren̈ana, zondro mikoran̈a hevitrindro ndreky man̈ano raha iritriretindro fa mety, baka io mikoran̈a aminolo raha inoandro. Nivolan̈a koa izio fa fitondrasan̈a tokony himpody hifandray tsara amy Vavolombelon̈o Jehovah.
27. Nan̈ino vahoakany Nikaragoà gaga mare naharen̈y didimpitsaran̈a naboakany Fitsaran̈a Tampony, baka io karakory fandraisandro rahalahy aby io izin̈y?
27 Gaga vahoakany Nikaragoà nahita fa niaro Vavolombelon̈o Jehovah Fitsaran̈a Tampony io. Farandraha narehanolo volan̈a eky pitondra fivavahan̈a tan̈y, ke talohanizen̈y, fitsaran̈a tsy masaky manohitry iro foeky. Mboany pitondra koa mitôron̈o mare, ke mahalan̈a fitsaran̈a vo masaky man̈afoan̈a didy naboakandro. Ke rahalahintsika aby io natoky fa matoa iro nandresy, dikanizen̈y iro nampiany Jesosy Panjakantsika, avio iro nazoto nitory fo.—Asa. 1:8.
28, 29. Ino fiovoan̈a maventy nisy ta Zaïre tan̈y, taminy 1986?
28 Zaïre (Repobliky Demokratikiny Congo): Tamy taon̈o 1985 tan̈y, nahatakatra 35 000 tio isany Vavolombelon̈o Jehovah. Nahainitombo fo pitory, ke nisy tran̈o vaovao naorin̈y hatao Betela. Nisy fivoriambe iraisampirenena koa ta Kinshasa, kapitaliny Congo, tamy Desambra 1985. Nisy 32 000 isany pan̈atriky. Kanefa tafaranizen̈y, nisy fiovoan̈a maventy.
29 Rahalahy Marcel Filteau baka a Québec, a Kanada, misionera ta Zaïre tan̈y tamy fotoan̈a zen̈y. Izy an̈isanolo niatriky fan̈injehan̈a ta Québec. Ho izy: “Nahazo taratasy sampan̈any Zaïre tamy 12 Marsy 1986 fa tsy iken̈a aradalàn̈a eky fikambanan̈any Vavolombelon̈o Jehovah.” Nan̈ano sin̈e taratasy io Prezidan Mobutu Sese Seko.
30. Ino raha nanahirantsain̈y Komitiny Sampan̈a, baka io ino raha nataondro?
30 Kiakanizin̈y, nisy fan̈ambaran̈a nandeha tamy radio nivolan̈a fa ‘efa tsisy Vavolombelon̈o Jehovah eky a Zaïre eto manomboko ziô.’ Tsy ela tafaranizen̈y, niravan̈indro Tran̈o Fivorian̈a, baka io nisy olo navy nangalatra entan̈andro rahalahintsika aby io. Nisamborin̈y koa iro, baka io nigadrain̈y ndreky nampijalin̈a. Firaka amy tsaiky mbala nigadraindro fo! Tamy 12 Oktobra 1988, nalainy fanjakan̈a fanan̈any fandaminan̈a, baka io nanjary polisy nipetraka tamy Betela. Sampan̈any Zaïre nangataka tamy Prezidan Mobutu han̈afoan̈a didy naboakany io, fa iro tsy nahazo valiny foeky. Ke sahirantsain̈y Komitiny Sampan̈a, asa tokony hitory amy Fitsaran̈a Tampony sa hiambin̈y hely antsendriky. Timothy Holmes misionera tan̈y tamy fotoan̈a zen̈y, sady izy koa pandrindra Komitiny Sampan̈a. Ho izy: “Zahay nivavaka tamy Jehovah baka ampiany hahay ino raha tokony hataonay.” Hitandro baka tio fa sitrany miambin̈y hely. Ke iro nankahery iro rahalahy ndreky ranabavy, avio nitady fomba hafa hitorian̈a.
“Taminin̈y nahitanay fa Jehovah mahay man̈ova raha ankitin̈y”
31, 32. Ino didimpitsaran̈a niavaka naboakany Fitsaran̈a Tampony Zaïre, baka io ino vokany?
31 Izikoa fa nandeha fotoan̈a, efa tsy dia ninjehin̈y eky Vavolombelon̈o Jehovah, sady manampahifan̈a loso nahainan̈aja zonolombelon̈o fo. Ke hitany Komitiny Sampan̈a fa efa mety tsarabe amy zay izikoa iro mangataka amy Fitsaran̈a Tampony Zaïre han̈afoan̈a fandraran̈a io. Mahagaga fa fitsaran̈a io nan̈eky handiniky momba fangatahan̈a io. Ke niboaka didimpitsaran̈a tamy 8 Zanvie 1993. Zen̈y efa kadiriny fito taon̈o tafarany nan̈aboahany prezidan didy io. Nivolan̈iny didimpitsaran̈a io fa tsy rariny raha nataony fitondrasan̈a, ke foan̈a fandraran̈a io. Iritrireta hely baka zen̈y! Pitsara nasaky nan̈afoan̈a didy io, ndray raha zen̈y mety nankafaka fahin̈anandro. Karaha ty nivolan̈iny Rahalahy Holmes: “Taminin̈y nahitanay fa Jehovah mahay man̈ova raha ankitin̈y.” (Dan. 2:21) Tsapandro fa Jesosy ankitin̈y nan̈ambara iro raha tokony hatao, ndreky ombian̈a tokony han̈anaovan̈a izio. Raha zen̈y nankahery iro mare!
Ravoravo mare Vavolombelon̈o Jehovah a Repobliky Demokratikiny Congo, fotony iro efa libra manompo Jehovah
32 Ke birôny sampan̈a loso afaka nampiditry misionera ta Zaïre, avio afaka nan̈orin̈y Betela vaovao, ndreky afaka nan̈afatra boky ndreky gazety.f Ravoravo mare atsika panompony Jehovah erantany, fotony hitantsika fa izy ten̈a man̈avotro atsika!—Isaia 52:10.
‘Jehovah pan̈ampy zaho’
33. Nan̈ino mankahery atsika nandiniky momba iro raharaha arapitsaran̈a aby tato?
33 Jesosy nivolan̈a: “Ambarako anaro raha tokony hivolan̈inaro avio amezako fahendrena anaro, ke ndray hitambatra araiky iro fahavalonaro aby io, iro tsy hahavita handresy na hanohitry raha zen̈y foeky.” (Vakia Lioka 21:12-15.) Tanteraka raha zen̈y. Efa impirimpiry atsika nandresy tamy fitsaran̈a. Ndraikindraiky, nisy pitsara nasaky nan̈amia rariny atsika, karaha tamy Gamaliela tamy taonjato voanalohany in̈y. Nataony Jehovah tsy nahomby tetikindro panohitry aby io. (Vakia Isaia 54:17.) Tsisy raha mahavita mampijanon̈o asany Zan̈ahary.
34. Nan̈ino ma mahagaga fandrisian̈a nazontsika man̈oloan̈a fitsaran̈a, baka io raha zen̈y man̈aporofo ino? (Zahava koa amy “Didimpitsaran̈a Nitondra Hatsaran̈a Tamy Pitory Fanjakan̈any Zan̈ahary.”)
34 Maharikian̈a fa atsika nandresy fo kanefa atsika tsy olo an̈abo, atsika tsy mifidy lera misy fifidianan̈a, avio nata atsika tsy man̈ano politiky ndreky tsy man̈ano risoriso. Matetiky iro rahalahintsika mandeha amy fitsaran̈a aby io volan̈inolo fa ‘tsy nandia fianaran̈a sady olo tsotra.’ (Asa. 4:13) Dikanizen̈y, tsisy tombony azony fitsaran̈a izikoa iro miaro atsika lera misy fivavahan̈a hafa ndreky fitondrasan̈a manohitry atsika. Kanefa efa impirimpiry fitsaran̈a nan̈amia rariny atsika. Hita baka amy zen̈y fa ‘atsika ambany masony Zan̈ahary sady miaraka amy Kristy.’ (2 Kor. 2:17) Mira apostoly Paoly, atsika man̈eky karaha ty: “Jehovah pan̈ampy zaho, ke tsy havozo foeky zaho.”—Heb. 13:6.
a Cantwell miady amy Fanjakan̈any Connecticut an̈arany afera io. Taminio Rahalahy Hayden Covington niaro voanalohany Vavolombelon̈o Jehovah tamy Fitsaran̈a Tampony Amerikain. Mbala nisy afera 43 hafa koa nikarakarainy tan̈y tafaranizen̈y. Taminy 1978 izy naty. Dorothy vadiny ndraiky naty taminy 2015. Efa 92 taon̈o izy tamy zen̈y, sady tsy nivadiky tamy Jehovah foeky.
b Lalàn̈a niboaka taminy 1606 narehan̈a tamy zen̈y. Lalàn̈a io mivolan̈a fa pitsara afaka man̈ameloko olo araiky izikoa hita fa mampiady olo raha volan̈iny, ndray marin̈y.
c Taminy 1950, nisy panompo manontolo andra 164 ta Québec, ke 63 tamindro io rahalahy ndreky ranabavy baka nan̈ano Sekoliny Gileada. Iro nan̈eky nandeha tan̈y, ndray efa haindro fa nampijalin̈y Vavolombelon̈o Jehovah tan̈y.
d Rahalahy Glen How avokà ten̈a misy korazy, sady ten̈a nahay niaro Vavolombelon̈o Jehovah. Anjatony afera tamy fitsaran̈a efa nikarakarainy ta Kanada ndreky tantany hafa, taminy 1943 firaka 2003.
e Mbala misy fan̈azavan̈a maromaro amy boky Mpitory, pazy 688-690.
f Naleony sampan̈a nan̈orin̈y Betela vaovao tantany hafa, ndray niala tamy Betela araiky taloha io fo iro polisy aby io tamy farany.