Areha Volan̈a Zan̈ahary Baka Tokantran̈onao Sambatra

Jehovaha nan̈ano vadian̈anolo voanalohany. Baiboly mivolan̈a fa izy niasa man̈angy araiky, baka io namiany Adama. Ravoravo mare Adama, ke nivolan̈a: “Ty zalahy ten̈a taolan̈a baka amy taolan̈anaka ndreky nofotro baka amy nofotronaka ankitin̈y.” (Genesisy 2:22, 23) Tiany Jehovah ho sambatra koa vadian̈anolo izioty.

Taminy anao vo nan̈orin̈y tokantran̈o, anao mety nieritreritry fa mandeha hoazy raha jiaby. Fa ndray olo mifankatia be karakory, mety ho tojy raha manahiran̈a fo. (1 Korintianina 7:28) Hahita toro lalan̈a maro baka amy Baiboly anao amy boky ty. Izikoa arehanao raha koran̈iny ao, ho sambatra tokantran̈onao.—Salamo 19:8-11.

1 ATAOVA TSARABE ANDRAIKITRY NAMIANY JEHOVAH ANAO

KORAN̈INY BAIBOLY: Lelahy lohany fianakavian̈a. —Efesianina 5:23.

Tiany Jehovah lelahy jiaby hikarakara vadindro ndreky ho tsara fan̈ahy amindro. (1 Petera 3:7) Nan̈anovany Jehovah man̈angy io, han̈ampy anaro lelahy, ke tiany anaro ho tia ndreky han̈aja vady. (Genesisy 2:18) Tiava fo vadinaro, ke raha mahatsara iro fo antsendriky ataova, zay vo raha mahatsara anaro.—Efesianina 5:25-29.

Tiany Jehovah man̈angy jiaby han̈aja vady ndreky han̈ampy iro aminy andraikitrindro. (1 Korintianina 11:3; Efesianina 5:33) Mahaiza miaraka miasa, baka io aza disovin̈y fanapahankevitrinany. (Kolosianina 3:18) Anao koa man̈ano zen̈y, ho ravoravo vadinao, ho ravoravo koa Jehovah.—1 Petera 3:1-6.

AKORY AN̈ANOVAN̈A ZEN̈Y?

• An̈ontania vadinao raha mbala mila ovoanao, baka anao mahavita tsarabe andraikitrinao. Tandrin̈esa tsarabe raha volan̈iny, baka io areha

• Aza mora kivy, fotony mety ho elaela anao vo mahay raha tiany vadinao, karaha zen̈y koa izy

2 IRITRIRETA RAHA MAHATSARA VADINAO

KORAN̈INY BAIBOLY: Anao mila mizaha raha mahatsara vadinao. (Filipianina 2:3, 4) Ataova hitany fa izy ten̈a tianao, baka io koa aza adin̈a fa Jehovah man̈iraka olo manompo izy ho tsara fan̈ahy aminolo jiaby. (2 Timoty 2:24) Diniha tsarabe koa raha hivolan̈inao amy vadinao, fotony “volan̈a tsy voadiniky, marary karaha tomboko sabatra in̈y, fa volan̈anolo misain̈y ndraiky mampahivan̈a.” (Ohabolana 12:18) Jehovah han̈amia anao fan̈ahy masin̈inany, baka anao ho tsara fan̈ahy, izikoa fa mikoran̈a amy vadinao.—Galatianina 5:22, 23; Kolosianina 4:6.

AKORY AN̈ANOVAN̈A ZEN̈Y?

• Anaro koa fa hikoran̈a raha manahiran̈a maventy, mivavaha amy Jehovah, baka fonaro milamin̈y. Anaro mila mitandren̈y hevitry vadinaro

• Iritrireta tsarabe raha hivolan̈inao ndreky fomba tokony hivolan̈anao izy

3 MAHAIZA MIFAN̈AMPY

KORAN̈INY BAIBOLY: Olo koa fa fivadiany zen̈y, iro manjary “nofotro araiky.” (Matio 19:5) Ndray izy man̈ano zen̈y, anaro mbala olo aroe fo. Zen̈y mahavy anaro mila man̈ano raha, baka anaro hitovy hevitry ndreky hitovy raha tian̈a. (Filipianina 2:2) Izikoa zen̈y ataonaro, anaro hahay hanapakevitry. Karaha ty koran̈iny Baiboly: “Izikoa misy olo pan̈amia hevitry, zay raha kasain̈y ho tanteraka aby.” (Ohabolana 20:18) Ke anaro koa mila hanapakevitry, mitadiava toro lalan̈a amy Baiboly. —Ohabolana 8:32, 33.

AKORY AN̈ANOVAN̈A ZEN̈Y?

• Volàn̈a amy vadinao raha jiaby an̈aty fonao an̈y

• Mila mivolan̈a amy vadinao antsendriky anao alohany hanapakevitry